Deuteronomy 20 - Labrador Inuttitut Heritage Bible

¹ Unatariartoruvit ômigijingnik, takolutillo horsenik, ᴋamutiniglo unatautinik, inungniglo unorᴋijarnik, erᴋsigijaksarilungilatit, Nâlegak Gûdît tikiutjijît nunamit Egiptenemit ilingnêngmat.

² Parngnailerupselo unatarnermut, ajuᴋertuijok sivupiartortuksauvok inuillo oᴋarvigilugit,

³ Oᴋautijaksarivaillo: Oᴋokse, Israêlekut! Uvlome parngnailerpose ômigijise unatariartoromavlugit; ômatise ᴋuksalâdlarniaratik; erᴋsiniarase, sajungniaraselo, kapiasutiginiarasigiglo;

⁴ Nâlekab Gûdipse ingergerᴋatigingmase, pivluse ômigijise sorᴋsugomavlugit, piulijomavluse.

⁵ Angajokâllo inuit oᴋarvigijaksarivait, oᴋarlutik: Kina nutâmik igloliorsimavâ atijauviksiornagolô? Tâmna iglominut angergariartorle, toᴋoᴋonago unatarnerme, tâpsomalo assianut atijauᴋonago.

⁶ Kinalo vaineliksatalingmik perorsêviliorsimavâ, paungangillo katersornagit sullê? Tâmna iglominut angergariartorle, toᴋoᴋonago unatarnerme, tâpsomalo assianut paungat tigujauᴋonagit.

⁷ Kina nuliaksarsivâ, ingminulle pitinago sullê? Tâmna iglominut angergariartorle, toᴋoᴋonago unatarnerme, tâpsomalo assianut pijauᴋonago.

⁸ Angajokâllo inuit sulle oᴋarvigijaksarivait, oᴋarlutik: Kina erᴋsivâ ômatimigullo ᴋuksalâdlarlunê? Tâmna iglominut angergariartorle, ᴋatangutime ômatingit auksiᴋonagit tâpsoma ômatingatut.

⁹ Angajoᴋâllo oᴋarêrunik inungnut, Angajoᴋâksarsiortuksauvut sorᴋsuktuksanut aulatsijuksanik inungnik.

¹⁰ Kanileruvit iglugasaksoarnut sorᴋsugvigijomavlugit, oᴋarᴋatigijaksarivatit ulapirᴋsauteᴋakᴋatigijomavlugit.

¹¹ Ulapirᴋsaumiglo kiopatit, upkoerlutiglo ilingnut, tagva inuit ilûnatik naipitaujut tagvane nâleklutit kivgartoraksarivâtit.

¹² Ulapirᴋsauteᴋakᴋatigijomangipasille, unataromakpatillo, ilumajaksarivatit;

¹³ Nâlekablo Gûdivît tunikpagit aggangnut, angutit ilûnaita tagvanêtut toᴋotaksarivatit saviksûb kênanganut;

¹⁴ Arnalle, sorutsillo, nergjutillo, perᴋutillo tigujaksat iglugasaksoarnêtut tamaita aᴋsârnigaksarivatit ilingnut, nerrilârpotillo ômigijivît perᴋutinginit Nâlekab Gûdivît tunijanginit ilingnut.

¹⁵ Taimailiorvigijaksarivatit iglugasaksuit tamaita ilingnit ungasidlartut, iglugasaksuit makkoa mânêtut ilagingitangit.

¹⁶ Inôᴋatigêksuille ukkua Nâlekab Gûdivît kingormgutijaksautitangit ilingnut iglugasaksoangine sunamiglônêt anerterijomik inôᴋojijuksaungilatit;

¹⁷ Pimariktomigle nungutaksarivatit, imaitut: Hitikut, Amorikut, Kanaanekut, Perizikut, Hivikut, Jebusekullo; sorlo Nâlekab Gûdivît perᴋongmatit;

¹⁸ Ajuᴋertuiᴋonagit ilipsingnik maᴋojungnartulinermik piniarnerijangit Gûdimingnut maliklugit; taimailiorluse Nâlegak Gûdise idluituliviginajarapsiuk.

¹⁹ Akunertomik iglugasaksuit ilangit ilumagungne unatarlugit tigulugillo, napârtungit asseroraksarilungilatit ulimarᴋattarlugit; nerᴋiksaᴋarvigijungnarangne, taimaimallo nakataksarilungilatit; perorsêviub napârtungit inôvât, sorᴋsuktauᴋovlugit ilingnût?

²⁰ Napârtut ᴋaujimajatit nerᴋiksarsiviongitut kissimik asseroraksarivatit nakalugillo; pinnailutaksaliorutigilugillo iglugasaksoarnut unatarvigijipsingnut sâlagijauᴋârtinagit.