Deuteronomy 13 - Labrador Inuttitut Heritage Bible

¹ Nelautaijomiglonet sinnartômajomiglônêt akunapsingne makitokaraloarpat, tunitjivigikpatillo nelunaikutamik tatamnartomiglônêt,

² Nelunaikutarlo tatamnartorlônêt oᴋautigijanga ilingnut nelautsilerpat, oᴋarlune: Gûdib assingit ilitaringitatit malilaulavut kivgartorlugillo;

³ Nelautaijûb sinnartômajûblônêt tâpsoma oᴋauserijangit nâlagaksaringilatit; Nâlekab Gûdipse ôktormase, ᴋaujijomavlune Nâlegak Gûdise nagligimangâpsiuk ômatipsingnut tamânut tarnipsingnullo tamânut.

⁴ Nâlegak Gûdise maligaksarivase, tâmna sivôragilugo, tâpsomalo perᴋojangit piniarlugit, tâpsomalo nippinga nâleklugo, tâmnalo kivgartoraksarivase ungagilugolo.

⁵ Nelautaijorlo imna, sinnartômajorlônêt taimna, toᴋotaujuksauvok, nâlegungnaineᴋ Nâlekamik Gûdipsingnik, tikiutjijipsingnik nunamit Egiptenemit, piulijipsingniglo iglomit kipalovingmit, oᴋautigingmago, uerisaromangmase apᴋomit Nâlekab Gûdivît apᴋutauᴋojanganit ilingnut. Taimaglo ajortok akunapsingnit pêjarniarpat.

⁶ ᴋatangutivit, anânavît erningata, ernivîllônêt, panivîllônêt, nuliavîllônêt sagvingmiutarijavît, ilanârijavîllônêt tarniktut ilingatitavît, angigutjivlune uerisarpatit, oᴋarlune: Gûdib assinginik kivgartoriartulerta, igvit atâtagijavîllônêt ilitaringitapsingnik;

⁷ Inôᴋatigêksuit avatipsingnêtut Gûdingoangita ilanginik, ilingnut ᴋaninersat, ungasingnersallônêt ilingnit, nunab issuanit nunab issuanut aipânut;

⁸ Angervigijaksaringilat nâlangnagolônêt; ijîkpîllo ilapjugijaksaringilâ, anajagijaksaringilallo ijertornagolônêt.

⁹ Toᴋotaksarivalle; aggatit sivorlerpaujuksauvut tâpsomunga sâtitaujut toᴋotsomavlugo, kingornganelo inuit ilûnatik aggangit.

¹⁰ Ujarᴋanullo miloraksarivat toᴋodlugo; uerisarasuarmatit Nâlekamit Gûdingnit, tikiutjijingnit nunamit Egiptenemit, iglomit kipalovingmit.

¹¹ Israêlikullo ilûnatik tusalârput sivôraniarlutiglo, kingornganelo taimaitomik idluitulijokarniangilak akunapsingne.

¹² Iglugasaksuit pigijavît Nâlekab Gûdivît ilingnut igloᴋarviksautitangita ilangit pivlugit tusaruvit oᴋautigijaungmatta imâk:

¹³ Angutit inorluktut ilangit akunapsingnit pisimavut, uerisailutiglo iglugasaksoaᴋotimik inungita ilanginik, oᴋarlutik: Gûdib assingit, ilitarilaungitase, kivgartoriartulerlavut;

¹⁴ Tagva apertsortuksauvotit, nautsertutsiarlutillo, katsungaitomiglo kiglisiniartuksauvotit; ahâglo, mikseᴋârtôkpat, nelautsimarikpallo maᴋojungnartok tamanna piniarutaungmat akunapsingne;

¹⁵ Tagva iglugasaksuit tâpkoa inungit toᴋotaksarivatit saviksûb kênanganut, nungumariklugit, tagvanêtullo tamaita, nergjuteᴋotingillo saviksûb kênanganut.

¹⁶ Perᴋutillo tamaita tagvanêtut katersoraksarivatit apᴋosineâlunginut, iglugasaksuillo pitangillo tamaita ikomamut nungumariklugit, tunergutiksautilugit Nâlekamut Gûdingnut; nâksaungitomut ᴋigguingolârpok; igloliorvioniarungnailunelo.

¹⁷ Nungutaksallo ilanganik sunamiglônêt nipingajokartuksaungilak aggangnut; Nâlegak allaiᴋovlugo ningarnime katsungaininganik, saᴋᴋêvigilutillo nâpkiningnermik, ilapjugilutillo, unuksitilutillo, sorlo atâtagijatit angervigilaungmagit;

¹⁸ Nâlekab Gûdivît nippinga nâlagungne, tâpsomalo perᴋojangit perᴋojijutigijakka ilingnut uvlome maligungne, piniarlutit idluarijaujunik Nâlekab Gûdivît takkoane.