Deuteronomy 29 - Labrador Inuttitut Heritage Bible

¹ Tamadja angerᴋatigêngnerûb oᴋausertangit, Nâlekab Mosesemut âᴋiksoraksauᴋojangata Israêlib ᴋitornganginut nuname Moabeme, angerᴋatigêngnerûb âᴋiksortanga tâpkonunga Hôrebeme aipanga.

² Mosesiblo Israêlekut tamaita ᴋaiᴋovait, oᴋautilugillo: Takolauᴋpose tamainik Nâlekab piniarnerijanginik ijipse sângine nuname Egipteneme Faraomut, kivganginullo tamainut, nunanganullo tamânut;

³ Oktornerit angijut ijipse takojangit, nelunaikutallo tatamnartoksuillo ipkoa angijut;

⁴ Uvlomele tikidlugo Nâlekab tunitjivigingilâse ômamik missigijomik, ijiniglo tautuktunik, siutiniglo tusâjunik.

⁵ Jârillo 40 nâvlugit tesiorpapse inuᴋajuitome; annorâse atijase nutaungitôlilaungilat, kammise nutaungitôlilaungilat itikapsingne.

⁶ Niaᴋôjaᴋtolaungilase, imilaungilaselo vainemik imiksamiglônêt pitsartujomik; ᴋaujiᴋovluse uvangaugama Nâlegak Gûdise.

⁷ Nunamullo mattomunga tikigapse, Sihonib, Hesbonib ataningata, Ogiblo, Bâsanib ataningata, pagreartorpâtigut sorᴋsugvigiluta, sâlagivavullo;

⁸ Nunangallo tiguvavut tunilugollo kingormgutijaksautilugo Rubenekunut, Gadekunullo, Manassekullo kinguvârêngita abvanginut.

⁹ Taimaimat angerᴋatigêngnerûb oma oᴋausertangit malitsiarsigik piniarlugillo, silatojomik piniarᴋovluse piniarnipsingne tamaine.

¹⁰ Nangerpose ilûnase uvlome Nâlekab Gûdipse sângane; Angajoᴋârijase, kinguvârêᴋotise, erᴋarnartoᴋotise, aulatsijigijaselo, tagva Israêlekut angutingit ilûnatik,

¹¹ Sorusise, nuliaselo, tujormiarijallo tangmârvingnêtok, ᴋetjerijitit imeᴋtartitillo;

¹² Naᴋitsiᴋovlutit Nâlekab Gûdivît angerᴋatigêngnerijanganik nelautsimariktitanganik Nâlekab Gûdivît âᴋiksortanganik ilingnut uvlome;

¹³ Uvlome ingminut inuᴋutiksangortitsomagamitit, ilingnullo Gûdeojomavlune, sorlo nelautsimariktomik oᴋautilaungmatit, sorlolo nelautsimariktomik atâtagijatit Abraha, Isaarlo, Jakolo oᴋautilaungmagit.

¹⁴ Ilipsingnullo kissipsingnut naᴋitsilungilanga angerᴋatigêngnermik saglovêrutinermiglo ominga;

¹⁵ Tâpsomungale nangerᴋatigijaptingnut mâne uvlome Nâlekab Gûdipta sângane, ipsomungalo akunaptingnêlungitomut uvlome;

¹⁶ (Nelolunginapse nunaᴋalaurapta Egipteneme, ingergalauraptalo inôᴋatigêksuit ingergarvigijapse akorngagut;

¹⁷ Takolaurapselo maᴋojungnartulininginik Gûdingoanginiglo, ᴋejungnik ujarᴋaniglo, goldemik silberemiglo, tâpkonanêtunik;)

¹⁸ Akunapsingnêtoᴋarᴋonago angutimiglônêt, arnarmiglônêt, ᴋitorngarêngniglônêt, kinguvârêngniglônêt, ômatekut tunutomik Nâlekamik Gûdiptingnik, inôᴋatigêksuit tâpkoa Gûdingoangit kivgartoromavlugit; amâᴋarᴋonago akunapsingne mamaitoâlungmik tipilingmik, ᴋasilinartomiglo nutaijoktotaᴋartomik;

¹⁹ Taimaitorlo tusaraloarlune ôminarsiᴋojinerûb oma oᴋausertanginik, ômatimik pilluangoneraivok nangminerminik, oᴋarlune: Ulapirᴋsauteᴋarniarpunga, arvertaraloaruma ômatima ᴋepêserningane, imertudlarneᴋ ilautitsomavlugo imerungnermut;

²⁰ Nâlekab tagva issumagijungnaiviginiangilâ tâmna, Nâlekable ningarninga ilungertorningalo katsungaidlaromârpok angumut tâpsomunga, ôminarsiᴋojinerlo ilûnane aglangne ukkunane aglaksimajok tungalârpok tâpsomunga, Nâlekablo tâpsoma atinga pêjaromârpâ ᴋilaub atânit.

²¹ Nâlekablo ingmigolingatilârpâ idluitomut Israêlib kinguvârênginit tamainit, angerᴋatigêngnerûb aglangne ukkunane perᴋojaᴋtalingne aglaksimajut ôminarsiᴋojiningit maliklugit.

²² Kinguvângolârtullo, ᴋitorngase kingunipsingne inôleromârtut, takorngartarlo nunamit ungasidlartomit tikilârtok, takogunik nunab kapianarninganik, ᴋanimaserniglo Nâlekab tilijanginik ᴋanimadlarᴋovlugo, oᴋaromârput:

²³ Ivjunga ilûnane orᴋsorutiovok, tarriorlo, ikinerlo; karngaviolungilak, nuitajoᴋangilak, iviksuᴋarlônêt perorlungilak tagvane, sorlo Sodomatut Gomorratullo, Admatullo, Zeboimetullo, Nâlekab asserortangititut ningaumajârnermine ᴋaningaumajârnerminelo;

²⁴ Inôᴋatigêksuit ilûnatik oᴋaromârput: Suna pivlugo Nâlekab nuna tamanna taimailiorvigivaûk? Ningaumajârninga tamanna sôᴋ taimak ilungertortigivâ?

²⁵ Oᴋartoᴋaromârpok tagva: ᴋemailaungmatta Nâlekab, atâtagijangita Gûdingata, angerᴋatigêngnerijanganik naᴋitertanganik tâpkonunga tikiutilaungmagit nunamit Egiptenemit;

²⁶ Kivgartoriartolaungmattalo Gûdib assinginik, pâmaktervigilugillo, Gûdingoat ilitarilaungitatik, Gûdiblo tunilaungitangit tâpkonunga;

²⁷ Tamanna pivlugo Nâlekab ningarninga katsungaipok nunamut tamattomunga, tikitautipâlo ôminarsinernut tamainut aglangne ukkunane aglaksimajunut;

²⁸ Nâlekablo nusukpait nunamingnit ningarnerme, ᴋaningaumajârnermelo, ilungertornermelo angijome, egilugillo nunab tâpsoma assianut, sorlo uvlome ingmat.

²⁹ Nelonadlartut Nâlekamut Gûdiptingnut ilingavut; nelonaijartaujulle uvaptingnut ᴋitorngaptingnullo soraijuitomik ilingavut, nâmaksititsiᴋovluta perᴋojat makkoa oᴋausertanginik tamainik.