Deuteronomy 28 - Labrador Inuttitut Heritage Bible

¹ Katsungaidlutillo Nâlekab Gûdivît nipinga nâlagungne, ilungertorlutillo piniarungne perᴋojangit tamaita perᴋojijutigijakka ilingnut uvlome, Nâlekab Gûdivît pilluangotilârpâtit inôᴋatigêksoarnit nunamêtunit tamainit;

² Saimanartullo makkoa ilûnatik tikilârpâtit nelaudlutillo, Nâlekab Gûdivît nipinga nâlagungne.

³ Saimartitaulârpotit iglugasaksoarne, saimartitaulârpotillo perorsôvingme.

⁴ Saimartitaulârput timivît paungangit, nunavîllo paungangit, nergjuteᴋotivîllo paungangit, tuktuvaᴋotivît unuksiningit, saugakotivîllo piarangit.

⁵ Saimartitaulârpuᴋ amârgaujat akutsivîllo senaugarmik.

⁶ Saimartitaulârpotit iterangavit, saimartitaulârpotillo anijarangavit.

⁷ Nâlekab ômigijitit nikovitut ilingnut sâlagijautilârpait sângne; apᴋut atausek atorlugo anilârput ilingnut, apᴋutille sevenit atorlugit ᴋemâlârput ilingnit.

⁸ Nâlekab saimanartok ilingnôrᴋolârpâ ᴋematulivingne, tamainelo aggakpît isautigijangine; saimartilârpâtit nuname Nâlekab Gûdivît tunijangane ilingnut.

⁹ Nâlekab tungatilârpâtit inuᴋutauᴋovlutit ivlernartut nangminerminut, sorlo nelautsimariktomik angervigingmatit; Nâlekab Gûdivît perᴋojangit maligungne, arvertarlutillo apᴋutauᴋojangine.

¹⁰ Inôᴋatigêllo nunamêtut ilûnatik takolârput taijaugavit Nâlekab atinganut; erᴋsigijomârpâtillo.

¹¹ Nâlekablo piᴋangârtitsomârpâtit idluarᴋutaujunik, timivît paunganginik, nergjuteᴋotivît paunganginik, nunavîllo paunganginik, nuname, Nâlekab nelautsimariktomik angerutigilauᴋtangane atâtagijarnut, ilingnut tunijomavlugo.

¹² Nâlekab ilingnut makperomârpâ ᴋematuliviᴋotine ajungitok, ᴋilak, nunavît silaluksanga tunijomavlugo neliuningane; attartortitsilârpotillo inôᴋatigêksoarnut unuktunut, attarsilulângilatille.

¹³ Nâlekablo niaᴋôtilârpâtit, pamiongotiniangilâtille; ᴋalliolârpotillo, allionangilatille; Nâlekab Gûdivît perᴋojangit perᴋojijutigijakka ilingnut uvlome, nâlegungne, kamagitsiarlugillo, piniarlugillo.

¹⁴ Sangujuksaungilatillo oᴋautsit perᴋojakka ilingnut uvlome nelianillônêt, talerpingmullônêt saumingmullônêt, piniaromanagit, Gûdib assingit maligomavlugit kivgartorlugillo.

¹⁵ Nâlekable Gûdivît nipinga nâlagomangikungne, perᴋojangit maligaksauᴋojangillo tamaita, perᴋojijutigijakka ilingnut uvlome kamagitsiaromanagit piniaromanagillo; tagva ôminarsinerit makkoa ilûnatik tikilârpâtit nelaudlutillo.

¹⁶ Ominarsijaujomârpotit iglugasaksoarne, ôminarsijaujomârlutillo perorsêvingme.

¹⁷ Ominarsijaulârpuk amârgaujat akutsivîllo senaugarmik.

¹⁸ Ominarsijaulârput timivît paungangit, nunavîllo paungangit, tuktuvaᴋotivît unuksiningit, saugakotivîllo piarangit.

¹⁹ Ominarsijaulârpotit iterangavit, ôminarsijaulârpotillo anijarangavit.

