Deuteronomy 2 - Labrador Inuttitut Heritage Bible

¹ Sanguvogut tagva ingergarlutalo sunaᴋajuitomut, apᴋut imarbingmut suvlolingmut sangmijok apᴋutigilugo, sorlo Nâlekab oᴋautingmanga: uvluniglo unuktunik ᴋakᴋaᴋ Seire arvertarvigivavut.

² Nâlekablo oᴋarvigivânga, oᴋarlune:

³ Nâmaktomik ᴋakᴋak tamanna kaivalakpase; sanguleritse avunga.

⁴ Inugiartoksuillo perᴋokit, oᴋarlutit: ᴋatangutipse Esauib ᴋitorngangita nuname Seireme nunangat apᴋutigijomârpase; tâpkoalo erᴋsigijomârpâse; taimaimat udjertutsiaritse ilipsingnik;

⁵ Piluᴋautiniarasigik; tunitjivigijomanginapse tâpkoa nunangata ilanganik, itikapse alungita tutivigijangatut angitigijomiglônêt; ᴋakᴋak Seir tunimagapko perᴋutauᴋovlugo Esauemut.

⁶ Nerᴋiksanik pisianalârpose tâpkonangat kênaujarnut nerrijungnarᴋovluse, imermiglo tâpkonangat pisinialârpose kênaujarnut imerungnarᴋovluse.

⁷ Nâlekab Gûdivit pilluangorᴋosimangmatit aggakpît piniarningine tamaine; ingergarnît sunaᴋajuitokut mattomûna ilisimavâ; jârit makkoa 40 nâvlugit Nâlekab Gûdivît najorpatit; sumiglônêt ajoksalungilatit.

⁸ Taimaglo ᴋatangutivut Esauib ᴋitorngangit Seireme nunalit ᴋângiutivavut, naᴋsarsûb apᴋutâ ᴋemaklugo, Elatelo Ezion-geberelo ᴋemaklugik. Sangulutalo Moabib sunaᴋajuitungata apᴋutâ ingergarvigivavut.

⁹ Nâlekablo oᴋautivânga: Moabekut pagvisarniarasigik sorᴋsungniarnagillo; tâpsoma nunangata ilanga tunijomanginapko perkutauᴋovlugo ilipsingnut; Ar tunimagapko Lotib ᴋitornganginut perᴋutauᴋovlugo.

¹⁰ (Emimikut itsaᴋ tagvane nunaᴋarput, inuit angijut pitsartujut, unuktut, takijut, sorlo Enakekutitut;

¹¹ Tâpkoatauk inukpangonerartauᴋattarput Enakekutitut; Moabemiulle taivait Emimekunik.

¹² Horikuttauk itsaᴋ nunaᴋarput Seireme, Esauible ᴋitorngangita inangerpait; nungupait sâmingnit, kinguninginelo tagvanêmiongolerput; sorlo Israêlikut piniarmatta nunamut pigijamingnut, Nâlekab tunijanganut tâpkonunga.)

¹³ Mânale makititse, kôglo Zered ikârdlugo. Kôglo Zered ikârpavut.

¹⁴ Uvlullo Kades-barneamit ingergarvigijavut, ikârᴋârtinatanut kôngmik Zeredemik, jâreovut 38nik; kinguvârêt angutit sorᴋsugungnartut ilûnamasiatik nungutauᴋârtinagit tangmârᴋatigêktunit, sorlo Nâlekab oᴋamariklune oᴋautingmagit.

¹⁵ Nâlekab aggangita akkerartormagit, pêjaromavlugit tangmârᴋatigêktunit, taimaglo nungutauvut.

¹⁶ Angutillo sorᴋsugungnartut ilûnamaritik nungutaungmatta, toᴋosimavlutik inugasaksuit akornganit,

¹⁷ Nâlekab oᴋarvigivânga, oᴋarlune:

¹⁸ Uvlome Moakekut kiglingat ikârdlugo, Arekôlârpotit;

¹⁹ Ammonikullo tungânut tikiutiguvit, pagvisarniarnagit sorᴋsungniarnagillo, Ammonikut nunangata ilanganik tunitjivigijomanginapkit perᴋutauᴋovlugo; Lotib ᴋitornganginut tunimagapko perᴋutauᴋovlugo.

