Deuteronomy 3 - Labrador Inuttitut Heritage Bible

¹ Sanguvogut tagva, majorarpogullo apᴋut Basânemut sangmijok atorlugo; Ogiblo, Bâsanib ataningata, pagreariartorpâtigut, tâpsomalo inuᴋotingitalo tamaita, sorᴋsugomavluta Edreime.

² Nâlekablo oᴋautivânga: Erᴋsiginiarpago pit; tâmnalo inungillo nunangallo tunimagapkit aggangnut; piniarvigilârpallo sorlo Sihon, Amorikut ataningat, Hesboneme igloᴋalauᴋtok, piniarvigilaurangne.

³ Taimaglo Nâlekab Gûdipta Og, Bâsanib ataninga, inuᴋotingillo tamaita, tunivait aggaptingnut; annaudlarpavullo amiakoᴋarungnaimariᴋârtinago.

⁴ Neliutomelo tâpsomane iglugasaksoangit tamaita tiguvavut; iglugasaksoaᴋangilak tigulungitaptingnik tâpkonangat; iglugasaksuit 60, Argobib erᴋâ tamât, Ogib ataniovinga Bâsaneme.

⁵ Tâpkoa ilûnatik iglugasaksoangolauᴋput pinnailutaᴋarlutik ᴋarmanik poktojunik, upkoaᴋsoaniglo, seningajuniglo; iglugasangniglo ama ᴋarmaᴋangitunik unuktunik.

⁶ Tâpkoa asserormarilauᴋpavut, sorlo Sihon, Hesbonib ataninga, piniarvigilauraptigo, iglugasaksuit inuktalit ilûnaita asserormariklugit, arnat sorutsillo ilagilugit.

⁷ Nergjutille tamaita, iglugasaksuillo perᴋutingit, aᴋsârnigarivavut pigijomavlugit.

⁸ Neliutomelo tâpsomane nuna tigulauᴋpavut Amorikut atanîkita maggûk Jordanib ungatânêtuk agganginit, Arnonib naᴋsanganit ᴋakᴋak Hermon tikidlugo;

⁹ (Zidonemiut Hermon atserarpât Sirionemik, Amorikulle taivât Seniremik;)

¹⁰ Iglugasaksuit tamaita naternamêtut, Gileadelo ilûnât, Bâsanelo ilûnât, Salkalo Edreilo, iglugasaksuit Ogib ataniovingane Bâsaneme, tikidlugit.

¹¹ (Og, Bâsanib ataninga, kissime amiakotôvok inukpangnit; ahâk, iglinga kikiangovok; Rabamêngilâk, Amorikunê? Tallertut 9tut takitigivok, tallertullo sittamatut senimut, angutib tallinga ôktûtigilugo.)

¹² Nunalo tâmna tigulauᴋpavut taipsomane, pigijomavlugo; Aroeremit, Arnonib naᴋsangata kiglinganêtomit, nunablo Gileadib ᴋakᴋaliub abvanga, iglugasaksoangillo ilagilugit, tunivakka Rubenekunut Gadekunullo;

¹³ Gileadiblo amiakoa, Bâsanelo ilûnât, Ogib ataniovinga, tunivakka kinguvârêt Manassekut abvanginut; Argobib erᴋâ ilûnât, Bâsan ilûnât. (Tamanna inukpait nunanganik taijauvok.

¹⁴ Jairib, Manassib erningata, Argobib erᴋâ ilûnât, Gesuremiut Makatemiullo kiglingat tikidlugo, tiguvât; atinelo adsigilugo, Bâsanemêtut atserarpait Havot-jairemik, uvlome tikidlugo.)

¹⁵ Gileadelo tunivara Makiremut.

¹⁶ Rubenekullo Gadekullo tunitjivigivakka Gileademit Arnonib naᴋsanga tikidlugo, naᴋsab ᴋerᴋâ kigligilugo; kôk Jabbok, tamadja Ammonekut kiglingat, tikidlugo;

¹⁷ Naᴋsarsoarlo, Jordan kigligilugo, Kineretemit naᴋsarsûb imarbinga, imarbik tarriok, Pisgab atsangajângita atânêtok, tikidlugo.

¹⁸ Perkolaukpapse taipsomane, oᴋarlunga: Nâlekab Gûdipse nuna tamanna tunimavâ ilipsingnut, perᴋutauᴋovlugo; sakkolijarluse ikârtuksauvose ᴋatangutipse Israêlikut sângine, angutit sorᴋsukpaktut ilûnatik.

¹⁹ Nuliasele, ᴋitorngaselo, nergjuteᴋotiselo (ᴋaujimagama nergjuteᴋoteᴋadlarapse) paijuksauvut iglugasaksoaᴋotipsingne tunijamne ilpisingnut;

²⁰ Nâlekab ᴋatangutise merngoerserviksaᴋartilugit ilipsetut piᴋârtinago, tâpkoalo nunalo Nâlekab Gûdipse tunijanga tâpkonunga Jordanib ungatâne pigilugo piᴋârtinagit; taipsomanelo utilârpose ilûnase atunit pigijapsingnut tunimajamnut ilipsingnut.

²¹ Neliutomelo tâpsomane Josua perᴋolauᴋpara, oᴋarlunga: Ijîkik tautukpuk tamainik Nâlekab Gûdivît piniarninginik atanîngnut tâpkungnunga maggûngnut: taimailioromârivait ataniovit tamaita ikârvigijase.

²² Sivôragijaksaringilase, Nâlekab Gûdipse sorᴋsugutigijomârmase.

²³ Nâlegarlo ᴋenuvigilauᴋpara taipsomane, oᴋarlunga:

²⁴ Nâlegak Gûde, angijoksônit, aggatillo pitsartujut nelonaijalerpatit kivgarnut; kina Gûdeovâ ᴋilangmelônêt nunamelônêt piniarungnartok piniarnitit suliarijatillo pitsartudlartut adsilivlugît?

²⁵ Ikârlangatôk, nunalo piodlartok Jordanib ungatânêtok takolugo, ᴋakᴋatsiangojok, Libanonelo.

²⁶ Pitjutigilusele Nâlekab ningarvigivânga, tusângilângalo; Nâlekablo oᴋautivânga: Tamanna nâmaksijutigituinaruk; taijungnaisaruk uvamnut.

²⁷ Majorarit Pisgab ᴋânganut, takosarillo kangimut, taggamullo, seᴋinermullo, unungalo, ijingnullo takonârit; Jordan tâmna ikâraksarilunginangne.

²⁸ Josuale perᴋoleruk, maksuatilugolo, pitsartutilugolo; tâmna ikârtuksaungmat inuit ukkua sângine, tâpsomalo kingormgujitilârpait nunamik takojaksarnik.

²⁹ Kikarpogut tagva naᴋsarme Bet-peorib nelâne.