Daniel 8 - Labrador Inuttitut Heritage Bible

¹ Ataniub Belsazarib atanioningata jâringita pingajuani takotitjut saᴋᴋipoᴋ uvamnut Danielimut, sivorngani uvamnut saᴋᴋitûb kingorngani.

² Takotitjumilo takovunga; takogamalo imailingavoᴋ, igluᴋsoarmêpunga Susami, nunami ingmikôrtomi Elamamik attilingmi; takotitjumilo takovunga, kôblo Ulaimik attiliub sinânêpunga.

³ Ijîkkalo arlortipâka takolungalo, ahâglo, kôb nalâni saugaᴋ parngniᴋ maggungnik nakjulik nangipoᴋ; nakjuglo poᴋtovuk; aipâli poᴋtoluarpoᴋ aipaminit, poᴋtonisarlo kingorliovluni nuitavoᴋ.

⁴ Takovunga, saugarlo parngniᴋ paunga, avungalo, aungalo nakjumigarpoᴋ, nigjutillo naliallônêt nangirungnangilaᴋ sângani, piuliklitoᴋarungnangilarlônêt tâpsoma agganginit; issumaminigli piniarpoᴋ, angijorortilunilo nangminiminik.

⁵ kamatilungalo, ahâk, tuktungajoᴋ parngniᴋ allakarpoᴋ kangianit nunab ilûnani ᴋolâni, nunali aktornago, tuktungajorlo nakjuᴋarpoᴋ pirosimatsiartomik ijîgita akorngangni.

⁶ Tikiporlo saugarmut maggungnik nakjulingmut takojamnut kôb nalâni, pangalikvigilugolo pitsartuniminut ilûnânut.

⁷ Takovaralo sauᴋab ᴋanitanganut tikitoᴋ, ômigidlarlugolo saugaᴋ aporpâ nakjûgik tamarmik naplorlugik; saugarlo nukkiᴋangilaᴋ sângani nangiluni, tâpsomali nunamut igipâ tullirajârlugolo; piuliklituksaᴋangilarlo saugarmik tâpsoma agganginit.

⁸ Tuktungajorlo parngniᴋ nitortipoᴋ nangminiminik angijoᴋsoarmik; nukkiᴋaluangotilugolo, nakjuksoaᴋ nakarpoᴋ; tâmnali inangilugo nakjut pirosimatsiartut sitamat nuiliput ᴋilaub anoringit sitamat sângalugit.

⁹ Tâpkoalo ilanganit nakjuk mikijoᴋ nuilipoᴋ, Angijororpâdlarlunilo aungalo taunungalo nunamullo alianartomut.

¹⁰ Angijororporlo ᴋilaub katimgajoᴋsoangit tikidlugit aglât; katimgajoᴋsuillo ilangit uvloritjallo ilangit nunamut igipait tullirajârlugillo.

¹¹ katimgajoᴋsuit nâliganganut aglât angijorortipoᴋ, aᴋsârpâlo tunigutinik nokᴋajuitunik, iningalo ivsornaitovik oggotitauvoᴋ.

¹² katimgajoᴋsuillo tunijauvut tâpsomunga tunigutit nokᴋajuitut ilaliudlugit, idluinikut; miksiᴋârnilo igipâ nunamut, ᴋuviagijaminiglo piniarpoᴋ pilluangosilunilo.

¹³ Ivsornaitullo ilangat oᴋartoᴋ tusarpara; ivsornaitorlo tâpsoma assia oᴋarpoᴋ tâpsomunga oᴋartomut: Kanoᴋ sivitutigilârᴋâ takotitjut tunigutit noᴋajuitut pivlugit, idluinilo assirosaijoᴋ pivlugo, ivsornaitovik katimgajoᴋsuillo tullirajârtaungmattâ?

¹⁴ Oᴋautivângalo: Unnut uvlâllo 2,300 nâvlugit; taipsomanilo ivsornaitovik idluarsititaujomârpoᴋ.

¹⁵ Pivorlo, uvanga Danieli, takotitjut tâmna takogapko, tukkigijanga tukkisinasuarpara; ahâglo, angutitut tautulik nangipoᴋ sâmni.

¹⁶ Tusarpungalo inûb nippinganik kôb Ulaiib sanirâkita akorngangnit, ᴋaigarsuktomik oᴋartomiglo: “Gabriel, angut una ajoᴋitoruk takotitjutib tukkigijanganik.”

¹⁷ Nangivingma ᴋanitanganôrpoᴋ tagva; tikingmallo iᴋsilipunga, pâmaklungalo kênara pûlugo; oᴋautivângali, Tukkisilirit, inûb ininga, naggatiksab naliuniksanganut ilingangmat takotitjut tamanna.

¹⁸ Oᴋausiᴋartilugo uvamnut ᴋaujimangipunga, kênara nunamut pûtilugo; tâpsomali aktorpânga, makitilungalo nangivigilauᴋtamni.

¹⁹ Oᴋarporlo: Nalonaijaivigijomavagit pijomârtuksanik ningarnirub naggatiksangata tungâni; naggatiksab naliuninganut kajusijutaujomut ilingangmat.

²⁰ Saugaᴋ parngniᴋ takojat maggungnik nakjulik, tagva Medenimiut Persiamiullo atanîgik.

²¹ Tuktungajorlo parngniᴋ tagva Griggit ataningat; nakjuglo angijoᴋ ijîkita akorngangnêtoᴋ, tagva ataningat sivorliᴋ.

²² Tâmnalo navingmat, sitamat inangêniartilugit tâpsominga, tagva ataniovît sitamat nuiliromârput nunaᴋatigêksoarnit tâpkonangat, ipsomali pitsartuninga piginago.

²³ Ataniovingitalo naggatiksangita tungâni, idluitulivaliatuinarpatta, ataniᴋ, iᴋsinartomik kênalik, nalonartuniglo tukkisijoᴋ, nikovitsomârpoᴋ.

²⁴ Tâpsomalo pitsartuninga sôngodlaromârpoᴋ, pitsartuniminu-ungitorli; tatamnadlartomiglo assiroijomârpoᴋ, pilluangovlunilo nâmagijaminik piniaromârpoᴋ; pitsartujullo assiroromârpait ivsornaitut ilaliudlugit.

²⁵ Silatuniminullo pingitsitorniᴋ sulidlartilarpâ; angijorortitsomavorlo nangminiminik ômatimini: unuktullo ilimasungimariktut assiroromârpait; makitaliromârpoᴋ aglât nâlikat Nâliganganut; siᴋomitaujomârporli aggangmu-ungitoᴋ.

²⁶ Unnut uvlâllo takotitjutingat tamanna oᴋautigijaujoᴋ miksiᴋârpoᴋ; igville takotitjut ijitoruk, uvlunut ᴋaijomârtunut ilingangmat.

²⁷ Uvangalo Danieli ᴋaujimangipunga, uvlullo ᴋapsit nâvlugit ᴋanimavunga; kingornganili makipunga, atanimullo suliangoᴋojaujut suliarivakka; takotitjulli tataminiarutigivara, tamannali malugijaulungilaᴋ kimut.