Deuteronomy 23 - Labrador Inuttitut Heritage Bible

¹ Kanoetokartok igjumine, igjuerutisimajorlônêt pijuksaungilaᴋ Nâlekab ilagêktoᴋotinganut.

² Tamangainagak pijuksaungilak Nâlekab ilagêktoᴋotinganut; taimaitûb kinguvârêngita kingolerêngita tallimaujortungit tikidlugit aglât pijuksaulungilat Nâlekab ilagêktoᴋotinganut.

³ Ammonikut Moabekullo pijuksaulungilat Nâlekab ilagêktoᴋotinganut; tâpkoa kinguvârêngita kingolerêngita tallimaujortungit tikidlugit aglât pijuksaulungilat Nâlekab ilagêktoᴋotinganut soᴋosingitomik;

⁴ Sagvaivigijartolaungimase nerᴋiksamik imiksamiglo apᴋome, Egiptenemit anilaurapse; Bâlaamelo, Beorib erninga, Petoremiok Mesopotâmiamêtome, akkilerlaungmatsuk ôminarsijauᴋojiᴋovlugo ilipsingnik.

⁵ Nâlekable Gûdivît Bâlaam tusaromangilâ, Nâlekable Gûdivît ôminarsijauᴋojinek mumikpâ saimartitaujutiksangordlugo ilingnut, Nâlekab Gûdivît nagligidlarmatit.

⁶ Ulapirᴋsautiksanginik idluarᴋutiksanginiglônêt ᴋenerniangilatit uvlutit tamaita nâvlugit soraingitomik.

⁷ Edomekut maᴋojugijaksaringilatit, ᴋatangutigigangne; Egiptenemiut maᴋojugijaksaringilatit, takorngartaulauravit nunangane.

⁸ Kinguvârêngita kingorlerêt pingajuingita ᴋitorngangit tâpkonangat inûlertut Nâlekab ilagêktoᴋotinganut pijungnalârput.

⁹ Anileruvit ômigijingnut tangmâriartorlutit, ajortut tamaita uloriagijaksarivatit.

¹⁰ Ilingne anguteᴋarpat unnuarme piniarneᴋarnerminit ivsornartitaumajomik, tâmna tangmârviub avatânut aijuksauvok, itertuksaungilak tangmârvingmut;

¹¹ Unnulerpalle imermut ubvartuksauvok nangminerminik; seᴋinerlo nipisimalerpat tangmârvingmut itertuksauvok.

¹² Iniksaᴋartuksauvotillo tangmârviub avatâne alivariarviksarnik;

¹³ Poagiteᴋartuksauvotillo sakkovît akorngane; alivarvingnelo aᴋᴋoviguvit, itersaliortuksauvotit, sangulutillo ilingnit pijok saujaksarivat;

¹⁴ Nâlegak Gûdît arvertarmat tangmârvingme, piulijomavlutit, ômigijitillo sâlautitsomavlugit sivunerne; taimaimat tangmârvît ivsornaituksauvok, sumik salumaitomik takoᴋonago ilingne, allarᴋonagolo ilingnit.

¹⁵ Kivgak ᴋemâmajok angajoᴋâminit ilingnut, pititaksarilungilat angajoᴋâminut;

¹⁶ Ilingnêtuksauvok, akunerne, ineme annerijamine itertarvikpît ilangata iluane, nâmagijamine; oᴋumaiksartitaksaringilat.

¹⁷ Anguniarpaktokartuksaungilak Israêlekut paningita ilanganik, anguniaruteᴋartuksaungilarlo Israêlekut erningita ilanganik.

¹⁸ Anguniarpaktûb akkiliusiarijanga ilokeudlarnerublônêt akkinga âtaksarilungilat Nâlekab Gûdivît iglunganut sumiglônêt angeruteᴋaraloarmangârpit; tâpkoa tamarmik maᴋojungnarmanik Nâlekamut Gûdingnut.

¹⁹ ᴋatangutit attartortitaksarilungilat atauteᴋartilugo; atautemik kênaujarmut, atautemik nerᴋikasmut, atautemiglônêt sunaugaloartomut attartugaujomut atautemut;

²⁰ Tujormiaᴋ attartortitsungnaraloarpat atautemut; ᴋatangutîlle attartortitaksaringilat atautemut; Nâlegak Gûdît saimarsaiᴋovlugo ilingnik tamaine aggakpît issagutigijangine nuname aivigijarne pigijomavlugo.

²¹ Nâlekamut Gûdingnut unertûmik unertuiguvit muludlartuksaungilatit nâmaksitilugo; Nâlekab Gûdivît aperᴋutigijomârmago ilingnut; ajornionajarporlo ilingnut.

²² Unertuitailikleruville ajornioniangilak ilingnut.

²³ Kangasinângnit anijut kamagijaksarivatit piniarlugillo; unertuinît Nâlekamut Gûdingnut maliklugo, tunergutimik pijârijomik angerutigijarnik ᴋanernut.

²⁴ Inoᴋativit vaineliksatalinganut tikikuvit, paunganik vainiksanik nerrijungnarpotit issumangnik aᴋᴋeartorlutit; pôᴋsijuksaungilatille pôngnut.

²⁵ Inoᴋativit senaugaksanginut perortunut tikikuvit, sulugainernik nusuksijungnarpotit aggangnut; iviksukatautemigle aulatjaijuksaungilatit inôᴋativît senaugaksanginut perortunut.