Daniel 7 - Labrador Inuttitut Heritage Bible

¹ Belsazarib, Babilonib ataningata, jâringita sivorlipângani, Danieli sinnartômavluni takotitjumik takovoᴋ niaᴋomigut, iglimini inangagami: sinnartômaniᴋ tagva aglagutigivâ, pijoᴋartullo unipkautigilugit.

² Danielilo niplipoᴋ oᴋarlunilo: Unnuarmi takotitjutipkut takovunga, ahâglo, ᴋilaub anoringit sitamat imarbiksoarmut tikiput.

³ Omajullo angijut sitamat ᴋaᴋivut imarbingmit, ilûnatik adsigêngitut.

⁴ Sivorliᴋ loivitun-ipoᴋ, isaroᴋarluni naktoraliub pingatut: takonârpunga isarungit iritartauᴋârtinagit, nunamillo ᴋangatartitauvoᴋ nikovititauvlunilo itikamingni maggungni inuktut, tunitjiviovorlo inûb ômatinganik.

⁵ Ahâglo, ômajub tâpsoma assia, tuglia, nanoᴋtun-itoᴋ, nikovipoᴋ, sigguminilo kigutimi akorngani tôgâᴋarpoᴋ pingasunik: tâpkoalo oᴋautivât: Nikovigit niᴋitorlutillo angijomik.

⁶ Mattoma kingorngani takonârpunga, ahâglo, assia, pûsivâluktut, ᴋatigaminilo isaroᴋarpoᴋ sitamanik tingmiab pingatut; ômajorlo tâmna niaᴋoᴋarpoᴋ sitamanik; tunitjiviovorlo nâlegaunimik.

⁷ Mattoma kingorngani takotitjunik takovunga unnuarmi, ahâglo, ômajut sitamangat, takominaidlartoᴋ iᴋsinadlarlarmelo, sangijoᴋsôdlarlarmilo; kigutiâluᴋarpoᴋ kikiangnik: nirridlarpoᴋ siᴋalitsilunilo, amiakôjullo tullirajârpait itikaminut; ômajullo sivorlini adsigilungimarikpait; nakjuᴋarporlo 10nik.

⁸ Nakjuillo ᴋimigovakka, ahâglo, tâpkoa akorngani nakjuit tâpkoa assia, mikijoᴋ, nuivoᴋ, tâpsomalo nuijûb ininganit nakjuit pingasut sivorlit nusuktauvut; ahâglo, nakjungmi ijiᴋarpoᴋ inûb ijingititut, ᴋaniᴋarlunilo oᴋausisoarnik oᴋâlajomik.

⁹ Takonârpunga iksivautaᴋsuit ilijauᴋârtinagit, uvlullo inuᴋoartungat ingipoᴋ; annorângit aputitut ᴋaᴋortigivut, niaᴋungatalo nujangit saukat miᴋungititut iput; iksivautaᴋsoanga ikoâlajoinaujotut ipoᴋ, aksaloangillo ikomauvut ikoâlajoᴋ.

¹⁰ Sânganit aularluni kôk ikomainaujoᴋ kôkpoᴋ; tausendit tausenditorlugit kivgartorpât, 10tausendillo 10tausenditorlugit nangiput sângani; iᴋartuivik pigiarpoᴋ, aglaillo makpitauvut.

¹¹ Takonâdlarpunga taipsomani oᴋausisuit, nakjûb oᴋausirijangita nipingat pitjutigivlugit; takonârpunga ômajoᴋ toᴋotauᴋârtinago, timingalo assirotauvluni, ikoâlatiksangortitauvluni ikomamut.

¹² Omajullo tâpkoa assingita nâligauningit aᴋsârnigauvut; inôsingilli piganititauvut piviksaᴋ naliuniksarlo nâvlugit.

¹³ Takotitjutini unnuarmi takovunga, ahâglo, ᴋilaub nuvujangini ᴋaijoᴋarpoᴋ inûb iningatun-itomik, tikiporlo uvlut inuᴋoartunganut, âpâllo tâpsoma sânganut.

