Deuteronomy 26 - Labrador Inuttitut Heritage Bible

¹ Nunamut Nâlekab Gûdivît tunijanganut kingormgutijaksautitanganut ilingnut tikisimaguvit, pigigungnelo, tagvanelo ineᴋaleruvit;

² Tigusijuksauvotit nunavît perutsiangita pijariorutit ilanginik angergautijarnik nunamit Nâlekab Gûdivît tunijanganit ilingnut; ilijaksarivatillo amârgaujarmut, ailutillo inemut Nâlekab Gûdivît annerijanganut atterminut iniksauᴋovlugo.

³ Ajuᴋertuijorlo uvlune tâpkonane tagvanêlârtok aivigijaksarivat oᴋautilugolo: Kigligiksarpunga uvlome Nâlekamut Gûdingnut tikisimagama nunamut Nâlekab angerutigilauᴋtanganut atâtagijaptingnut tunijomavlugo uvaptingnut.

⁴ Ajuᴋertuijûblo amârgaujaᴋ tigujaksarivâ aggangnit ililugolo Nâlekab Gûdivît tunerguservingata sânganut.

⁵ Kiovlutillo oᴋartuksauvotit Nâlekab Gûdivît sângane: Atâtaga Siriamiongolauᴋpok nuktartok, atersârporlo Egiptenemut, tagvanelo tujormiangovok, ikitunik ilaᴋarlune; tagvanele inôᴋatigêksoangolerpok angijut, pitsartujut, unuktôvlutiglo.

⁶ Egiptenemiulle pikalukpâtigut, oᴋumaiksartilutalo, oᴋumaitomiglo suliaᴋartipâtigut;

⁷ ᴋaigarsukpogullo Nâlekamut, atâptata Gûdinganut, Nâlekablo nippivut tusarpâ, takovlunelo kapiasungniptingnik siorniorniptingniglo, oᴋumaiksartitauniptingniglo;

⁸ Nâlekablo anitipâtigut Egiptenemit aggangnut pitsartudlartunut, talermullo issamijomut, ᴋoaᴋsârnartunullo angijoksoarnut, nelunaikutanullo, tatamnartunullo;

⁹ Tikiutivâtigullo nunamut mattomunga, nunalo tamanna tunivâ uvaptingnut, nuna imungmik igupsaujârtullo orᴋsuanik kôlik.

¹⁰ Mânalo, ahâk, nunab perutsiangita pijariorutingit, igvit, Nâlegak, tunijatit uvamnut, ᴋaipakka. Ilijaksarivatillo Nâlekab Gûdivît sânganut, pâmangalutillo Nâlekab Gûdivît sângane.

¹¹ Ajungitullo tamaita Nâlekab Gûdivît tunijangit ilingnut iglomioᴋatingnullo serrijutigijaksarivatit, igvit, Levitiojorlo, tujormiarlo akunapsingnêtok.

¹² Katersortatit tamaita tallimaujortôlijarêrungne jârit pingajuane, tagva jâreme tallimaujortôlêviksaujome, tallimaujortoat tunijaksarivat Levikunut, tujormiarnullo, iliarsungnullo, uigarnernullo, itertarvingne nerrijungnarᴋovlugit aᴋeartorlutiglo;

¹³ Nâlekablo Gûdivît sângane oᴋartuksauvotit: Ivsornaititaksat pêjarpakka iglumnit, tunivakkalo Levikunut, tujormiarnullo, iliarsungnullo, uigarnernullo, perᴋojatit perᴋojijutigijatit tamaita maliklugit; perᴋojavît neliallônêt tapagilungilakka, puigungilakkalônêt;

¹⁴ Nerᴋlingonimne nerrilungilanga ilanginik, ilangerlungilakkalônêt idluitulivlunga, ilangillônêt tuningilakka toᴋungajunut; Nâlekab Gûdima nipinga nâlekpara, piniarpunga perᴋojatit tamaita uvamnut maliklugit.

¹⁵ Inigijarnit ivsornaitomit, ᴋilangmit, takosalaurit, saimarsarkillo inuᴋotitit Israêlikut, nunalo tunijat uvaptingnut, sorlo saglungimariklutit oᴋalauravit atâtagijaptingnut, nuna kôᴋartok imungmik igupsaujârtullo orᴋsuanik.

¹⁶ Uvlorme mattomane Nâlekab Gûdivît perᴋovâtit, piniarᴋovlutit perᴋojanik maligaksauᴋojarnik ukkuninga; taimaimat maligaksarivatit piniarlugillo ômatingnut tamânut tarningnullo tamânut.

¹⁷ Nâlegak kigligiutjivigivat uvlome Gûdigijomagangne, arvertartuksaugavillo tâpsoma apᴋutauᴋojangine, tâpsoma perᴋojangit, maligaksauᴋojangillo, ilusioᴋojangillo maligomavlugit, nippingalo nâlegomavlugo;

¹⁸ Nâlekablo uvlome kigligiutjivigivâtit inuᴋotigijomagamitit nangminerijomavlutit, sorlo angervigilaungmatit, malitsiartuksaugavillo tâpsoma perᴋojanginik tamainik;

¹⁹ Anginersautitsomagamitillo inôᴋatigêksoarnit pingortitaminit tamainit nertortaunerme unipkautaunermelo opigijaunermelo; inôᴋatigêngoᴋovlutit ivsornaitut Nâlekamut Gûdingnut, sorlo oᴋalaurame.