Deuteronomy 1 - Labrador Inuttitut Heritage Bible

¹ Tamadja oᴋautsit Mosesib oᴋauserijangit Israêlikunut tamainut Jordanib ungatâne, sunaᴋajuitome, naᴋsarsoarme Sufib nelâne, Pâraniblo, Tôfeliblo, Lâbaniblo, Hâzarotiblo, Di-zahâbiblo akorngane.

² Horebemit Kades-barneamut ᴋakᴋaak Seir apᴋotigilugo ingergarviosôngovok uvlunik 11nik.

³ Jârillo 40ingita takᴋingita eleveningata uvlungita sivorlerpângane, Mosesib Israêlikut oᴋâlavigivait perᴋojanik tamainik Nâlekab tunijanginik tâpkonunga tâpsomuna.

⁴ Sâlagisimaᴋârlugik Sihon, Amorikut ataningat, Hesbo neme igloᴋartok, Ogelo, Bâsanib ataningat, Astaroteme igloᴋartok, Edreime,

⁵ Jordanib ungatâne, Moabekut nunangane, Mosesib perᴋojat makkoa oᴋâlautigilerpait, oᴋarlune:

⁶ Nâlekab Gûdipta oᴋarvigivâtigut Horebeme, oᴋarlune: Nâmaktomik ᴋakᴋaak tamanna ᴋikarvigivase;

⁷ Sanguleritse, ingergarluselo aileritse Amorikut ᴋakᴋaanginut senilinginullo tamainut naᴋsarsoarme, ᴋakᴋaanelo, naternamelo, seᴋernganelo, imarbiublo kiglingane, nuname Kanaaneme, Libanonemelo, kôksoak Farat tikidlugo.

⁸ Ahâk, nuna angmarpara ilipsingnut; tagvungarluse pigilersiuk nuna angerutigilauᴋtara atâtapsingnut, Abrahamut, Isaarmullo, Jakomullo, tunijomavlugo tâpkonunga kinguvânginullo kinguningine inôjunut.

⁹ Uvangalo oᴋarvigilauᴋpapse taipsomane, oᴋarlunga: Inutôvlunga erᴋsugungnangilapse;

¹⁰ Nâlekab Gûdipse unuksitisimavâse, ahâglo, uvlome ᴋilaub uvloriangititut unuktigivose.

¹¹ Nâlekab atâtapse Gûdingata unuksivaliatilise tausendêrtortomik mânamit, saimartiliselo sorlo angervigilaungmase.

¹² ᴋanok uvanga kissimetôvlunga erᴋsugungnarᴋingâ siarklerutigijapsingnik, oᴋumainipsingniglo, akkerartortigêngnipsingniglô?

¹³ Annerosugitse angutinik silatujunik, ilisimajuniglo, erᴋarnartuniglo kinguvângoᴋatigêngnipsingnit, angajokângortitsomavakkalo ilipsingnut.

¹⁴ Kiovapsingalo oᴋarluse: Oᴋautigijat idluadlarpok, taimailioromavogut.

¹⁵ Taimaimat kinguvârêngnipse angajokângit, angutit silatujut erᴋarnartullo tiguvakka angajokângortilugillo ilipsingnut, angajokât tausendenut, angajokât hundertenut, angajokât 50nut, angajokâllo 10nut, kinguvârêngnise maliklugit.

¹⁶ Taipsomanelo idluarsaijokotise perᴋolauᴋpakka, oᴋarlunga: Katangutipse pitjutingit nâlaksigik, idluartomiglo idluarsaigitse inuk ᴋatangutâlo takorngartarlo ilipsingnêtok pivlugit.

¹⁷ Inûb kinauninga kamagijaksaringilase idluarsainerme; mikijok angijorlo adsigêktomik tusaraksarivase; sivôrajuksaungilase inûb kênanganik, idluarsaineᴋ Gûdib pigingmago; pitjutillo oᴋumaigijase uvamnut ᴋaitaksarivase, tusaromavakkalo.

¹⁸ Taipsomanelo perᴋolauᴋpapse piniaraksarijapsingnik tamainik.

¹⁹ Aulalaukpogullo Horebemit, sunaᴋajuitorlo tâmna angijok sivôranartorlo takojase tamât ingergarvigivlugo, Amorikut ᴋakᴋangit apᴋutigilugit, sorlo Nâlekab Gûdipta perᴋongmatigut, tikipogullo Kades-barneamut.

²⁰ Oᴋautivapselo: Tikisimavose Amorikut ᴋakᴋanginut, Nâlekab Gûdipta tunijanganut uvaptingnut.

²¹ Ahâk, Nâlekab Gûdivit nuna angmarpâ sivunerne; takpaungarit piginiarlugolo, sorlo Nâlekab atâtagijavit Gûdingata oᴋautingmatit; sivôraniarnak kapiasudlarniarnaglo.

²² Tagva tamapse aivigivapsinga oᴋarluselo: Sivunaptingne tiliklerta angutinik, nunamik nautsertoriartortuksanik, oᴋariartormiᴋovlugit uvaptingnut apᴋut majorarvigijaksarijavut pivlugo, iglugasaksuillo tikiviginiartavut pivlugit.