²⁰ (Tâmnatauᴋ taijauᴋattarpok inukpait nunanganik, itsaᴋ inukpait nunagingmatsuk; Ammonikulle atserarpait Zam-zuminik;

²¹ Inuit angijut, unuktut, takijullo, Enakikutitut; Nâlekable nungupait tâpkoa sângine; inangerlugillo kinguninginelo tagvanêmiongolerput;

²² Sorlo Esauib ᴋitorngangit, Seireme nunalit, piniulaungmagit, nungutsilaurame Horikunik tâpkoa sivorngane; tâpkoalo inangerpait, tagvanêmiongolerpullo tâpkoa inangerlugit uvlome tikidlugo.

²³ Avikullo, iglugasangne nunaᴋartut Gaza tikidlugo, Kaftorekut, Kaftoremit tikilutik, nungutsiᴋârtinagit tâpkoninga, kinguninginelo tagvanêmiongoniarlutik.)

²⁴ Pikkivluselo aularitse, Arnonib naᴋsanga ikârdlugo; ahâk, aggangnut tunimavara Sihon, Amorikut ilangat, Hesbonib ataninga, tâpsomalo nunanga; piginialeruk, sorᴋsuklugolo.

²⁵ Uvlorme tamattomane kapianarnît sivôranarnîllo pititsomalerpara inôᴋatigêksoarnut ᴋilaub ilûnangata atânêtunut, unipkautaunernik tusarniartunut, sajuklutiglo kapiaktoadlalârtunut pivlutit.

²⁶ Tiliklerpunga tagva aᴋpârtunik sunaᴋajuitomit Kedemotemit Sihonemut, Hesbonib ataninganut, ulapirᴋsautelingnik oᴋauseᴋarlutik, oᴋarpullo:

²⁷ Nunat apᴋutigilaulago; apᴋosinek atutsainarlugo ingergaromavunga, sangujomangilanga talerpingmullônêt saumingmullônêt.

²⁸ Kênaujarnut aulaivigilârparma nerᴋiksanik, nerriᴋovlunga, kênaujarnullo ᴋaitsivigilârparma imermik, imerᴋovlunga; pisuklunga tagvûnârᴋotuinalaunga;

²⁹ Sorlo Esauib ᴋitorngangit, Seireme nunalit, Moabekullo, Areme nunalit, piniarvigilaungmanga; Jordanekut ikârᴋârtinanga nunamut Nâlekab Gûdipta tunijanganut uvaptingnut.

³⁰ Sihonible, Hesbonib ataningata, tagvûna ingergarᴋolungilâtigut, Nâlekab Gûdipta tâpsoma anerninga mangaitilaungmago, ômatingalo ᴋepêsertipâ, pititsijungnarᴋovlugo tâpsominga aggaptingnut, sorlo uvlome pisimagame.

³¹ Nâlekablo oᴋautivânga: Ahâk, pigialerpunga Sihon nunangalo sâlautilugo sângne; perᴋutigileruk, kingormgujiᴋovlutit nunanganik.

³² Tagva Sihonib pagreariartorpâtigut, tâpsoma inuᴋotingitalo ilûnatik, Jâhazeme sorᴋsugomavluta.

³³ Nâlekablo Gûdipta unertutigivâ sâptingne, sâlagivavullo tâmna erningillo inungillo tamaita.

³⁴ Neliutomelo tâpsomane iglugasaksoangit ilûnaita tiguvavut, iglugasaksuillo inulit tamaita asserormarikpavut, arnat sorutsillo ilagilugit; amiakoᴋartilungilavut;

³⁵ Nergjutit kissimik aᴋsârnigaksautipavut uvaptingnut, iglugasaksuit tigujapta perᴋutingit ilagilugit.

³⁶ Aroeremit, Arnonib naᴋsangata kiglinganêtomit, iglugasaksoarnillo naᴋsarmêtunit, Gileade tikidlugo, iglugasaksoaᴋalaungilak sapertaptingnik; Nâlekab Gûdipta tamaita tunivait uvaptingnut;

³⁷ Ammonib kinguvângita nunanganut kissiane tikilaungilatit; kôb Jabbokib tungânut iglugasaksoarnullo ᴋakᴋanêtunut, namullo Nâlekab Gûdipta inerterutigijanginut uvaptingnut.