Deuteronomy 33 - Labrador Inuttitut Heritage Bible

¹ Tamadja saimarsaijutit Mosesib, Gûdib inuᴋotingata, saimarsaijutigijangit Israêlekunik toᴋome sivorngane.

² Oᴋarporlo: Nâlegak Sinaimit tikipok, Seiremit tâpkonunga nuisimavlune; issagutârpok Pâranib ᴋakᴋanganit, tikiporlo ivsornaitut ten tausendit ilagilugit; talerpiane perᴋojaᴋarpok ikomaujârtunik tâpkonunga.

³ Âhamarik, inôᴋatigêksuit nagligivait; ivsornaitoᴋotingit ilûnatik aggangnêput; ingipullo itikavît sângine; ilûnatik piksarsilutik oᴋausernit.

⁴ Mosesib tunitjivigilauᴋpâtigut perᴋojanik, kingormgutijaksanik Jakob ilagêktoksôninginut.

⁵ Tâmnalo ataniolauᴋpok Israêleme, inuit Angajoᴋângit katimangmatta, Israêlekut kinguvârêngit atautsikut.

⁶ Ruben inôle, toᴋonanelo, angutingillo ikitôniaratik.

⁷ Tamadjalo Judab saimartitaujutinga; oᴋarporlo: Nâlegak, Judab nippinga tusalauruk, Angajoᴋângortilauruglo inuᴋotiminut; aggangminut sorᴋsukpok pivlune; igvillo piulilauruk ômigijinginit.

⁸ Levilo pivlugo oᴋarpok: ᴋaumaᴋutît idluarᴋutîllo angutimêpuᴋ nagligijarne, ôktolauᴋtarne Massame, akkerartortigilauᴋtarne Merribame;

⁹ Tâmna atâtane anânanelo pivlugik oᴋarpok: Takungilâka; ᴋatangutinelo ilitaringilait, ᴋitornganelo ᴋaujimangilait; tâpkoa oᴋautsitit maliluarpait, angerᴋatigêngnerijallo serᴋomitailivât.

¹⁰ Tâpkoa Jakokut ajuᴋertorpait idluarsaijutiksarnik Israêlekullo perᴋojarnik; tâpkoa isserluanerutiksanik tipitsiariksautiksanik ilijilârput ᴋingavît sânganut, tunergutiksaniglo ôtaksanik iluitunik tunerguservingnut.

¹¹ Nâlegak, tâpsoma nukingit saimarsalaukit, aggangitalo suliangit ilaliolaukit; tâpsoma akkerartortingita ômigijingitalo okpatingit serᴋomilaukit, nikovingmilutik ajulerᴋovlugit.

¹² Benjamin pivlugo oᴋarpok: Nâlekab erdligijanga terliklune ineᴋalârpok tâpsomane; serngnigivâ uvloᴋ nâvlugo, tuîkitalo akorngangne ineᴋalârpok.

¹³ Josefelo pivlugo oᴋarpok: Nunanga saimartitaule Nâlekamut, ᴋilaub pivianartokutinginut, misuksoarmut, itinersûblo pulaninginut ᴋamane,

¹⁴ Seᴋerngûblo perortitanginut ivlernartunut, ivlernartunullo angijororpaliajunut takᴋerne,

¹⁵ Kaᴋaᴋsuillo itsarnitat pitanginut pijariaᴋortojunut, ᴋakᴋallo nungusuitut pivianartunginut,

¹⁶ Nunablo tâpsomanêtullo ivlernartunginut, napârtullo taggaliningine ineᴋartut ᴋuvianarninginut; saimanartok tikile Josefib niaᴋoanut, ᴋatangutiminit ingmiᴋôrtitaujûb kabjinganut.

¹⁷ Inornarninga tuktuvaub erniangoᴋârtungatun-ipok, tuktuvaublo nakjûgik nakjugivâk; tâpkungnunga inôᴋatigêksuit ilûnaita nakjumigaromârpait nunalo atausingortilugo, Efraimib inungit ten tausendit pivlugit, Manassiblo tausendingit tâpsoma pigivait.

¹⁸ Sebulonelo pivlugo oᴋarpok: ᴋuviasugit, Sebulone, aniviksat pivlugo; igvillo Isassare, tupitit pivlugit.

¹⁹ Inôᴋatigêt ᴋaiᴋojomârpait ᴋakᴋamut; tagvane tunergutinik idluartunik tunerguseromârput; imarbiksûb pitaᴋaloringingit milugomârpait, pivianartullo siorᴋanelo ijersimajut.

²⁰ Gadelo pivlugo oᴋarpok: Saimartitaule Gademik angijorortitsijok; loevetut aᴋopivok, aᴋsârniklunelo talermik kabjermiglo.

²¹ Sivorlermik nangminiksane ᴋenerpâ, tagvane ajuᴋertuijûb avgoaksanga ᴋomergutaungmat; tikiutivorlo inôᴋatigêt angajoᴋânginut, Nâlekab idluarsaijutiksangit piniarpait, Israêlekunullo erᴋartuijutiksangit.

²² Danelo pivlugo oᴋarpok: Dane loevearaupok, Bâsanemit tikisâromârpok.

²³ Naftalilo pivlugo oᴋarpok: Naftali! nâmaksititaujotit saimanermut, ilumertaujotit Nâlekab saimarsaininganut: imarbiglo seᴋerngalo pigikik.

²⁴ Asserelo pivlugo oᴋarpok: Assere piloriktitaule ernernut; ᴋuviagijaule ᴋatangutiminut, itikanelo misukligit orᴋsumut.

²⁵ Kikianik ᴋaᴋorlermiglo palangairuserviᴋartuksauvotit; uvluktitullo taimailingajuksauvok pitsartunît.

²⁶ Gûdetut itoᴋangilaᴋ, Israêle, tâmna ᴋilakut ingergavok ikajoriartorlutit, inornarnerminelo ᴋilaub nuvujangine.

²⁷ Gûde issoᴋangitok inigivat, tallillo itsainartut atingnêput; ômisukte pingujarpâ sivunernit, oᴋarporlo: Asseroigit.

²⁸ Israêlelo terlingnartome ineᴋarpok, Jakob puailavinga ingmigolingavok nuname senaugaksatalingme vainelingmelo; ila, ᴋilangit kuserput misuksoarmik.

²⁹ Piloridlarpotit, Israêle, kia adsigivâtît? Inôᴋatigêksuit piulijaujut Nâlekamut, sapûlutarijarnut, ikajortigijarnut, saviksoarmullo inornautigijarnut! Omigijitillo manigotijomârput ilingnut, igvillo tâpkoa poktoningit tullerajalârpatit.