²³ Tamannalo nâmagigapko, ilase angutit 12 annerivakka, kinguvârêngnipsingnit tamainit tamât atautsemik;

²⁴ Tâpkoalo sangulutik majorarput ᴋakᴋaamut, tikiutilutiglo Eskolib naᴋsanganut nautsertorlugolo.

²⁵ Nunablo paungangita ilangit tigumiarlugit tikiutivait uvaptingnut, unipkautivâtigullo, oᴋarlutik: Nunatsinagovok Nâlekab Gûdipta tunijanga uvaptingnut.

²⁶ Ilipsele majoraromalaungilase, Nâlekable Gûdipse perᴋojanga tapagivase.

²⁷ Tupipsingnelo oᴋarnilutjivose, oᴋarluse: Nâlekab ômigidlarmatigut tikiupâtigut nunamit Egiptenemit, tunijomavluta Amorikut agganginut, asseroromavluta.

²⁸ Namungalerᴋitâ? ᴋatangutipta ômativut mungortipait, oᴋarlutik: Inuit tâpkoa sôngonersauvut anginersauvlutiglo uvaptingnit, iglugasaksuillo angijôdlarlutik avaluᴋarput ᴋilangmut tôᴋtunik; amalotauᴋ Enakib erningit takovavut tagvane.

²⁹ Oᴋautivapselo: Kapiasudlarniarase, sivôraniarasigiglo.

³⁰ Nâlegak Gûdise sivorlerijase sorᴋsulârpok pivluse, taimaluatsiak sorlo piniulaungmase Egipteneme ijipse sângine;

³¹ Sunaᴋajuitomelo, takovigijarne Nâlekab Gûdivit nangmarmatit, sorlo angutib ernine nangmarmago, apᴋome ingergarvigijarne nâvlugo, tikiutiᴋârtinak tamaunga.

³² Taimaigaloartilugole, Nâlegak Gûdise okpervigingilase;

³³ Sivorlertok ilipsingnik apᴋome tangmârviksarsiorluse, ikomakut unnuarme, unertutjivigijomavluse apᴋotiksapsingnik, nuvujakullo uvlôtilugo.

³⁴ Nâlekablo oᴋausipse nipingat tusarpâ, ningarlunelo, angermariklunelo oᴋarpok:

³⁵ Angutit ukkua kinguvârêt idluitut ilangata atautsiblônêt nuna ajungitok angerutigilauᴋtara tunijomavlugo atâtanginut, takojaksaringilâ,

³⁶ Kissime Kâleb, Jefunib erningata, takolârpâ; tâpsomungalo nuna pisugvigijanga tunijomârpara, ᴋitornganginullo, ilungertorlune Nâlegak malinamiuk.

³⁷ Nâlekablo ningarilaurivânga ilipse pitjutigivluse, oᴋarlune: Igvittauᴋ tagvunga pijuksaungilatit;

³⁸ Josuale, Nunib erninga, sângne nangertok, tâmna tagvungartuksauvok; tâmna maksuatiuk; tâpsoma Israêlikut kingormgujititaksaringmagit tâpsominga.

³⁹ Kitorngaselo aᴋsârnigauniarnerartase, sorusiselo, uvlome ᴋaujingitut ajungitomik ajortomiglônêt, tâpkoa tagvungartuksauvut, tâpkonungalo tunijomavara, tâpkoalo pigilârpât.

⁴⁰ Ilipsele sanguleritse, ingergarluselo sunaᴋajuitomut apᴋut imarbingmut suvlolingmut sangmijok apᴋutigilugo.

⁴¹ Tagva kiovluse oᴋautivapsinga: Nâlegak idluitulivigivavut, majoraromavogut sorᴋsuklutalo, Nâlekab perᴋojangit tamaita uvaptingnut maliklugit. Ilûnaselo sakkose sorᴋsugûtit ᴋettipsingnut ᴋelaksorpase, katsungailerposelo ᴋakᴋamut majoraromavluse.

⁴² Nâlekablo oᴋautivânga: Oᴋautikit, majorarniarase, sorᴋsungniaraselônêt; uvanga akunapsingnêlunginama; ômigijipse sânginit ᴋemâtitaudlarᴋonase.

⁴³ Tamattomingalo oᴋautilauᴋpapse, tusâlungilasele; Nâlekable perᴋojanga tapagivase, pimariuterluselo majorarpose ᴋakᴋamut.

⁴⁴ Amorikullo, nunaᴋartut ᴋakᴋame tâpsomane, anivut pâriartorluse ᴋemâtipaselo, sorlo igupsat pivangmatta, sâlagivâselo Seireme, Horma tikidlugo.

⁴⁵ Uterposelo ᴋeavluselo Nâlekab sângane, Nâlekable nipise kamagingilait tusaromangilâselo.

⁴⁶ Taimaimat uvlut unuktut nâvlugit ᴋiᴋalauᴋpose Kadeseme, akunit tagvanêlaukpose.