²⁰ Nâlekab tiliklervigilârpâtit ôminarsijaunermik, sulinginermiglo, suartaunermiglo, tamaine aggakpît isautigijangine, asserortauᴋârtinak nungusârtauᴋârtinaglo; piniarnivît idluitoksôningit ᴋemaijutigijarnik uvamnik pivlugit.

²¹ Nâlekab nusilingnartok unangmiklertiniarpâ ilingnik, pêjartauᴋârtinak nunamit aivigijarnit pigijomavlugo.

²² Nâlekab annaulârpâtit uvinêrutinermut, olingnartoksoarmullo, kiaksoarmullo ikomaujârtotut, imairutinermullo, anoremullo toᴋonartomut, sapᴋarmullo; tâpkoalo unangmilârpâtit nungutauᴋârtinak.

²³ Kilaglo niaᴋovît ᴋolânêtok ᴋaᴋorleolârpok, nunalo atingnêtok kikiangolârpok.

²⁴ Nâlekab nunavît silaluksanga argjangortitsomârpâ saningortilugolo; ᴋilangmit katararomârpok ilingnut asserortauᴋârtinak.

²⁵ Nâlekab pikaluktautitsomârpâtit ômigijivit sângine; apᴋut atausek atorlugo anilârpotit tâpkonunga, apᴋulle sevenit atorlugit ᴋemâlârpotit tâpkonangat; egitauᴋatalârpotillo utertarᴋatartomik silaᴋsûb nâlegauvingine tamaine.

²⁶ Timîllo toᴋungajok nerᴋiksaujomârpok tingmianut ᴋilaub ikianganêtunut, nunablo nergjutinginut, ungumajuksaᴋarniangilarlo.

²⁷ Nâlekab annaulârpâtit ajuanut Egiptenib pinginut, marngneliâlungnullo, ᴋanerlungnermullo, ungilangnermullo, inûlijauveᴋangitunut.

²⁸ Nâlekab annaulârpâtit issumairutinermut, tautunginermullo, kapiasungnermullo ômatekut;

²⁹ Tapsiᴋâlârpotillo uvlub ᴋeterarningane, sorlo tautungitok tapsikârmat tâᴋtome, piloringniangilatillo apᴋotingne; oᴋumaiksartitautsainalârpotillo aᴋsârtautsainarlutillo, piuliklertuksaᴋarniangilarlo ilingnik.

³⁰ Nulianigomârpotit, assivîlle tutilârpâ, igloliolârpotit, iniginagole; vaineliksatalingmik perorsêviliolârpotit, paungangille atorniatsangilatit.

³¹ Tuktuvaᴋotît toᴋotaulârpok ijivît sângane, nerᴋingale nerriniangilat; siuteᴋortojokotît aᴋsârnigarijaulârpok takonârtilutit, utertitauniangilarlo ilingnut; saugakotitit tunijaulârput ômigijingnut, piulijiksarsiniangilatillo.

³² Ernitit panitillo tunijaujomârput inôᴋativît assinginut, ijise takonârtilugit, uvlotillo nâvlugit paingugidlalarangne ajulilârpotit; aggatillo pitsartuneᴋalulângilat.

³³ Nunavît paungangit, senajatillo tamaita inôᴋatigêksuit ilitaringitavît nungulârpait; oᴋumaiksartitautsainalârpotillo, semiktautsainarlutillo;

³⁴ Issumairutilârpotillo ijîkpît tautuktangit pivlugit.

³⁵ Nâlekab annaulârpâtit serᴋokut niokullo ajuarmut piungitomut inûlijauviᴋangitomut, itikavît alunginit niaᴋovît kabjinga tikidlugo.

³⁶ Nâlekab tikiutilârpâtit, igvit atanîllo ataningortilârtat ilingnut, inôᴋatigêksoarnut ilitarilaungitarnut, igvillônêt atâtagilauᴋtavîllônêt; tagvanelo kivgartulârpotit Gûdib assinginik, ᴋejungnik ujarᴋaniglo.

