Deuteronomy 31 - Labrador Inuttitut Heritage Bible

¹ Mosesiblo oᴋautsit makkoa oᴋâlautigijartorpait Israêlekunut tamainut.

² Oᴋautivaillo; Uvlome jâreᴋalerpunga 120nik; anilunga iterlungalo sapilerpunga: Nâlekablo oᴋautisimavânga: Jordane una ikâraksarilungilat.

³ Nâlegak Gûdît sivorlivlutit ikâromavok; tâpsoma inôᴋatigêksuit makkoa nungutsomârpait sivunerne, igvillo aᴋsârnigarilârpatit; Josualo sivorlivlutit ikârtuksauvok, sorlo Nâlegak oᴋarsimangmat.

⁴ Nâlekablo piniarvigijomârpait sorlo Sihon, Ogelo, Amorikut atanîgik nunâgiglo piniarvigilaungmagik; tâpkoa nungupâk.

⁵ Nâlekablo tunilârpait ilipsingnut, piniarvigilârpaselo perᴋojak ilûnât perᴋojijutigijara ilipsingnut maliklugo.

⁶ Sôngotitse maksuavluselo, sivôraniaraselo, kapiasûtiginiarasigiglo tâpkoa; Nâlekab Gûdivît nangminek ingergarᴋatigingmatit; tâpsomalo iperarniatsangilâtit, ᴋemangniangilâtillônêt.

⁷ Mosesiblo Josua ᴋaigarsugvigivâ, oᴋautilugolo Israêlekut ilûnatik sângine: Sôngosilerit maksuavlutillo; inôᴋatigêksuit ukkua iterᴋatigilârangne nunamut Nâlekab nelautsimariktomik angerutigilauᴋtanganut atâtanginut tunijomavlugo tâpkonunga; igvillo kingormgutijaksautilugo avgolârpat tâpkonunga.

⁸ Nâlegarlo nangmineᴋ sivunerne ingergarniarpok; tâpsoma ilaginiarpâtit, iperarniatsangilâtit, ᴋemangniangilâtillo; sivôranak, uimâlaniarnaglo.

⁹ Mosesiblo perᴋojat makkoa aglakpait tunilugillo ajuᴋertuijunut Levib erninginut, Nâlekab iklervinganik kigligiutjineᴋtalingmik akigartunut, Israêlekullo angajoᴋânginut tamainut.

¹⁰ Mosesiblo perᴋovait oᴋarlune: Jârit sevenit nâjarangata, jâre attauteᴋarungnaivik neliutikpat, uvloᴋsiorvingme tuppeᴋarvingme akkerᴋunik milukatalingnik,

¹¹ Israêlekut ilûnatik katimajartortilugit Nâlekab Gûdivît sângane inime tâpsoma annerijangane, perᴋojat makkoa atuaraksarivatit Israêlekut ilûnatik sângine tusâtilugit.

¹² Inuit katimatikit, angutit arnallo sorutsillo, tujormiallo itertarvingnêtut, tusarᴋovlugit, iliniarᴋovlugillo, Nâlegarlo Gûdise sivôragilugo piᴋovlugit, kamatsiarᴋovlugillo perᴋojat makkoa oᴋausertangit ilûnatik piniarlugit;

¹³ Tâpkoalo ᴋitorngangit, makkoninga ᴋaujingitut, tusarᴋovlugit, iliniarᴋovlugillo sivôranermik Nâlekamik Gûdipsingnik, inôsise nuname Jordanekut iᴋardluse aivigijapsingne pigijomavlugo nâvlugo.

¹⁴ Nâlekablo Mosese oᴋautivâ: Ahâk, neliuneᴋ toᴋoviksat ᴋanilivok; Josua ᴋaiᴋoguk, sakᴋijâritiglo ilagêktut tupingane, tunitjijungnarᴋovlunga perᴋojamik tâpsomunga. Moseselo Josualo saᴋᴋijâriartorpuk ilagêktut tupingane.

¹⁵ Nâlegarlo sakᴋerpok tuperme nuvujarme nappajome; nuvujarlo nappajok nappavok tupiub upkoangata ᴋolâne.

