Deuteronomy 25 - Labrador Inuttitut Heritage Bible

¹ Akkerartutijokarpat inungne, idluarsaivingmullo pikpatta idluarsartaujomavlutik; idluartok idluarsititaujuksauvok, idluangitorlo pidlartaujuksauvok;

² Idluangitorlo pidlaraksaukpat, idluarsaijûb pâmangatitaksarivâ issaᴋajauᴋovlugo kêname sângane, idluitulisimaninga naipertorlugo, issaᴋanerit kitilugit.

³ Issaᴋanernik 40nik sugiarungnarpâ, ununersautinagille; sugautikpago, ununersaniglo issaᴋanernit makkonangat sugiarlugo, ᴋatangutît naggonartinajarpâ ijîngnut.

⁴ Tuktuvak tukkartortok senaugaksanik ivjarusijaraksarilungilat.

⁵ ᴋatangutiget piᴋatigêklutik ineᴋarpatta, ilangallo inôjungnaipat erneᴋarane, inôjungnaitûb nuliarilauᴋtanga uiniktuksaungilak takorngartarmik ᴋaningitaminêtomik; uigilauᴋtangatale ᴋatangutingata itervigijaksarivâ, ingminullo pitilugo nuliarijaksarivâ, piniarvigilugolo piniaraksarijanganik.

⁶ Ernerûblo sivorliûb ernerijangata ᴋatangutingata toᴋojûb atinga kingormgutijaksarivâ, atinga pêrᴋonago Israêlemit.

⁷ Angutible tâpsoma idluaringipago sakkine nuliarilugo, tagva sakkia majorartuksauvok itertarvingmut angajoᴋaujunut, oᴋarlunelo: Ukkoara ᴋunuvok kinguvâksarsivlune ᴋatangutime atitsiarijanganik Israêleme, piniarvigijomangilângalo ukkoangojûb piniaraksarijanganik.

⁸ Tagva iglugasaksoarᴋotime angajoᴋângita ᴋaiᴋojaksarivât oᴋakᴋatigilugolo; tâmnale nangerpat oᴋarlunelo: ᴋuviasuteᴋangilanga nuliarilugo;

⁹ Sakkiata aivigijaksarivâ, angajoᴋât najûtitilugit itigagutîkitalo iglua pêraksarivâ itiganginit ᴋesserlugolo kênakut, kiolugolo oᴋarlune: Taimailiorviojuksauvok angut ᴋatangutime inuᴋutanginik inersijomangitok.

¹⁰ Israêlemelo tâmna atteruseᴋartitaujuksauvok kammilâtomik.

¹¹ Angutik maggûk pârpanik, aipangatalo nulianga tikipat uine piulijomavlugo anauniktûb tâpsominga agganginit, issakpallo tigulugolo nelekângagut;

¹² Tagva aggangit nakagaksarivatit, ijikpîllo ilapjugijaksaringilâ.

¹³ Oᴋumailutakartuksaungilatit nelautsijigêngitunik pôngne, angiluartomiglo mikiluartomiglo.

¹⁴ Oktûtinik nelautsijigêngitunik iglungnêtokartuksaungilatit, angiluartomiglo mikiluartomiglo.

¹⁵ Oᴋumailutaᴋartuksauvotit nâmaktomik idluartomiglo; oktûteᴋartuksauvotit nâmaktomik idluartomiglo; uvlutit unuktôᴋovlugit nuname Nâlekab Gûdivît tunijangane ilingnut.

¹⁶ Ilûnatik taimailiortut, ilûnatik idluangitomik piniartut maᴋojungnarmatta Nâlekamut Gûdingnut.

¹⁷ Erkailerit Amalekib piniarnerijanginik ilingnut apᴋome, Egiptenemit aularapse;

¹⁸ Pâlaungmatit apᴋome, kingorlerijatillo sorᴋsulaungmagit, ilûnaita sukkôjut, nukingerutigavit merngortoravillo; Gûdelo sivôragingilât.

¹⁹ Taimaimat Nâlekab Gûdivît inilangatikpatit ômigijingnit avatingnêtunit tamainit, nuname Nâlekab Gûdivît tunijangane kingormgutijaksautitangane ilingnut, Amalekut erᴋaumajauningat pêjaraksarivat ᴋilaub atânit; puigorniarnak.