¹⁴ Tunitjiviovorlo nâlegaunimik, ânanaunimiglo, ataniovingmiglo, inôᴋatigêt, nunaᴋatigêllo, oᴋausiᴋatigêllo ilûnatik kivgartorᴋovlugit tâpsominga; nâligauninga nâligauniovoᴋ issoᴋangitoᴋ, sorairniangilaᴋ, atanioningalo assirotauniatsangilaᴋ.

¹⁵ Uvangali Danieli, aninira kiksarpoᴋ timimni, niaᴋumalo takotitjutigijangita ulapipânga.

¹⁶ Najornikpunga tagvani nangitut ilanganik, ᴋinuvigivlugolo ᴋaujititaujomavlunga tamakkoa ilûnatik ᴋanoᴋ tukkiᴋarmangâta. Oᴋautivânga tagva, nalonaijaivigivlungalo tukkigijanginik.

¹⁷ Omajut angijut ukkoa sitamat ataniovut sitamat sakᴋiromârtut nunami.

¹⁸ Kotsingnipângojûbli ivjornaitoᴋotingita ataniovik pigilârpât, piᴋutigitsainarlugolo, ilâ, issoᴋangitoᴋsoarmut aglât.

¹⁹ Tusudlarpunga tagva ᴋaujititaujomavlunga ômajut sitamangat pivlugo, tâmna assiminit tamainit assiangongmat, iᴋsinartoᴋsoaᴋ, kigutilik kikiangnik, kukiliglo ᴋaᴋorlinik; nirridlartoᴋ siᴋalitsidlartorlo, tullirajârijorlo amiakôjunik itikaminut;

²⁰ Nakjuillo 10 niaᴋunganêtut pivlugit, nakjuglo tâpkoa assiat nuijoᴋ, tâpsomalo nuiviani pingasut katakput; ilâ, nakjuk imna ijilik, ᴋaniliglo oᴋausisoarnik oᴋâlajomik, angiluartorlo saniliminit.

²¹ Takonârpunga, ahâglo, nakjûb tâpsoma ivsornaitut sorᴋsugvigivait, sâlagilugillo.

²² Uvlut inuᴋoartungat tikerᴋârtinago, ᴋotsingnipângojûb ivsornaitungit idluarsartauvut; naliutivorlo ivsornaitut ataniovik pigilimatsuk.

²³ Imâk oᴋarpoᴋ: Omajut sitamangat tagva ataniovît nunami sitamaksangat, ataniovît assingit tamaita adsigingilait, nunaᴋsoarlo ilûnât êjomârpâ, tullirajârlugolo, sikalilugolo.

²⁴ Nakjuillo 10 tagva atanît 10 ataniovingmit tamattomangat makitsomârtut; tâpkoalo kingorngani assia makitsomârpoᴋ; tâpsomalo sivorlit adsiginiangilait, atanîllo pingasut oggotitsomârpait.

²⁵ Tâpsomalo ᴋotsingnipângojoᴋ oᴋarnilutigijomârpâ, ᴋotsingnipângojûblo ivsornaitungit unangmidlarlugit; issumaᴋalârporlo naliunirit piᴋojallo ablatsangortitsomavlugit, tâpkoalo tunijaujomârput tâpsoma agganginut naliutoᴋ, naliutullo, naliutûblo abvanga nâvlugit.

²⁶ Tagva iᴋartuivik naliutilârpoᴋ, aᴋsârnigomârpullo tâpsoma nâligauninganik, suksaujungnaitilugo assirolugolo naggatiksaᴋ tikidlugo.

²⁷ Atanioviglo nâlegaunilo ataniovîllo angijôningit ᴋilaub ilûnani atâni tunijaujomârput ᴋotsingnipângojûb ivsornaitungita inunginut; tâpsoma ataniovinga atanioviovoᴋ issoᴋangitoᴋ, nâligaunirillo ilûnatik kivgartoromârpât nâlaklugolo.

²⁸ Tamakkoa tagva nâvut tamâni. Uvangali Danieli, issumama ulapidlarpânga, tautugalo ablatsangolipoᴋ; tamannali torᴋorpara ômatimni.