Deuteronomy 24 - Labrador Inuttitut Heritage Bible

¹ Angutib nuliaksarsigune nuliarilugolo, tâmnalo saimaneᴋsingipat tâpsoma ijîgingne, sumik nâmagilungitaminik nagvârviginamiuk, aglaktuksauvok aglangnik avitsitiksanik, tunilugillo tâpsoma agganginut, aulartilugolo iglominit.

² Anisimakpallo tâpsoma iglunganit, nuliarijaugiartorungnarpok uigilauᴋtame assianut.

³ Uingatalo tâpsoma kingorliub ômigikpago, aglangniglo avitsitiksanik aglakpat tâpsomunga, tunilugillo tâpsoma agganginut, aulartilugolo iglominit, uingalônêt kingorlek tâpsominga nuliaᴋartok toᴋopat;

⁴ Tagva uigilauᴋtangata sivorliub, aulartitsilauᴋtûb tâpsominga, tigujaksarilungilâ nuliarijomangmilugo, naggonartitauᴋârtilugo; tamanna maᴋojungnarmat Nâlekab sângane; nunalo Nâlekab Gûdivît tunijanga ilingnut kingormgutijaksautilugo ivsornartitaksarilungilat ajortulinermut.

⁵ Angutib nuliarniᴋammertûb sorᴋsuktuksat katimgajut aniᴋatigijaksaringilait unatarnermut, pagvisartaujuksaungilarlo sumut; agviartaunanele angergarmêtuksauvok jâre atausek nâvlugo nuliane tigujane ᴋuviasuᴋatigilugo.

⁶ Serᴋalitsivingmik serᴋalitsiviublônêt ujaraᴋtanganik ᴋaᴋlermik tigusijuksaungilatit nelunaikutarijomavlugo tâpsoma akkiliksairutigijomajanganik; taimailiortûb inûb inôsinga sorlo tigunajarmago nelunaikutarilugo tâpsoma akkiliksairutigijomajanganik.

⁷ Inuk naipitaukpat ᴋatangutime ilanganik tigliklune, Israêlib ᴋitorngangita ilanganik; kivgatullo perᴋutigijaujotut piniarvigilugo aulailugolônêt; tigliktok tâmna toᴋotaujuksauvok; taimaglo idluinek pêjarniarpat akunernit.

⁸ ᴋanimaserme kalaᴋadlarnerme udjertoritse kamatsiarluselo piniarᴋovluse tamainik ajuᴋertuijut Levikut ajuᴋertutigijangit ilipsingnik maliklugit; sorlo tâpkoa perᴋolaurapkit, taimailiortuksauvose.

⁹ Erᴋailerit Nâlekab Gûdivît ᴋanok Mirijame piniarvigilaungmago apᴋome Egiptenemit aularapse.

¹⁰ Inoᴋatit sumik tauᴋteliksamik tunitjivigigungne, iglunganut itertuksaungilatit tigusijomavlutit akkiliksainermik nelunaikutanganik.

¹¹ Silatâne nangertuksauvotit, angutiblo tauᴋteliksarsijûb akkiliksaijomanerminik nelunaikutanga anitaksarivâ ilingnut.

¹² Aklujôkpalle, inilagiartortuksaungilatit tâpsoma aumitinga akkiliksaijomanermik nelunaikutanga najortigilugo;

¹³ Nelunaikutarijanga aumitinga ᴋepingalo utertitaksarivat tâpsomunga seᴋinek nipilerᴋârtinago, ulikopalijarlune inilagungnarᴋovlugo, pilloriktitauᴋojiᴋovlugolo ilingnik; tamanna idluarᴋutiginiarpat Nâlekab Gûdivît sângane.

¹⁴ Kivgartortok aklujok ajoksartorlo oᴋumaiksartitaksarilungilat, ᴋatangutingnut ilingamangât takorngartaumangâllônêt nunavît itertarvingita ilangane;

¹⁵ Uvlorme kivgartorviane tunitjivigijaksarivat akkiliutiksarsiarijaminik, seᴋinek nipiᴋârtinago; aklujôngmat, ômatingatalo katjârivâ; pivlutit ᴋaigarsuᴋonago Nâlekamut, tavalo idluituliviginajarpat.

¹⁶ Atâtat toᴋotaujuksaungilat ᴋitorngatik pivlugit, ᴋitorngallo toᴋotaujuksaungilat atâtatik pivlugit; ilûnatik idluinitik nangminerijatik pivlugit toᴋotaujuksauvut.

¹⁷ Takorngartab iliarsûblônêt idluarsartauniksanga mumigaksarilungilat; uigarnerublo annorânga tigujaksarilungilat nelunaikutaksautilugo.

¹⁸ Erᴋaijuksauvotille kivgaulauravit Egipteneme, Nâlekablo Gûdivît piulilaungmatit tagvangat; tamanna pivlugo perᴋovagit taimailiorᴋonak.

¹⁹ Kibluiguvit perotsianik perorsêvingne, ᴋepitaniglo atautsinik puigoruvit perorsêvingme, utertuksaungilatit aijomavlugit; pijaksaujuksauvulle takorngartamut, iliarsungmullo, uigarnermullo; Nâlegak Gûdît saimarsaiᴋovlugo ilingnik aggakpît suliarijangine tamaine.

²⁰ Napartoᴋotit orᴋsuksatalik aulatiᴋattarungne katersoivigivlugo, akerungit aipanganik nunivagiarvigijaksaringilatit; takorngartamut, iliarsungmullo, uigarnermullo ilingajuksauvut.

²¹ Vaineliksatalîllo perorsêvingne katersoivigigungne, tagva piksarsiorvigipsâraksaringilat; takorngartamut, iliarsungmullo, uigarnermullo ilingajuksauvut.

²² Erᴋaijuksauvotillo kivgaulauravit nuname Egpteneme; tamanna pivlugo perᴋovagit taimailiorᴋovlutit.