Deuteronomy 14 - Labrador Inuttitut Heritage Bible

¹ ᴋitorngauvose Nâlekamut Gûdipsingnut; kilertuksaungilase nangminipsingnik, salijuksaunaselo ᴋablupsingnik tokungajut pivlugit.

² Inôᴋatigêngogapse ivsornaitut Nâlekamut Gûdingnut, Nâlekablo annerivâse inuᴋutauᴋovluse adseungitunik nangminerminut, inôᴋatigêksoarnit tamainit nunab ᴋânganêtunit.

³ Sumik maᴋojungnartomik nerrijuksaungilase.

⁴ Tamadja tagva nergjutit nerrijaksarijase: tuktuvak, saugak, tuktungajorlo,

⁵ Tuktulo, tuktôjarlo, tuktuvâraujârtorlo, tuktungajorlo imnasiortok, tuktuvâluglo, tuktungajoksoarlo, tuktulo misiktartok.

⁶ Nergjutillo ilûnaita itigalit ᴋopâlingnik maggôlimajungnik tamoapsârtullo, nerrijaksarivase.

⁷ Makkoale tamoapsârtut, ingmikôrtuniglo ᴋopâlingnik itigalit, nerrijaksaringilase; kamêle, ukalerlo, ukaliaitsiangojorlo, tamoapsâraloarmatta ᴋopâlingnigle itigaᴋangilat, tâpkoa ivsornarput ilipsingnut.

⁸ Kuingengerlo, tâmna ᴋopâlingnik itigaᴋaraloarpok tamoapsâlungilarle, tâmna ivsornarpok ilipsingnut; tâpkoa nerᴋingat nerrijaksaringilase, sillungillo aktoraksaringilase.

⁹ Imanetunit tamainit makkoa nerrijaksarivase; tikâgutilit kavisilillo nerrijaksarivase;

¹⁰ Tikâgutiᴋangitulle kavisiᴋangitullo nerrijaksaringilase; ivsornarput ilipsingnut.

¹¹ Tingmiat ivsornaitut ilûnaita nerrijungnarpase.

¹² Ilangille makkoa nerrijaksaringilase: nektoralik, kigaviksoarlo, aglakoliglo;

¹³ Kigaviâluglo, kigaviglo, ᴋennuajôrlo, tâpsomalo ilagijangit;

¹⁴ Tullukallo ilûnaita, tâpkoalo ilagijangit;

¹⁵ Strauselo, unnuaᴋsiullo, naujarlo, kigaviarsuglo, tâpsomalo ilagijangit;

¹⁶ Nuilatôrlo, ukpiglo, ikkêtojorlo;

¹⁷ Siggoᴋortorlo, sillosiortorlo, oᴋaitorlo;

¹⁸ Niuᴋortorlo, ᴋongeseᴋortorlo, tâpsomalo ilagijangit, amauliksoarlo, nunivaᴋaujorlo tingisôᴋ.

¹⁹ Isarolillo sitamanik itigajalit nuname pisusôt ilûnatik ivsornarput ilipsingnut; nerrijaujuksaungilat.

²⁰ Tingmialle ivsornaitut tamaita nerrijungnarpase.

²¹ Ingminik toᴋojomik nerrijuksaungilase; tujormiamut itertarvingnêtomut tunituinariaᴋarpat, tâmna nerriᴋovlugo tâpsominga; aulaijungnarpallônêt takorngartamut; ilipsele inôᴋatigêngovose ivsornaitut Nâlekamut Gûdipsingnut. Tuktungajoarak amâmaktok sulle igajaksarilungilat.

²² Karngasortavit unuksiningita tallimaujungit ilûnaita, perorsêvingme perortut jârit tamât, ingmikôrtitaksarivatit.

²³ Nerrijuksauvotillo Nâlekab Gûdivît sângane, inime tâpsoma annerijangane atterminut iniksauᴋojangane, senaugaksavit, vaineᴋotivillo, orᴋsuᴋotivillo tellimaujunginik, tuktuvaᴋotivillo saugakotivillo pijariorutinginik, iliniarᴋovlutit sivôranermik Nâlekamik Gûdingnik tamât.

²⁴ Apᴋutâlo sivitugigungne, tagvunga nangmarlugo saperasugilutit, ine Nâlekab Gûdivît annerijanga atterminut iniksauᴋojanga ungasidlarmat ilingnit, Nâlekab Gûdivît saimausersimangmatit;

²⁵ Tagva kênaujanut niorvgutigikit, kênaujallo tigumiarlugit ingergarit inimut Nâlekab Gûdivît anneriniartanganut;

²⁶ Kênaujallo pisiniutigikit tarnivît kajungilârtanganik, tuktuvangnik, sauganiglônêt, vainemiglônêt imermiglônêt pitsartudlartomik, sunamiglônêt tarnivît ikligijanganik; tagvanelo nerrijuksauvotit Nâlekab Gûdivît sângane, igvillo iglomioᴋatitillo ᴋuviasudlartuksauvose;

²⁷ Levitiojorlo itertarvingnêtok ᴋemagaksaringilat; tâpsoma avigaksarsiᴋatigilungimase kingormgutijaksarsiᴋatigingimaselônêt.

²⁸ Jârit pingasut nâjarangata, jâreme tamattomane pik sarsiarijavît tallimaujungit ilûnaita anititaksarivatit ingmigolingatilugillo itertarvingne;

²⁹ Levitiojorlo, avigaksarsiᴋatigilungimatit kingormgutijaksarsiᴋatigingimatillo, tujormiarlo, iliarsuglo, uigarnerlo, itertarvingnêtut, tikitutsauvut, nerrilutiglo aᴋeartortuksauvut; Nâlegak Gûdît saimauserᴋovlugo ilingnik aggakpît suliangine piniarnerijarne tamaine.