Deuteronomy 19 - Labrador Inuttitut Heritage Bible

¹ Nalekab Gûdivît inôᴋatigêksuit kipipagit, Nâlekablo Gûdivît tâpkoa nunangat tunikpago ilingnut, igvillo inangerungne, iglugasaksoangit iglungillo inigilugit,

² Iglugasaksoanik pingasunik nunavît Nâlekab Gûdivît tunijangata perᴋutauᴋovlugo ilingnut ᴋerᴋane ingmigôlitsijuksauvotit ilingnut.

³ Atoraksarilârtarnik apᴋutiksaliolârpotit, nunavîllo Nâlekab Gûdivît kingormgutijautitangata ilingnut kiglingit avilugit pingasôlivlugit, neliat inuarsimajok ᴋemâjungnarᴋovlugo tagvunga.

⁴ Imailingakune inungmik toᴋotsijok ᴋemâjungnarpok tagvunga, inôvlunelo: neliat toᴋotsijok inôᴋatiminik, pijârinane, sivornganelo ômigilauᴋarnago;

⁵ Inûb inôᴋatine napârtoliarᴋatigisimagunik nakkaterijomavlutik, agganelo siluktikunigit napârtok ulimâromavlugo ulimaumut, ulimaullo niokpat tukingatiminit, inôᴋatinga nelaudlugo toᴋolugo; tâmna ᴋemâjuksuvok iglugasaksuit makkoa ilanganut inôvlunelo;

⁶ Aungmik akkiniartuksaᴋ maliᴋonago inungmik toᴋotsijomik, ômatinga ônadlartilugo sulle, angulugolo, apᴋutik sivitudlarmat, toᴋolugolo; toᴋotaksaungikaloartilugo sivorngane ômigilaunginamiuk.

⁷ Tamanna pivlugo perᴋovagit, oᴋarlunga: Iglugasaksuit tâpkoa pingasuit ingmikôrtitaksarivatit ilingnut.

⁸ Nâlekablo Gûdivît nunavît kiglingit nerrototikpagit, sorlo atâtagilauᴋtatit angervigingmagit, tunitjivigikpatillo nunamik tamânik angerutigilauᴋtaminik tunijomavlugo;

⁹ Perᴋojak tamanna perᴋojijutigijara ilingnut uvlome ilûnât kamagijomagungne piniarlugolo, Nâlegak Gûdît nagligijomavlugo, arvertatsainaromavlutillo tâpsoma apᴋutauᴋojangine tamaine; tagva iglugasaksuit ukkua pingasuit ilajaksarivatit pingasuinik sulle ilingnut;

¹⁰ Auk pasijaksaungitok kovijauᴋonago nunangane Nâlekab Gûdivît kingormgutijautitangane ilingnut, tupvio ᴋonaglo aungmut.

¹¹ Inuille neliata inôᴋatine ômigidlarpago, terliarlugolo, makivigikpagolo annaulugolo toᴋodlugo; ᴋemâlerunelo iglugasaksuit ukkua ilanganut;

¹² Tagva iglugasaksuit igloᴋarvigijame angajokângit tiliklertuksauvut aijautilugolo tagvangat, tunilugolo aungmik akkiniartûb agganginut, toᴋotauᴋovlugo.

¹³ Ijikpît nâpkigijaksaringilâ, pêjaijuksauvotille akkiliksalingmik aungmik pasijaksaungitomik Israêlemit, ᴋanoengitsiarᴋovlutit.

¹⁴ Inoᴋativit nunangata kiglingata nelunaikutanga nûtaksaringilat, sivorlivît nelunaikutaliarimajangat kingormgutijaksarne piksarsiarijarne, nuname Nâlekab Gûdivît tunijangane ilingnut perᴋutauᴋovlugo.

¹⁵ Kigligiutjijok atausênaujok nikovituksaungilak pinialungnek ajornerlônêt assime idluitulinerijanga pivlugo; kigligiutjijuk maggûk pingasullônêt oᴋausingit maliklugit oᴋautigijaujok aulajangititaujuksauvok.

¹⁶ Kigligiutjijok nelangaitok nikovipat inôᴋatine pasilugo idluitulinermik;

¹⁷ Tagva angutik tamarmik akkerartûtijuk nangeriartortuksauvuk Nâlekab sânganut, ajuᴋertuijut idluarsaijullo uvlune tâpkonane tagvanêniartut sânginut;

¹⁸ Idluarsaijullo katsungaitomik kiglisiniartuksauvut; ahâglo, kigligiutsijok nelangaivlune kigligiutsilauᴋpat, saglovlune ᴋatangutine pasidlarlugo;

¹⁹ Tagva piniarvigijaksarivase sorlo tâmna issumaᴋalaungmat ᴋatangutine piniarvigijomavlugo; taimaglo idluitok pêjarniarpat akornganit.

²⁰ Assingillo tusaromârput sivôrajomârlutiglo, kingornganelo taimak angitigijomik piniartokarungnainiarpok akunapsingne.

²¹ Ijillo nâpkigosuktuksaungilaᴋ; inôsek akkeᴋartuksauvok inôsermik, ije ijemik, kigut kigumik, aggait aggangnik, itigait itigarnik.