Deuteronomy 11 - Labrador Inuttitut Heritage Bible

¹ Taimaimat Nâlegak Gûdît nagligijaksarivat, tâpsomalo pijomajanga, maligaksauᴋojangillo, idluarsautiksangillo, perᴋojangillo malitsiarlugit tamât.

² Uvlomelo misigitsiaritse; oᴋarviginginapkit ᴋitorngase, ᴋaujimangitut takungitullo Nâlekab Gûdipse sugiarninginik, angijôninganik, agganginiglo pitsartujunik, talinganiglo issangmijomik,

³ Nelunaikutanginiglo, piniarninginiglo piniarnerijanginik Egiptenemiut akorngane Faraomut, Egiptenib ataninganut, nunanganullo ilûnânut;

⁴ Piniarnerijanginiglo Egiptenib sorᴋsuktuksarsoaᴋotinginut, horseᴋotinginut, ᴋamutinginullo; imarbiûb suvloliûb imangit uliktingmagit tâpkoninga, tâpkoa udlaniktilugit ilipsingnik, Nâlekablo asserormagit uvlome tikidlugo;

⁵ Piniarnerijanginiglo ilipsingnut sunaᴋajuitome tikiᴋârtinase tamaunga;

⁶ Piniarnerijanginiglo Dâtanemut Abiramullo, Eliab, Rubenib erningata, ernîgingnut; nunablo ᴋanine aitarmago tâpkoa iglomioᴋatingillo tupingillo maliktullo tâpkoninga tamaita êlugit, Israêlikut ilûnatik akorngane;

⁷ Ijipsele Nâlekab piniarnersoangit tamaita piniarnerijangit takovait.

⁸ Tamanna pivlugo perᴋojat tamaita perᴋojijutigijakka ilipsingnut uvlome maligaksarivase, pitsartusiᴋovluse, iterᴋovluselo nunalo aiviginasuartase pigilerlugo;

⁹ Uvluselo unuksivaliaᴋovlugit nuname Nâlekab angerutigijangane atâtapsingnut, tâpkonunga kinguvânginullo tunijomavlugo, nuname imungmik igupsaujârullo orᴋsuanik kôlingme.

¹⁰ Nuna aivigijase pigijomavlugo nunatut Egiptenetut ᴋemaktapsetut ilingalungilak; tagvane karngasûtiksase karngasulaukpase koverarlugillo itikapsingnut, perorsêviktut tauvluᴋutiksataliktut;

¹¹ Nunale aivigijase pigijomavlugo nunauvok ᴋakᴋalingmik naᴋsalingmiglo, imerporlo ᴋilaub silalunganik;

¹² Nunamik Nâlekab Gûdivît erᴋagijanganik, Nâlekab Gûdivît ijîkita sângavigitsainarpak, jârib pigiarninganit nâninga tikidlugo.

¹³ Imaitsomarporlo, perᴋojakka perᴋojijutigijakka ilipsingnut uvlome kamagitsiarupsigik, Nâlegak Gûdise nagligilugo kivgartorlugolo ômatipsingnut tamânut tarnipsingnullo tamânut,

¹⁴ Tagva nunapse silaluksanga tunijomavara neliuningane, silaluk sivorlek silaluglo kingorlek, katersoijungnarᴋovluse senaugaksapsingnik, vainiksapsingniglo, orᴋsuksapsingniglo.

¹⁵ Iviksukaniglo nergjuteᴋotipse piksanginik tunitjijomavunga perorsêvipsingne, igvillo nerrivlutit aᴋeartolârpotit.

¹⁶ Udjertorupsele ilipsingnik, ômatise uivêrijauᴋonagit, sanguᴋonaselo Gûdib assingit kivgartoromavlugit pâmaktervigivlugillo;

¹⁷ Gûdiblo ningarninga katsungailerᴋonago ilipsingnut, palangairsiᴋonagolo ᴋilangmik silaluᴋonago, nunalo saᴋᴋêᴋonago paungaminik; mânakullo pêjartauᴋonase nunamit piojomit Nâlekab tunijanganit ilipsingnut.

¹⁸ Taimaimat oᴋauserijakka makkoa torᴋorsigik ômoatipsingne tarnipsingnelo; aggapsingnullo ᴋelaksorlugit sorlo nelunaikutarijaksarivase, nêneraksarivaselo ijipse akornganut.

¹⁹ Ajuᴋertûtigijaksarivaselo ᴋitorngapsingnut, oᴋâlautigilugit iglungne iksivatilutit, arvertartilutillo apᴋome, inangatilutit, makisimatilutillo.

²⁰ Aglagaksarivatillo iglovît upkoangata napajûgingnut, itertarvingnullo;

²¹ Uvluse ᴋitorngapselo uvlungit unuksititauᴋovlugit nuname Nâlekab angerutigijangane atâtagijapsingnut tâpkonunga tunijomavlugo, sorlo ᴋilaub nunab ᴋolânêtûb, uvlungititut idlutik.

²² Katsungaidluse perᴋojaᴋ tamanna perᴋojijutigijara ilipsingnut malikupsiuk piniarlugolo, tagva Nâlegak Gûdise nagligijomavlugo, apᴋutauᴋojangillo arvertarvigivlugit, ungagijomavlugolo;

²³ Tagva Nâlekab inôᴋatigêksuit tamakkoa tamaita ᴋemâtitsomârpait sivunapsingne, inôᴋatigêksuillo anginersat pitsartunersallo ilipsingnit pigileromârpase.

²⁴ Itikapse alungita tulerajarvigijangit tamaita pigilârpase; sunaᴋajuitomit Libanonemillo kôngmillo Faratemik taijamit, imarbingmut kangerdlermut kigliviᴋartuksauvose.

²⁵ Sâpsingne nangerungnartokarniatsangilak; Nâlekab Gûdipse nuna ilûnât itikapse tulerajarvigijangat tikitautilârpâ sivôranermut ᴋaggarnermullo pitjutigiluse, sorlo oᴋautingmase.

²⁶ Ahak, uvlome saimartitauneᴋ ôminartungortitaunerlo ilivâka sâpsingnut;

²⁷ Saimartitaunek, maligomagupse Nâlekab Gûdipse perᴋojanginik, perᴋojijutigijamnik ilipsingnut uvlome;

²⁸ Ominartungortitaunerlo, Nâlekab Gûdipse perᴋojangit maligomangikupsigik, sangugupsele apᴋomit perᴋojijutigijanganit ilipsingnut uvlome, Gûdib assingit ilitaringitase maligomavlugit.

²⁹ Imaituksauvorlo, Nâlekab Gûdivît tikiutikpatit nunamut aivigijarnut pigijomavlugo, saimartitaunek oᴋâlautigijaksarivat ᴋakᴋane Geresimeme, ôminartungortitaunerlo ᴋakᴋame Ebaleme.

³⁰ Tâpkoa Jordanib ungatânêngilâk, apᴋosiniûb seᴋiniûb nipiviata tungânêtûb avatâne, Kanaanemiut naᴋsarme nunaᴋartut nunangane, Gilgalib nelâne, Morib napârtungita erᴋânê?

³¹ Ilipse Jordan ikâriaᴋarapsiuk iterᴋovluse nunalo Nâlekab Gûdipse tunijanga ilipsingnut, pigilugo, pigijaksarivaselo, tagvane iniᴋarniarluse.

³² Maligaksallo idluarᴋutiksallo ilijakka sâpsingnut uvlome, kamagijaksarivase piniarlugillo.