Deuteronomy 12 - Labrador Inuttitut Heritage Bible

¹ Tamadja maligaksat idluarsautiksallo kamagijaksarijase piniarlugillo nuname, Nâlekab, atâtagijapse Gûdingata, tunimajangane perᴋutauᴋovlugo ilingnut, uvlut nunab ᴋângane inôvigijaksase tamaita nâvlugit.

² Inôᴋatigêt pigijapse Gûdingoangit kivgartorvigijangit tamaita asseroraksarivase, ᴋakᴋane poktojune, ᴋaᴋârulanelo, napârtullo tungujortat atâne;

³ Tunerguservingillo oggotitaksarivase, napajoliarimajangillo naviklugit, napârtoᴋotingillo ikomamut nungulugit; inungoaliarimajangillo Gûdigijomavlugit nablorsigik; atingillo pêjaraksarivase nunamit tâpsomangat.

⁴ Nâlegak Gûdise taimailiorvigijaksaringilase.

⁵ Iniksarle Nâlekab Gûdipse annerijomârtanga kinguvârêngnipsingnit tamainit atterminut iniksautitsomavlugo, inigijomârtanga tâmna torâvigijaksarivase, tagvungartuksauvluselo;

⁶ Tagvungalo tunergutiksase ôtaksat, tunergutiselo toᴋotaksat, perᴋutipselo tellimaujoangit, aggapselo tunergutingit isautijaksat, angerutigijaselo, tunergutiselo pijârijut, tuktuvaᴋotipselo saugakotipselo pijariorutingit âtaksarivase;

⁷ Tagvanelo nerrijuksauvose Nâlekab Gûdipse sângane, ilipselo inuᴋotiselo ᴋuviasudlartuksauvose aggapse isarutigijangit tamaita Nâlekab Gûdivît saimartitaujutiksautitangit ilipsingnut pivlugit.

⁸ Piniarnerijavut mâne uvlome maliklugit piniartuksaungilase, neliak idluarijaminik piniarmat;

⁹ Tikiutilunginapse sulle merngoerserviksamut kingormgutijaksamullo Nâlekab Gûdivît tunijanganut ilingnut.

¹⁰ Jordanele ikârsimagupsiuk, nunaᴋalerupselo nuname Nâlekab Gûdipse kingormgutijautitangane ilipsingnut, merngoerserviksaᴋartikpaselo ômigijipsingnit tamainit avatipsingnêtunit, terlikluse nunaᴋalerluse;

¹¹ Tagva iniksamut Nâlekab Gûdipse annerijanganut atterminut iniksauᴋovlugo, tagvunga âtaksarivase perᴋojijutigijakka tamaita ilipsingnut; tunergutise ôtaksat, tunergutise toᴋotaksat, perᴋutipse tallimaujoangit, aggapselo tunergutingit issautijaksat, angerutigijaselo annernarnerpat angerutigijase Nâlekamut.

¹² ᴋuviasudlartuksauvoselo Nâlekab Gûdipse sângane, ilipse, erniselo, paniselo, kivgaselo angutit, kivgaselo arnat, Levikullo itertarvipsingnêtut, tâpkoa avigaksarsiᴋatigilungimase kingormgutijaksarsiᴋatigingimaselônêt.

¹³ Udjertoritse tunergutiksatit ôtaksat tunergutigilunginangne iniksane nelianetuinak takojarne;

¹⁴ Iniksarmele Nâlekab annerijangane kinguvârêt ilangane, tagvane tunergutiksatit ôtaksat tunergutigijaksarivatit, tagvanelo piniartuksauvotit tamainik perᴋojijutigijamnik ilingnut.

¹⁵ Taimaigaloartilugole, toᴋotsijungnarpotit nerrilutillo nerᴋiksaujunik itertarvingne tamaine, tarnivît pijomajanga tamât maliklugo; ivsornartok ivsornaitorlo nerrijungnarpuk tagvangat, sorlo imaitomit tagva, tuktungajomit tuktumillônêt.

¹⁶ Kisiane auk nerrijaksaringilase; nunamut kovijaksarivase imeᴋtut.