³⁷ Igvillo ᴋoaᴋsângajutiksangoromârpotit, alêᴋutiksangorlutillo, mitautiksangorlutillo inôᴋatigêksuit, Nâlekab tikiviotitangita ilingnik, akorngane.

³⁸ Karngasûtiksanik unuktunik âtsijomârpotit perorsêvingmut, ikitunigle katersoijomârlutit; piglertaujat nerrijomârmagit.

³⁹ Ilijilârpotit vaineliksanik, pairilugillo, vainetorniangilatille, paunganiglônêt katersoiniangilatit.

⁴⁰ Orᴋsuliksanik, napârtoᴋalârpotit nunavît kiglingine tamaine, mingoalulângilatille ilingnik orᴋsumut; paungangit orᴋsuliksat katagomârmatta.

⁴¹ Ernertâromârpotit panitâromârlutillo, pigilulângilatille; aularutijaujomârmatta.

⁴² Napârtoᴋotitit tamaita, nunavîllo paungangit, piglertaujat pigijomârpait.

⁴³ Takorngartak akunernêtok ᴋolingnut ᴋagverpalialârpok; igvillo aᴋᴋarpaliajomârpotit.

⁴⁴ Attartortilârpâtit, attartortilulângilalle; tâmna niaᴋolârpok, igvillo pamiongolârpotit.

⁴⁵ Ominarsinerillo tamakkoa ilûnatik tikilârpâtit, udlalârlutillo, angulutillo, nungutauᴋârtinak; Nâlekab Gûdivît nippinga nâlalaunginangne, tâpsoma perᴋojangit maligaksauᴋojangillo perᴋojijutigijangit ilingnik malilaunginangne;

⁴⁶ Nelunaikutaksaujomârpullo tataminiarutiksaujomârlutiglo ilingne kinguvângelo soraijuitomik;

⁴⁷ Nâlegak Gûdît kivgartulaunginangne erᴋiertornermut ômativîllo ᴋuviasungninganut, tamainik piᴋangâravit;

⁴⁸ Taimaimat ômigijitit, Nâlekab tililârtangit ilingnut, kivgartoraksarilârpatit, kângnerme, imerungnermelo, usinganermelo, ajoksarnermelo tamainik; nangmautarmiglo kikiangojomik ilijilârpok ᴋongasingnut, nungutsiᴋârtinago ilingnik.

⁴⁹ Nâlekab inôᴋatigêksuit tikiutilârpait ilingnut ungasidlartomit, nunab issuanit, sorlo nektoralik tingimat; inôᴋatigêksuit nelojarnik oᴋauselit;

⁵⁰ Inôᴋatigêksuit iktôjuitut, ilerasuguteᴋaromângitut inuᴋoartut najorninganik, anajagitaitullo inôsuktunik;

⁵¹ Nergjuteᴋotivîllo paungangit, nunavîllo paungangit nerrijomârpait, nungutauᴋârtinak; amiakoᴋartitsomângilâtillo senaugaksanik, vainemiglônêt, orᴋsumiglônêt, tuktuvaᴋotivîllônêt unuksininginik, saugakotivîllônêt piaranginik, nungutsiᴋârtinago ilingnik.

⁵² Ilumalârpâtillo itertarvingne tamaine, ᴋarmatit poktojut sôngojullo sungertutigijatit nunangne ilûnâne, imiᴋartinagit; itertarvingne tamaine nunangne ilûnâne Nâlekab tunijangane ilingnut, ilumalârpâtit.

⁵³ Timivîllo nangminerijavît paungangit nerrilârpatit, ernivît panivîllo, Nâlekab ilingnut tunijangita, uviningat; ilumajaunerme kapiasungnermelo ômigijivît kapiasûtiksautitangane ilingnut.

⁵⁴ Angutib maitûb akunapsingne, sunatuinângitûb, tâpsoma ijinga idluililârpok ᴋatangutiminut, sagvingmelo nulianganut, ᴋitorngamelo amiakunginut, sulle amiakojunut;

⁵⁵ Neliallônêt aitoromanago ᴋitorngame nerrilertame uviningata ilianganik, sunairutigame; ilumajaunerme kapiasungnermelo ômigijivît kapiasûtiksautitangane ilingnut itertarvingne tamaine.

