Deuteronomy 16 - Labrador Inuttitut Heritage Bible

¹ Takᴋek Abibe kamagitsiaruk, ᴋângerviksiorviglo uvloᴋsiorutigiuk Nâlekamut Gûdingnut; takᴋerme Abibeme Nâlekab Gûdivît aulartilaungmatit Egiptenemit unnuarme.

² Kângerviksiorutiksallo, saugat tuktuvaillo, tunergutigijaksarivatit ineme Nâlekab Gûdivît annerijangane aterminut iniksauᴋovlugo.

³ Tamanna ilagilugo pubjusimajomik ᴋakᴋôjaᴋtortuksaungilatit; uvlut sevenit nâvlugit pubjusauteᴋangitomik ᴋakᴋôjaᴋtortuksauvotit tâmna ilagilugo, ᴋakᴋôjarmik kapiasûtaujomik; erinesuklutit aulalauravit nunamit Egiptenemit; inôsivit uvlungit nâvlugit erᴋaumatsainarᴋovlutit uvlormik aularvigilauᴋtarnik nunamit Egiptenemit.

⁴ Uvlullo sevenit nâvlugit takuksaujomik pubjusauteᴋartuksaungilak ilingne nunavît ilanganelônêt; nerᴋejablo tunergutigijavît unnungme uvlorme sivorlerpâme ilanga pigumitârijaujuksaungilak ᴋaupamut.

⁵ Kângerviksiutiksak tunergutigijaksaringilat itertarvikpît Nâlekab Gûdivit tunijangata ilingnut nelianetuinak;

⁶ Inemele Nâlekab Gûdivît annerijangane aterminut iniksautitsomârtangane, tagvane ᴋângerviksiutiksak tunergutigijaksarivat unnungme, seᴋinek nipilertilugo, aularnivît Egiptenemit neliuningane.

⁷ Igajaksarivallo nerrilugolo ineme Nâlekab Gûdivît annerijangane; uvlâkullo tagva sangulutit tupingnut angerarungnarpotit.

⁸ Uvlut sixit nâvlugit pubjusauteᴋangitunik ᴋakᴋôjaᴋtortuksauvotit; uvlullo seveningane katimaniksaᴋartuksauvok ivlernartomik Nâlekamut Gûdingnut; tâpsomane suliaᴋartuksaungilatit.

⁹ Vogenik sevenenik kititsijuksauvotit ilingnut; iviksakatautib atortaulertainarninganit senaugaksanut kibloraksanut, kititsilertuksauvotit vôgenik sevenenik.

¹⁰ Vôgillo uvloᴋsiorvingat uvloᴋsiorutigijaksarivat Nâlekamut Gûdingnut, aggakpît tunergutingat pijârijok aitutigilugo, Nâlekab saimartitsininga ilingnik maliklugo;

¹¹ Serrijuksauvotillo Nâlekab Gûdivît sângane, igvit, ernîllo, panîllo, kivgallo angut, kivgallo arnak; Leviteojorlo itertarvingnêtok, takorngartarlo, iliarsuglo, uigarnerlo, akunapsingnêtut, ineme Nâlekab Gûdivit annerijangane aterminut iniksauᴋovlugo.

¹² Erᴋaijuksauvotillo kivgaulauravit Egipteneme, maligaksallo makkoa kamagijaksarivatit piniarlugillo.

¹³ Uvloksiorviglo tuperᴋarvingmik akkerᴋunik milukatalingnik uvloᴋsiorutigijaksarivat uvlunik sevenenik, katersoijarêruvit senaugaksat katjugvinganit vainiblo iptêjartaukinganit;

¹⁴ Serridlarlutillo uvloᴋsiortuksauvotit, igvit, ernîllo, panîllo, kivgallo angut, kivgallo arnak, Leviteojorlo, takorngartarlo, iliarsuglo, uigarnerlo, itertarvingnêtut.

¹⁵ Uvlunik sevenenik uvloᴋsiortuksauvotit Nâlekamut Gûdingnut ineme Nâlekab annerijangane; Nâlekab Gûdivît saimartitsomangmatit katersivingne tamaine, aggakpîllo suliangine tamaine, taimaimallo ᴋuviasumariktuksauvotit.

¹⁶ Pingasuertorlutik jârit tamât angutitit ilûnatik sakᴋijârtuksauvut Nâlekab Gûdivît sângane ineme tâpsoma annerijangane; uvloᴋsiorvingme pubjusauteᴋangitunik ᴋakᴋôjaᴋtorvingme, ama vôgit uvloᴋsiorvingane, amalo uvloᴋsiorvingme tuperᴋarvingme akkerᴋunik milukatalingnik; tigumiaraᴋaratigle sakᴋertuksaungilat Nâlekab sângane;

¹⁷ Angutit ilûnatik tunitjijuksauvut pijungnarnitik maliklugit; saimanartut Nâlekab Gûdivît tunijangit ilingnut maliklugit.

¹⁸ Idluarsaijunik aulatsijuksaniglo ilijijuksauvotit ilingnut itertarvingne tamaine Nâlekab tunijangane ilingnut, kinguvângoᴋatigêngnitit maliklugit; tâpkoalo idluarsainermut nelâgôrtomut inuit idluarsaraksarivait.

¹⁹ Idluarsaineᴋ mumigaksarilungilat; inuit kinauningit kamagijaksaringilatit; piliusianik tigusijuksaungilatit, piliusiat silatojut ijingit takpêtingmagit, mumiklugillo idluartut pitjutingit.

²⁰ Idluarnek, ila idluarnek maligaksarivat, inôᴋovlutit, nunalo Nâlekab Gûdivît tunijanga ilingnut kingormgutilugo.

²¹ Ilijijuksaungilatit napârtunik ᴋanoelingajuniglônêt (tuksiarviksanik) Nâlekab Gûdivît tunerguservingata senajaksarijavît ilingnut saniane.

²² Napartitsijuksaungilatillônêt napajoliarimajarnik, Nâlekab Gûdivît maᴋojugijanganik.