¹⁷ Itertarvipsingnele nerrijaksaringilase senaugaksaᴋotivît, vaineᴋotivîllônêt, orᴋsuᴋotivîllônêt tallimaujoangit, tuktuvaᴋotivîllônêt saugakotivîllônêt pijariorutingit, angerutaujullônêt neliat angerutigimajatit, tunergutitillônêt pijârijut, aggakpîllônêt tunergutingit isautijat;

¹⁸ Nerrijaksarivatille tamakkoa Nâlekab Gûdivît sângane inime Nâlekab Gûdivît annerimajangane, igvit, ernivîllo, panivîllo, kivgablo angutib, kivgablo arnaub, Levitiojûblo itertarvingnêtûb: ᴋuviasudlartuksauvotillo Nâlekab Gûdivît sângane aggakpît isarutigijangit tamaita pivlugit.

¹⁹ Udjertorit Levitiojok ᴋemadlartauᴋonago nunavit ᴋângane inôtilutit.

²⁰ Nâlekab Gûdivît kigligijatit nerrototikpagit, sorlo angersimagame, oᴋarniaruvillo: Nerᴋetoromavunga, tarnikut ikliGûdlaruvit nerᴋejarmik; tagva tarnivît pijomajanga tamât maliklugo nerᴋetorungnarpotit.

²¹ Iniksak Nâlekab Gûdivît annerijanga atterminut iniksauᴋovlugo ungasiluarpat ilingnit, tagva toᴋotsigit tuktuvaᴋotivît saugakotivîllônêt, Nâlekab tunijangata ilingnut, ilanganik, sorlo perᴋogapkit, itertarvingnelo nerrigit, tarnivît pijomajanga tamât maliklugo.

²² Sorlo tuktungajok tuktulo nerrijauvangmanik, taimak nerrijaksarivakik; ivsornartûb ivsornaitûblo adsigêktomik nerᴋigijaksarivakik.

²³ Kisiane udjertutsiarit nerriᴋonak aungmik, auk inôsiongmat; inôserlo nerᴋe ilagilugo nerrijaksaringilat.

²⁴ Nerrijaksaringilat, nunamut kovijaksarivat imeᴋtut.

²⁵ Nerrijaksaringilat, igvit ᴋitorngatillo kingunerne ᴋanoengitsiarᴋovluse, piniarupse idluarijaujunik Nâlekab takkoane.

²⁶ Tunergutiksangortitatit angerutigisimajatillo kissimik tigumiarlugit aijuksauvotit iniksamut Nâlekab annerijanganut;

²⁷ Tunergutigijatillo ôtaksat tunergutigijaksarivatit, nerᴋingalo aungalo, Nâlekab Gûdivît tunerguservigijangane, tunergutivîllo toᴋotaksat aungit kovijaujuksauvut Nâlekab Gûdivît tunerguservinganut, nerᴋingillo nerrijaksarivatit.

²⁸ Kamagitsiarkit tusâtsiarlugillo oᴋautsit makkoa tamaita perᴋojijutigijakka ilingnut, igvit ᴋitorngatillo kingunerne ᴋanoengitsiarᴋovluse nâksaungitomut, piniaruvit ajungitomik idluarijaujomiglo Nâlekab takkoane.

²⁹ Nâlekab Gûdivît inôᴋatigêksuit aivigijatit pigijomavlugit pêjarpagit sivunernit, pigigungnelo, nunangallo nunagigungne;

³⁰ Udjertorit kajungersartauᴋonak tâpkoa maligomavlugit, asserortauᴋârtilugit sivunerne; Gûdingoangillo aperᴋutiginiarnagit, oᴋarlutit: ᴋanok inôᴋatigêksuit ukkua kivgartorᴋât Gûdingoamingnîk? Taimailioromagama uvanga.

³¹ Taimailiortuksaungilatit Nâlekamut Gûdingnut; tagva Nâlekab maᴋojugijanginik ômigijanginik tamainik Gûditik piniarpait; aglât ernitik panitiglo ôtautipait ikomamut Gûdimingnut.

³² Perᴋojijutigijakka tamaita ilipsingnut kamagijaksarivase piniarlugillo; ilajaksaringilatit ilangeraksaringilatillônêt.