Deuteronomy 30 - Labrador Inuttitut Heritage Bible

¹ Imaitsomarporlo, ukkua tamarmik nelaupatit, saimartitaunerûb ôminarsiᴋojaunerûblo, sâtitama ilingnut, erᴋaumagungnelo inôᴋatigêᴋsuit, Nâlekab Gûdivît ᴋemâviotitangita ilingnut, akornganêtilutit,

² Sâgiaruvillo Nâlekamut Gûdingnut, tâpsomalo nippinga nâlagungne, uvlome perᴋojakka ilingnut tamaita maliklugit, igvit ᴋitorngatillo, ômatingnut tamânut tarningnullo tamânut, maligomalerungne;

³ Tagva Nâlekab Gûdivît aularutijaunît issumagijomârîva, nâpkigijomârpâtillo, uterlunelo katersoromârpâtit inôᴋatigêksoarnit tamainit, Nâlekab Gûdivît apsimaviotitanginit ilingnik.

⁴ Apsimajigijavît ilangit ᴋilaub kiglinganêgaloarpatta ungardlerpâme, tagvangat Nâlekab Gûdivît ᴋaiᴋolârpâtit, tagvangallo ailârpâtit;

⁵ Nâlekablo Gûdivît tikiutilârpâtit nunamut atâtagijavît pigilauᴋtanganut, igvillo pigilârpat; tâpsomalo ajungitulivigilârpâtit, unuksitilutillo piluartomik atâtagijarnit.

⁶ Nâlekablo Gûdivît ômatit kinguvâvîllo ômatingit kipijomârpait, naglingniᴋovlutit Nâlekamik Gûdingnik ômatingnut tamânut tarningnullo tamânut, inôᴋovlutit.

⁷ Nâlekablo Gûdivît ôminarsiᴋojaunerit makkoa ilûnaita pititsomârpait ômigijingnut, naggogijingnullo, unangmijingnullo.

⁸ Igvillo sâgiaromârpotit, Nâlekab nippinga nâlegomavlugo, perᴋojangit tamaita, perᴋojijutigijakka ilingnut uvlome, piniaromavlugit.

⁹ Nâlekablo Gûdivît piᴋangârtitsomârpâtit aggakpît suliangine tamaine, timivît paungangine, nergjuteᴋotivît paungangine, nunavîllo paungangine, idluarᴋutiksarnut; Nâlekab ᴋuviagijomârivâtit ama idluarᴋutiksarnut, sorlo atâtagijatit ᴋuviagilaungmagit;

¹⁰ Nâlekab Gûdivît nippinga nâlegomagungne, maligomagungnelo tâpsoma perᴋojangit maligaksauᴋojangillo, aglaksimajut aglangne ukkunane perᴋojaᴋtalingne; sâgiaruvit Nâlekamut Gûdingnut ômatingnut tamânut tarningnullo tamânut.

¹¹ Perᴋojak tamanna perᴋojijutigijara ilingnut uvlome ajornalungimat ilingnut, ungasiktôngilarlônêt.

¹² ᴋilangmêlungilak, oᴋariaᴋangilatillo: Kina pivluta majoraromavâ ᴋilangmut, ᴋailugolo uvaptingnut, tusartilutalo tâpsominga, piniarᴋovluta tâpsominga?

¹³ Imarbiub ungatânêlungilarlônêt, oᴋariaᴋarᴋonak: Kina pivluta imarbiub ungatânôrniarᴋâ, tamaungautilugolo uvaptingnut, tusartilutalo tâpsominga, piniarᴋovluta tâpsominga?

¹⁴ Oᴋauserle ᴋanitarnêpok, ᴋanerne, ômatingnelo, piniarᴋovlutit tâpsominga.

¹⁵ Takuit, uvlome sângnôrtipakka inôsek ajungitorlo, toᴋo ajortorlo;

¹⁶ Perᴋogapkit uvlome Nâlegak Gûdît nagligijaksarigangne, arvertartuksaugavit tâpsoma apᴋutauᴋojangine, maliktuksaugavit tâpsoma perᴋojanginik maligaksauᴋojanginiglo idluarsautiksanginiglo, inôᴋovlutit unuksiᴋovlutillo, Nâlegak Gûdît saimarsaiᴋovlugo ilingnik nuname aivigijarne pigijomavlugo.

¹⁷ Omatille ᴋeviarpat, tusaromangikuvillo, uerisartauguville, Gûdiblo assingit pâmaktervigigungne kivgartorlugillo;

¹⁸ Kigligiutjivigivapse uvlome nungutaulârapse, uvluse unuksitiniangilase nuname Jordanekut ikârdluse itervigijartortapsingne pigijomavlugo.

¹⁹ Kilaglo nunalo kigligiutjiᴋovakka ilipsingnut uvlome, inôsek toᴋolo, saimartitaunek ôminarsiᴋojaunerlo, pitigapkit sângnut; taimaimat inôsek anneriuk, inôᴋovlutit, igvit kinguvâtillo;

²⁰ Nâlegak Gûdît nagligijomavlugo, nippinga nâlagomavlugo, ungagijomavlugolo; tamanna inôgutigigangne, inutoᴋautigilugolo; ineᴋarᴋovlutit nuname Nâlekab angermariklune angerutigijangane atâtagijarnut, Abrahamut, Isaarmullo, Jakomullo, tunijomavlugo tâpkonunga.