Deuteronomy 15 - Labrador Inuttitut Heritage Bible

¹ Jârit sevenit nâjarangata atauteᴋarungnaititsijuksauvotit.

² Imailingajuksauvorlo akkilêᴋojijungnaivik: attartortitsijûb attartortautitane inôᴋatiminut atauteᴋarᴋojaksaringilâ (jâreme tâpsomane); inôᴋatiminit ᴋatangutiminillônêt atauseᴋ ᴋaitauᴋojaksaringilâ; atauteᴋarᴋojijungnaivik Nâlekab pinganik taijaungmat.

³ Takorngartamut ᴋaitauᴋojungnarpat, perᴋutitille ᴋatangutingnêtut aggakpît taimaititaksarivait.

⁴ Kissianele aklujokartuksaungilak ilingne; Nâlekab saimartitsomârmase nuname Nâlekab Gûdivît ilingnut tunijangane kingormgutigilugo pigilugolo piᴋovlutit;

⁵ Katsungaidlutit Nâlekab Gûdivît nippinga nâletsiartuarungne, perᴋojaujut makkoa tamaita perᴋojijutigijakka ilingnut uvlome naipertutsiarlutit piniarungne.

⁶ Nâlekab Gûdivît saimartiniarmatit, sorlo angervigingmatit; attartortautitsilârpotillo inôᴋatigêksoarnut unuktunut, attarsilulângilatille; inôᴋatigêksuillo unuktut ataniotivigilârpatit, tâpkoale ataniotiviginiangilâtit.

⁷ Aklujokarpat ilingne, ᴋatangutivît ilangat, itertarvikpît ilangane, nunangne Nâlekab Gûdivît tunijangane ilingnut, ômatit mangaititaksaringilat aggatillo erᴋititaksaringilatit ᴋatangutingnut aklujomut;

⁸ Aggatille issivitaksarivatit tâpsomunga, attartortitaksarivatillo ajoksautigijanganik, ajoksarninga nâmaksitilugo.

⁹ Udjertorillo, issumalukarᴋarᴋonak ômatingne, oᴋarlutit: jârit seveningat, jâre atauteᴋarᴋojijungnaivik ᴋanilerpok; ijeᴋalerpotillo idluitomik ᴋatangutingnut aklujomut, tunitjivigitaililugolo; pivilutillo Nâlegak ᴋaigarsugvigivâ; ajorningorniarporlo ilingnut.

¹⁰ Tunitjivigijaksarivat, ômatillo sinaungajuksaungilak tunitjivigigangne; tamanna pitjutigellugo Nâlekab Gûdivît saimartiniarmatit suliaᴋarnerne tamaine, aggakpîllo issautigijangine tamaine.

¹¹ Aklujokarungnainiangimat nuname, tamanna pivlugo perᴋovagit, oᴋarlunga: Aggatit issivitaksarivatit ᴋatangutingnut ajoksartomut, aklujomullo nunangne.

¹² ᴋatangutit, angut Ebreeriojok, arnarlônêt Ebreeriojok, niorvgutaukpat ilingnut, jârillo sixit nâvlugit kivgartorpatit; tagva jârit seveningane ᴋelarudjâraksarivat ilingnit.

¹³ ᴋelarudjârungnelo ilingnit, tagva sunaᴋarane aulartitaksaringilat;

¹⁴ Tunitjivigijaksarivalle saugakotingnit, senaugaksaniglo katjugvingnit, vainemiglo iptêjaivingnit; sorlo Nâlekab Gûdivît tunitjivigingmatit, taimak aitortoraksarivat.

¹⁵ Erᴋaijuksauvotillo kivgaulauravit nuname Egipteneme, Nâlekablo Gûdivît piulilaungmatit; tamanna pivlugo tamattominga perᴋovagit uvlome.

¹⁶ Imâgle oᴋarvigikpatit: Anijomalungilanga ilingnit; nagligigamitit igvit iglomioᴋatitillo, inôlaurame ilingne;

¹⁷ Tagva putogûmik tigusilerit siutingalo kapiuk upkoarmêdlune, kivgautsainarniarporlo ilingnut. Kivgallo arnaᴋ taimailiorvigijaksarivat.

¹⁸ Oᴋumaigijaksarilungilat kivgaujungnailune ilingnut aulartigungne ilingnit; jârit sixit nâvlugit kigartormatit maggoertorlune kivgab attartugaub kivgartorninganit; Nâlekablo Gûdivît saimartiniarpâtit piniarnerne tamaine.

¹⁹ Tuktuvakotivit saugakotivîllo erniariᴋârtangit angutit ilûnaita ilingatitaksarivatit Nâlekamut Gûdingnut; tuktuvaᴋotivît erniangiᴋârtanga suliaᴋartitaksarilungilat, saugakotivîllo erniariᴋârtanga salijaksaringilat.

²⁰ Jârit tamât nerrijaksarivat Nâlekab Gûdivît sângane, ineme Nâlekab annerijangane, igvit iglomioᴋatitillo.

²¹ ᴋanoetokarpalle, tusiakpallônêt tautungipallônêt, sumiglônêt piungitomik ᴋanoetokarpat, tunergutigijaksarilungilat Nâlekamut Gûdingnut.

²² Itertarvingne nerrijaksarivat; ivsornartut ivsornaitullo adsigêktomik nerrijaksarivât, sorlo tuktungajomit tuktumillo.

²³ Kisiane aunga nerrijaksarilungilat, nunamulle kovijaksarivat imeᴋtut.