Deuteronomy 18 - Labrador Inuttitut Heritage Bible

¹ Ajoᴋertuijut Levikut, tagva kinguvârêt Levikut ilûnatik Israêlekut avgoraksarsiᴋatigijaksaringilait kingormgutijaksarsiᴋatiginagillo; nerrijaksarivait tunergutit Nâlekamut tunijaujut ikomakut, tâpsomalo kingormgutijaksanga.

² Kingormgutijaksaᴋarniangilallo ᴋatangutimik akorngane, Nâlegak kingormgutivât, sorlo oᴋautilaungmagit.

³ Tamadjalo ajuᴋertuijut piksarsiarijangit inungnit, tunitjijunit tunergutiksanik, tuktuvaumangât saugaumangâllônêt, tunitjijuksauvut ajuᴋertuijomut tallermik aglerûngniglo tamangnik nerrubkangalo.

⁴ Senaugaksavît, vainevîllo, orᴋsuvillo pijariorutingit, saugakotivîllo salijaujut sivorlerpângita merᴋungit, tunijaksarivatit tâpsomunga.

⁵ Nâlekab Gûdivît anneringmago kinguvângoᴋatigêngnipsingnit tamainit, nangerᴋovlugo kivgartorluse Nâlekab atingane, tâmna erningillo soraijuitomik.

⁶ Levikullo ilangat tikikune itârvit, Israêlekut pigijangita ilanganit tujormivigijaminit, tarnimelo kajungilarninganut tamânut tikikune inemut Nâlekab annerijanganut;

⁷ Tagva kivgartortuksauvok Nâlekab Gûdime atingane, sorlo ᴋatangutine Levikut ilûnatik, tagvane Nâlekab sângane nangertut, pingmatta.

⁸ Adsigêktomik nerᴋiksamik ikupiktuksauvut, atâtagilauᴋtame perᴋutingita niorvgutaujut akkigijangit tapilugit.

⁹ Tikisimaguvit nunamut Nâlekab Gûdivît tunijanganut ilingnut, iliniartuksaungilatit inôᴋatigêksuit tâpkoa maᴋojungnartuliningit igjaromavlugit.

¹⁰ Ilingne naipitaujokartuksaungilak ernerminik paningminiglônêt ingergartitsijomik ikomakut, nelautainerluktomiglônêt, angakomiglônêt, êlisêniartomiglônêt, angakoliartomiglônêt,

¹¹ ᴋaiᴋojiâlungmiglônêt, anerneâluᴋartomiglônêt, nelunaikutaksarsiortomiglônêt, apertsortomiglônêt tokungajomik.

¹² Taimailiortut tamaita Nâlekab maᴋojugingmagit; maᴋojungnartulinerillo tamakkoa pitjutigellugit Nâlekab Guvidît ᴋemâtipait sivunernit.

¹³ Iluengarlutit Nâlegak Gûdît ilagijaksarivat.

¹⁴ Inôᴋatigêksuit makkoa ᴋemâtitaksarijatit nâlakput angakunik nelautainerluktuniglo; igville, Nâlekab Gûdivît taimak perᴋolungilâtit.

¹⁵ Nâlekab Gûdipse nelautaijomik tunitjivigijomârpâse ᴋatangutipsingnit, uvaptun-itomik; tâmna tusâgoraksarivase;

¹⁶ Katjârilauᴋtatit Nâlekamit Gûdingnit Horebeme katimaniksûb uvlungane tamaita maliklugit, oᴋaravit: Nâlekab Gûdima nippinga tusarungnailago, ikomaᴋsoarlo tâmna takojungnailago kingorngane, toᴋoᴋonanga.

¹⁷ Nâlekablo oᴋautivânga: Oᴋauserijangit idluadlarput.

¹⁸ Nelautaijomik iliktun-itomik ᴋatangutingita akornganit makititsijomârpunga; oᴋausikkalo ilijomârpakka ᴋaninganut, tâpsomalo oᴋarvigijomârpait tamainik perᴋojamnik tâpsomunga.

¹⁹ Tusaromangitorlo oᴋauserijamnik tâpsoma oᴋautigilârtanginik atimne, uvanga tâmna aperᴋutigijomârpara.

²⁰ Nelautaijorle iktoriktaivlune oᴋauseᴋartok atimne, oᴋautauᴋolungitamnik tâpsomunga, Gûdillônêt assima atingane oᴋartok, nelautaijok tâmna toᴋojuksauvok.

²¹ Omatingnelo oᴋaruvit: ᴋanok ilitariniarpitigô oᴋauseᴋ Nâlekab oᴋauserilungitangâ?

²² Nelautaijok oᴋarpat Nâlekab atingane, oᴋautigijanga nelautsingipat maliktokangipallo, tamannauvok Nâlekab oᴋautigisimangitanga; nelautaijûb iktoriktaivlune oᴋautigimavâ, ileragijaksaringilaselo.