¹⁶ Nâlekablo Mosese oᴋautivâ: Ahâk, atâtagilauᴋtatit siniᴋatigilârpatit; inuillo ukkua nikovijomârput, Gûdillo takorngartat, nunab aivigijangita pingit, assiniarᴋatigijomavlugit, ᴋemagomârpângalo, angerᴋatigêngneralo âᴋiksortara tâpkonunga, serᴋomilugo.

¹⁷ Uvlormelo tâpsomane ningarnera tâpkonunga katsungaileromârpok, ᴋemagomârpakkalo, kênaralo ijeromârpara tâpkonangat, asserortaujomârpullo; idluinerillo ânianerillo unuktut tikitsomârput tâpkonunga; oᴋaromârpullo uvlorme tâpsomane: Idluinerit makkoa tikilungilâtigût Gûdivut akunaptingnêlungimât?

¹⁸ Kênaralo ijeromârpara uvlorme tâpsomane, idluitulinerijangit tamaita pivlugit, Gûdinut assimnut sângamatta.

¹⁹ Mâna tagva imgerutsit ukkua aglakit, ajuᴋertutigikillo Israêlib ᴋitornganginut; ᴋaninginut, ilikit, imgerutsit tâpkoa kigligiutjutiksauᴋovlugit pivlunga Israêlib ᴋitornganginut.

²⁰ Tikiutisimagupkit nunamut nelautsimariktomik angerutigilauᴋtamnut atâtagijanginut, imungmik igupsaujârtullo orᴋsunganik kôlingmut; nerrisimaguniglo, aᴋeartorlutik ᴋoiglaulutiglo; sangulârput Gûdinut assimnut kivgartorlugillo, naggogilârpângalo, angerᴋatigêngnera serᴋomilugo.

²¹ Idluinerillo ânianerillo unuktut tikisimakpatta tâpkonunga, imgerutsit ukkua kigligiutjilârput pivlunga tâpkoa sângine, puigortaujuksaungimatta kinguvângita ᴋaninginit; ᴋaujimalerêrama mâna issumagilârtanginik taipsomane, tikiutjiᴋârtinanga tâpkoninga nunamut angerutigimarilauᴋtamnut.

²² Taimaimat Mosesib imgerutsit makkoa aglakpait uvlorme tâpsomanetsainak, ajuᴋertutigilugillo Israêlib ᴋitornganginut.

²³ Josualo, Nunib erninga, perᴋovâ, oᴋarlune: Sôngosilerit maksuavlutillo; Israêlekut tikiutijaksarigangne nunamut nelautsimariklunga angerutigilauᴋtamnut tâpkonunga; ilagijomavagillo.

²⁴ Mosesiblo perᴋojat makkoa oᴋausertangit nâmariklugit aglagêramigit aglagvingmut,

²⁵ Mosesib Levikut, akigartut Nâlekab iklervinganik kigligiutjineᴋtalingmik, perᴋovait, oᴋarlune:

²⁶ Perᴋojat aglaksimaviat tamanna tigusiuk ililugolo Nâlekab Gûdipse iklervingata kigligiutjineᴋtaliub sanianut, tagvanêtuksauvorlo ilingnut kigligiutjijôvlune.

²⁷ Nelunginapko tapajoksônît, ᴋongaseᴋarnîllo ᴋerratajomik; ahâk, uvlome sulle inôᴋatigigapse Nâlegak tapagiᴋattarpase; imaᴋa anginersamik tokuma kingorngane taimailârpose.

²⁸ Kinguvârêᴋotipse angajoᴋângit aulatsijigijaselo katimatisigik uvamnut, oᴋautsit tamakkoa oᴋautigilugit tusartilugit pijungnarᴋovlunga, ᴋilaglo nunalo kigligiutjiᴋovâka tâpkonunga.

²⁹ ᴋaujimagama toᴋuma kingorngane asserormarilârapse ilipsingnik, sangulârapselo apᴋomit perᴋojijutigimajamnit ilipsingnut; idluitûblo nelaulârpâse uvlune kingorliojune; pinialârapse Nâlekab idluigijanganik, tâmna ningarsarlugo aggapse sulianginut.

³⁰ Mosesiblo imgerutsit makkoa oᴋausertangit nâvlugit oᴋautigivait Israêlekut ilûnatik katimajut tusâtilugit.