Deuteronomy 21 - Labrador Inuttitut Heritage Bible

¹ Nuname Nâlekab Gûdivît tunijangane ilingnut perᴋutauᴋovlugo, tokungajok nagvârtaukpat nelangavlune perorsêvingme, ᴋaujijaungipallo kia toᴋomangâgo;

² Angajoᴋâtit idluarsaijokotitillo anijuksauvut ôktorlutiglo iglugasaksoarnut toᴋungajûb avatânêtunut;

³ Iglugasaksuillo ᴋaninerpât toᴋungajomut angajokângit tigusijuksauvut noggavinermik tuktuvangnit, suliaᴋarnermut atulauᴋsimangitomik, nangmautelijarlunelo unialauᴋsimangitomik;

⁴ Iglugasaksuillo angajoᴋângita noggavineᴋ âtaksarivât naᴋsarmut kôlingmut, makpertertaungitomut karngasoiviongitomullo, tagvanelo naᴋsarme noggavineᴋ pikkoijarlugo;

⁵ Ajuᴋertuijullo Levib erningit tagvungartuksauvut, tâpkoa Nâlekab Gûdivît anneringmagit kivgartorᴋovlugit tâpsominga, saimarsaiᴋovlugillo Nâlekab atingane; tâpkoalo oᴋausingit maliklugit akkerartorutiksat tamaita kiomajutijutiksallo tamaita âᴋiktaujuksauvut;

⁶ Iglugasaksuillo tâpkoa toᴋungajomut ᴋaninerpât Angajoᴋângita aggatik ubvaraksarivait noggaviniub naᴋsarme pikkoijartaumajûb ᴋolâne;

⁷ Kigligiutsijuksauvullo oᴋarlutik: Aggapta auk tâmna kovilaungilât, ijiptalônêt takolaungilât.

⁸ Issumagijungnaivigilaukittôᴋ, Nâlegak, inuᴋotitit Israêlekut, auglo pasijaksaungitok pitiniarnagotôᴋ, inuᴋotingnut Israêlekunut. Auglo issumagijungnaitauniarpok tâpkonunga.

⁹ Taimaglo auk pasijaksaungitok pêjartauniarpok akunernit, piniaruvit idluarijaujomik Nâlekab ijîkita sângangne.

¹⁰ Omigijitit unatariartorungne, Nâlekablo Gûdivît tunikpagit aggangnut, tigujatillo aularutigungne,

¹¹ Tigujaujullo akorngane takoguvit arnarmik taututsiariktomik, katjârigungnelo nuliarijomavlugo;

¹² Angergautijaksarivat iglungnut, tâpsomalo niaᴋone salijaksarivâ kukinelo kipilugit;

¹³ Annorânelo tigujaunermine atortane pêraksarivait, noᴋangalunelo iglungne atâtane anânanelo ᴋeagijaksarivak takᴋek nâvlugo; kingornganelo itervigijaksarivat katititauᴋatigilugolo, nuliarilugolo.

¹⁴ Idluarijungnairungnele, tagva pijomajaminut aulartitaksarivat; kênaujarmulle aulaijaksarilungilat, kivgatut perᴋutaujotut iliorvigijaksaringilat, naggonartilaurangne.

¹⁵ Angut maggungnik nuliaᴋarune, aipâ nagligijaujok aipangalo ômigijaujok, ᴋitorngivigigunigiglo tamarmik nagligijaujok ômigijaujorlo; ômigijaujûblo erninga erniangoᴋârtôkpat:

¹⁶ Tagva neliutikpat pigijane kingormgutijautingmagit ernerminut, nagligijaujûb erninga erniangoᴋârtungortitaksarilungilâ ômigijaujûb erninga erniangoᴋârtok simerlugo;

¹⁷ Erniangoᴋârtorle, ômigijaujûb erninga, angârutigijaksarivâ, tunitjivigilugolo avgoângnik maggûngnik perᴋutiminit; tâmna sivorlerpaungmat nukinganit; tâpsomalo erniangoᴋârtûb idlugutarijangit pigivait.

¹⁸ Angut erneᴋarune ᴋunutojomik tapatojomiglo, nâlegomangitomik atâtame nippinganik, anânamelônêt nippinganik, sugiaraloarunikkolônêt nâlegomangitomik tâpkungninga;

¹⁹ Atâtame anânamelo tigujaksarivâk âlugolo iglugasaksoaᴋotime angajoᴋânginut, najugangata itertarvianut;

²⁰ Oᴋartuksauvuglo iglugasaksuit angajoᴋânginut: Ernivuk una ᴋunutojôvok tapatojôvlunelo, nâlegomalungilaᴋ nippiptingnik; sujuksimajôvok talapaktorlo.

²¹ Iglugasaksuillo tâpkoa angutingita ilûnatik miloraksarivât ujarᴋanut, toᴋodlugo; taimaglo idluinek pêjarniarpat akunernit; Israêlekullo ilûnatik tusalârput sivôralutiglo.

²² Inuglo toᴋojutiksamik idluîtulisimagune, toᴋotaukpallo, nivingatigungnelo napârtomut;

²³ Timinga tokungajok unnuak nâvlugo napârtomêtuksaungilak, iluveraksarivalle uvlorme tâpsomanetsainak; nivingatitaujok ôminarsingmat Gûdemut; nunat Nâlekab Gûdivît tunijanga perᴋutauᴋovlugo ilingnut ivsornartitauᴋonago.