Deuteronomy 22 - Labrador Inuttitut Heritage Bible

¹ ᴋatangutivit tuktuvaᴋotinga saugaᴋotingalônêt tamarsimajok takojaksarilungilat angigutjutigilugolo; âtaksarivalle ᴋatangutingnut.

² ᴋatangutillo ᴋanilungipat ilingnut, ilitarilungikungnelônêt, tagva angergautijaksarivat iglungnut, ilingnêtuksauvorlo, ᴋatangutingnut ᴋenertauᴋârtinago; tagva tunijaksarivat tâpsomunga.

³ Siutiᴋortojokotinga taimailiorutigijaksarivat; annorângatauk taimailiorutigijaksarivat; ᴋatangutivît perᴋutinga sunaugaloarmangât, tâpsoma assiojijanga igvillo nagvârtat, taimailiorutigijaksarivat; angigutjutigijaksarilungilat.

⁴ ᴋatangutivit siutiᴋortojoᴋotinga tuktuvaᴋotingalônêt oggosimajok apᴋosinerme takojaksarilungilat, alangoarlutillo tâpsomangat; aiparilugo nikovititaksarivat.

⁵ Arnak annorâlijartuksaungilak angutisiutinik, angutiblo arnab pingit atijaksaringilait; taimailiortok maᴋojungnarpok Nâlekamut Gûdingnut.

⁶ Tingmiab auktortanganik takoguvit ingergartilutit, napârtomêmangât nunatuinarmêmangâllônêt, piaraᴋtalingmik mannilingmiglônêt, anânangalo piarᴋaminik manningminiglônêt ivagune, tagva anânak tigujaksarilungilat piarᴋat ilagilugit;

⁷ Anânak tingititaksarivat piaraille tigujungnarpatit ilingnut; ᴋanoengitsiarᴋovlutit uvlutillo unuksiᴋovlugit.

⁸ Nutamik iglolioruvit iglûb ᴋânga avalulioraksarivat, igluit pasijaksauᴋonago aungmik kataktokarpat tagvangat.

⁹ Perorsêvît vaineliksatalik karngasoivigijaksarilungilat karngasûtiksânik magguinik, paungat ilûnatik karngasûtinit pijut vaineliksatalingnillo pijut asserortauᴋonagit.

¹⁰ Nunat makperteraksarilungilat tuktuvak siutiᴋortojorlo atautsikut uniartilugik makperterautimik.

¹¹ Annorâlijartuksaungilatit saugat merᴋunginit ivaluksajanillo katilugik senamajomik.

¹² Nivingasulanik senajuksauvotit ulikpît ulijutigijavît terreᴋungine sitamane.

¹³ Angut nuliarsimakpat, nulianelo itervigisimavlugo ômigilerpago,

¹⁴ Kangunartomiglo pasilerpago ajortomik tusaumajungortilugo, oᴋarlune: Arnak una tigulauraloarpara, najorapkolo malugivara niviarsiangolungimat;

¹⁵ Tagva arnab tâpsoma inôsuktûb atâtangata anângatalo arnab tâpsoma niviarsiangoningata nelunaikutanga tigujaksarivâk anitilugolo itertarvingmut iglugasaksuit angajoᴋânginut;

¹⁶ Arnablo inôsuktûb atâtangata angajoᴋât oᴋautijaksarivait: Paniga tunilauᴋpara angutimut omunga nuliarijauᴋovlugo, tâpsomalo ômigilerpâ;

¹⁷ Ahâglo, kangunartunik pasilerpâ, oᴋarlune: Paningne nagvâlungilanga niviarsiangoningata nelunaikutanganik; makkoale nelonaijaivut paningma niviarsiangoninganik. Atisimalauᴋtangalo issivitaksarivâk iglugasaksuit Angajoᴋângita sânganut.

¹⁸ Iglugasaksuillo angajoᴋângita angut tigujaksarivât pidlarlugolo;

¹⁹ Akkilêtitaksarivâllo sekelenik silberemik 100nik, tunilugillo arnab inôsuktûb atâtanganut; niviarsiak Israêleme kangunartomik tusaumajungortingmago; tâmnalo nuliarijaksarivâ; avitaksarilungilâ uvlune nâvlugit.

²⁰ Oᴋauserle imna mikseᴋârtôkpat, niviarsiangonerûb nelunaikutanga naipitaungimat arnarme tâpsomane;

²¹ Tagva arnak tâmna âtaksarivât atâtangata iglungata upkoangata sivurânut, iglugasaksuillo angutingita miloraksarivât ujarᴋanut toᴋolugo; silainartomik piniarmat Israêleme, assiniarsimavlune atâtame iglungane; taimaglo idluinek pêjarniarpat akunernit.

²² Angut naipitaukpat arnak uilik tutiklugo, tagva tâpkoa tamarmik toᴋojuksauvuk, angut tutingniktok arnarmik, arnarlotauk; taimaglo idluinek pêjarniarpat Israêlemit.

²³ Arnak uigasuk angersimakpat angutemut, angutiblo iglugasaksoarnêtut ilangata naipipago tutiklugolo;

²⁴ Tagva tamarmik âtaksarivakik iglugasaksuit tâpkoa itertarvinganut ujarᴋanullo milorlugik toᴋolugik; uigasuk ᴋaggûdlalaungimat iglugasaksoarnêgaloarlune; angullo inôᴋatime nuliaksanga naggonartingmago; taimaglo idluinek pêjarniarpat akunernit.

²⁵ Angutible uigasuk kimut angersimajok naipipago nunatuinarme, aksorôtilugolo tutikpago; tagva angut tutiktinga kissime toᴋojuksauvok;

²⁶ Uigasugle ᴋanorlônêt piniarvigijaksaringilat; uigasuk toᴋojutiksamik idluitulilaungimat; tamanna ilingangmat sorlo inûb inôᴋatine makivigiguniuk toᴋolugolo;

²⁷ Naipilaungmago nunatuinarme; uigasuk angersimajok ᴋaggudlalauraloarpok, piuliklertuksaᴋangilarle tâpsominga.

²⁸ Angutib arnak uigasuk angersimangitok kimut naipiguniuk, aksorôtilugolo tutiklugolo, ᴋaujijaunguniglo;

²⁹ Tagva angutib tutiktingata uigasûb atâtanga tunitjivigijaksarivâ silberemik sekelenik 50nik, nuliarijaksarivâlo naggonartilauramiuk; uvlune nâvlugit avitaksarilungilâ.

³⁰ Angutib atâtame nulianga nuliarijaksarilungilâ, atâtamelo ᴋipinganik makpersijuksaungilak.