Deuteronomy 10 - Labrador Inuttitut Heritage Bible

¹ Neliutome tâpsomane Nâlekab oᴋautivânga: Aglagvîngnik ujarângnik maggûngnik, sivorlik adsîgingnik ulimarit, uvamnullo majorarit ᴋakᴋamut, ᴋejungmillo iklerviliorit ilingnut.

² Aglagvîngnullo tâpkungnunga aglagomavunga oᴋautsinik aglagvîngnêlauᴋtunik sivorlîngne serᴋomitarne, iklervingmullo ililârpakik.

³ Taimaimat iklerviliorpunga ᴋejutsiarmit, aglagvîngniglo ujarângnik maggûngnik ulimârpunga, sivorlîk adsîgingnik, majorarpungalo ᴋakᴋarmut, aglagvîk tâpkoa maggûk tigumiarlugik.

⁴ Aglagvîngnullo aglakpait aglait sivorlit adsingit, perᴋojat 10, Nâlekab oᴋautigijangit ilipsingnut ᴋakᴋarme ikomab iluanit katimaniksûb uvlungane; Nâlekablo tunivait uvamnut.

⁵ Sangulungalo atersârpunga ᴋakᴋarmit, aglagvîglo ilivâka iklerviliarijamnut; tagvanêpuglo, sorlo Nâlekab perᴋongmanga.

⁶ (Israêlikullo aularput Jâkakut puailavinginit Môseramut; tagvanelo Aron toᴋovok; tagvanelo iluvertauvok; erningatalo Eliasarib inangerpâ ajuᴋertuijônerme.

⁷ Tagvangat aularput Gûdgodamut; Gûdgodamillo Jatbâtamut, nunamut kôgarsulingmut.

⁸ Neliutomelo tâpsomane Nâlekab kinguvârêt Levikut ingmikôrtipait akigarᴋovlugit Nâlekab angerᴋatigêngnerijangata iklervinganik, nangerᴋovlugillo Nâlekab sângane tâmna kivgartorlugo, saimarsaiᴋovlugillo tâpsoma atingane, uvlome tikidlugo.

⁹ Tamanna pivlugo Levikut ᴋatangutitik avgoraksarsiᴋatigingilait kingormgutiksarsiᴋatiginagillo; Nâlegak kingormgutigivât, sorlo Nâlekab Gûdivît oᴋautingmagit.)

¹⁰ ᴋakᴋarmelo noᴋangalauᴋpunga, sorlo sivorlermik pigama, uvlunik 40nik unnuaniglo 40nik; Nâlekablo tusarpânga tamattomanetauk; Nâlekab asseroromangilâtit.

¹¹ Nâlekablo oᴋautivânga: Makitit, ingergarlutillo inuit sivorngatigut, tâpkoalo itertuksauvut, nunalo angerutigijara atâtanginut tunijomavlugo tâpkonunga, pigilugo.

¹² Manalo, Israêl, Nâlegak sunamik pijomavâ ilingnît? Imâk kisiane: Nâlegak Gûdît sivôragigangne, arvertarniaravillo tâpsoma apᴋutauᴋojangine tamaine, nagligilugolo, Nâlegarlo Gûdît kivgartorniarangne ômatingnut tamânut tarningnullo tamânut.

¹³ Malingniaravillo Nâlekab perᴋojanginik maligaksauᴋojanginiglo perᴋojijutigijamnik ilingnut uvlome idluarᴋutiksarnut.

¹⁴ Ahâk, Nâlekab Gûdivît pigivait ᴋilak, ᴋilaillo ᴋilangat, nunalo, tâpsomanêtullo tamaita.

¹⁵ Nâlekable atâtagijatit ᴋuviagilaukpait nagligijomavlugit, tâpkoalo kingorngane kinguvângit annerivait, tagva ilipse, inôᴋatigêksoarnit tamainit, sorlo uvlome ingmat.

¹⁶ Taimaimat ômatipse uviningat kipiniarsiuk, ᴋeratajuniglo ᴋongaseᴋarniarase.

¹⁷ Nâlegak Gûdise tâmnaungmat Gûdit Gûdigijangat, nâlekallo Nâlegarijangat, Gûde angijok, pitsartudlartok kapianadlartorlo, inuit kinauninginik kamangitok, piliusianiglo tigusitsangitok.

¹⁸ Iliarsuit uigarnerillo idluartomik piniarvigivait, takorngartarlo nagligilugo tunitjivigivâ nerᴋiksamik annorâksaniglo.

¹⁹ Taimaimat ilipsetauk takorngartak nagligisiuk, takorngartaulaurapse nuname Egipteneme.

²⁰ Nâlegak Gûdît sivôragijaksarivat, tâmnalo kivgartoraksarivat; tâpsomunga ungajuksauvotit, tâpsomalo atinga tailugo angermariktuksauvotit.

²¹ Tâmna nertornautigivat, tâmnalo Gûdigivat, tâpsoma piniutipâtit angijunik kapianadlartunik makkoninga ijikpît takojanginik.

²² Atâtagilauᴋtatit atersâlauᴋput Egiptenemut tarnelit 70ovlutik, mânalo Nâlekab Gûdivît ᴋilaub uvloriangititut unuktigitipâtit.