Deuteronomy 27 - Labrador Inuttitut Heritage Bible

¹ Mosesiblo Israêliblo angajoᴋângita inuit perᴋovait, oᴋarlutik: Perᴋojat tamaita perᴋojijutigijakka ilipsingnut uvlome malitsiarsigik.

² Uvlormelo ikârvigijapsingne Jordanemik nunamut Nâlekab Gûdivît tunijanganut ilingnut, napatitsijuksauvotit ujarᴋanik angijunik, mingoarlugillo maggarmut;

³ Aglagvigijaksarivatillo perᴋojat tamakkoa oᴋausertanginik tamainik ikârêruvit; tikiutilerᴋovlutit nunamut Nâlekab Gûdîvit tunijanganut ilingnut, nunamut kôlingmut imungmik igapsaujârtullo orᴋsuanik, sorlo Nâlekab atâtagijavit Gûdingata angervigingmatit.

⁴ Jordanelo ikârêrupsiuk, ujarait makkoa, perᴋojijutigijakka ilipsingnut uvlome, napartitaksarivase, ᴋakᴋame Ebaleme, mingoaraksarivatillo maggarmut.

⁵ Tagvanelo tunerguserviliortuksauvotit Nâlekamut Gûdingnut, tunerguservingmik ujarᴋanit; kikiarmik atortuksaungilatit tâpkonunga.

⁶ Nâlekab Gûdivît tunergutiviksanga senajaksarivat ujarᴋanut iluitunut; tunergutiniglo ôtaksanik tunergusertuksauvotit tâpsomane Nâlekamut Gûdingnut;

⁷ Tunergutiksaniglo ᴋujaliutiksanik tunergusertuksauvotit, nerrilugillo; serrijuksauvotillo Nâlekab Gûdivît sângane.

⁸ Perᴋojallo makkoa oᴋausertangit tamaita aglagaksarivatit ânanâmik saᴋᴋijâtsiartomiglo ujarᴋanut.

⁹ Mosesiblo ajuᴋertuijullo Levikut Israêlekut ilûnaita oᴋâlavigivait, oᴋarlutik: Nipangerit nâlaklutillo, Israêl, uvlome tamattomane inuᴋutaulerpotit Nâlekamut Gûdingnut.

¹⁰ Taimaimat Nâlekab Gûdivît nipinga nâlegaksarivat, piniarlutillo perᴋojanginik maligaksaniglo perᴋojijutigijamnik ilingnut uvlome.

¹¹ Uvlormelo tâpsomane Mosesib inuit kaiblarpait, oᴋarlune:

¹² Ukkua nangertuksauvut ᴋakᴋame Gerisimeme inuit saimarsarlugit, Jordane iᴋârêrupsiuk: Simeone, Levilo, Judalo, Isassarelo, Josefelo, Benjaminelo;

¹³ Ukkualo nangertuksauvut ᴋakᴋame Ebaleme ominarsinartok oᴋâlautigilugo: Rubene, Gadelo, Asserelo, Sebulonelo, Danelo, Naftalilo.

¹⁴ Levikullo kiojuksauvut, angutillo ilûnaita Israêleme oᴋautilugit nippeᴋortojomut:

¹⁵ Ominarsile ulimartaumajomik kovimajomiglônêt inungoaliortok, Nâlekab maᴋojugijanganik, senatsiarsôngojûb aggangita senajanganik, napartilugolo ijersimajomut. Inuillo ilûnatik kiovlutik oᴋartuksauvut; Taimaile.

¹⁶ Ominarsile atâtaminik anânaminiglônêt oᴋarniluktok. Inuillo ilûnatik oᴋartuksauvut: Taimaile.

¹⁷ Ominarsile nûtsijok inôᴋatime nunangata kiglingata nelunaikutanganik. Inuillo ilûnatik oᴋartuksauvut: Taimaile.

¹⁸ Ominarsile tautungitomik tamartitsijok apᴋotigijangane. Inuillo ilûnatik oᴋartuksauvut; Taimaile.

¹⁹ Ominarsile mumiksijok takorngartab, iliarsublônêt, uigarnerublônêt idluarsartauniksanganik. Inuillo ilûnatik oᴋartuksauvut: Taimaile.

²⁰ Ominarsile tutingniktok atâtame nulianganik; atâtame ᴋepinga makpermago. Inuillo ilûnatik oᴋartuksauvut: Taimaile.

²¹ Ominarsile nergjutit nelianiglônêt nuliortok. Inuillo ilûnatik oᴋartuksauvut: Taimaile.

²² Ominarsile tutingniktok najaminik, atâtame paninganik, anânamelônêt paninganik. Inuillo ilûnatik oᴋartuksauvut: Taimaile.

²³ Ominarsile tutingniktok nuliame anânanganik. Inuillo ilûnatik oᴋartuksauvut: Taimaile.

²⁴ Ominarsile terliarsivlune pilukaijok inôᴋatiminik. Inuillo ilûnatik oᴋartuksauvut: Taimaile.

²⁵ Ominarsile piliusiamik tigusijok toᴋotsiᴋovlugo inungmik pasijaksaungitomik sumik. Inuillo ilûnatik oᴋartuksauvut: Taimaile.

²⁶ Ominarsile perᴋojat makkoa oᴋausertanginik malingitok piniarnagillo. Inuillo ilûnatik oᴋartuksauvut: Taimaile.