⁵⁶ Arnablo maitûb sunatuinângitûblo akunapsingne, udjertorsôngojûb aglât itikame alua aktuaᴋonago nunamik maidlarnermut erᴋasudlarnermullo, tâpsoma ijinga idluililârpok sagvingme uinganut, ernerminullo paningminullo;

⁵⁷ Nutarârsungminullo itikame akornganit anisimajomut, ᴋitorngaminullo erniarijaminut; ajoksarpâdlarnermut tamainik nerrijomajomâramigit angigutjivlune; ilumajaunerme kapiasungnermelo ômigijivît kapiasûtiksautitangane ilingnut itertarvingne tamaine.

⁵⁸ Kamatsiaromangikuvit perᴋojat tamakkoa oᴋausertangit tamaita aglangne makkonane aglaksimajut piniaromavlugit, ilerasuᴋovlutit attermik ominga ânanaudlartomik ileranartomiglo, NALEKAMIK GÛDINGNIK.

⁵⁹ Tagva Nâlekab pagvigijatit, kingukâkpîllo pagvigijangit tatamnadlartitsomârpait, pagvinartut angijut sivitojullo, ᴋanimaserillo oᴋumaitut sivitojullo.

⁶⁰ Egiptenemiullo ᴋanimanerilauᴋtangit sivôragijatit tikitilârivait ama ilingnut; tâpkoalo unangmidlalârpâtit.

⁶¹ Taimaktauᴋ ᴋanimaserit tamaita, pagvinadlartullo tamaita aglangne ukkunane aglaksimangitut Nâlekab tikitilârpait ilingnut, nungutauᴋârtinak.

⁶² Ikitôvluselo amiakojomârpose, sivorngane ᴋilaub uvloriangititut unuktigilauraloarapse, Nâlekab Gûdivît nippinganik nâlalaunginapse.

⁶³ Imaitsomârporlo, sorlo Nâlekab ᴋuviasûtigilaungmase ajungitulivigijomavluse unuksititsomavluselo, taimak Nâlekab ᴋuviasûtigijomârpâse asseroromavluse nunguluselo; pêjartaujomârposelo nunamit aivigijapsingnit pigijomavlugo.

⁶⁴ Nâlekablo siamartitsomârpâtit inôᴋatigêksuit akorngane nunab issuanit aipânit nunab issuanut aipanganut; tagvanelo Gûdib assingit, igvit atâtagijavîllônêt ilitarilaungitase, kivgartulârpase, ᴋejuit ujargallo.

⁶⁵ Inôᴋatigêksuillo tâpkoa akorngane inilangaviksarsijomângilatit, itikavîllo alungit merngoerserviksarsijomângilat; Nâlekable tagvane tunitjivigijomârpâtit ômatemik sajuktomik, ijiniglo taututsiarungnaitunik, tarnemiglo kipitomik;

⁶⁶ Inôsîllo ᴋolarnalârpok sângne; erᴋsijomârpotillo unnuarme uvlôtilugolo, inôniksarlo ᴋolarutigilârpat;

⁶⁷ Uvlâkut oᴋaromârpotit: ᴋanoᴋtôk unnulerle! unnukullo oᴋaromârpotit: ᴋanoᴋtôk uvlângolerle! ômativit sivôraninga kapiasûtigijat pivlugo, ijikpîllo tautuᴋôrtangit takolârasugijangit pivlugit.

⁶⁸ Nâlekablo tikiutijomalerivâtit Egiptenemut umiaᴋsoakut, apᴋotikut oᴋautigilauᴋtapkut ilingnut: Takojungnairaksarivat; tagvanelo aulaijomajomârpose ilipsingnik ômigijipsingnut kivgaujomavluse, angutillo arnallo, pisiniaromajoᴋaromângilarle ilipsingnik.