Daniel 6 - Labrador Inuttitut Heritage Bible

¹ Dariusib idluarivâ ataniovingmut atanirusit 120 ililugit, atanioviub ilûnanganut pijuksat;

² Tâpkonungalo angajoᴋâᴋsuit pingasut ilivait, tâpkoalo ilangat, tagva Daniel; atanirusit kigligiksariaᴋarput pimaklinimingnik tâpkonunga, ataniᴋ sumut tiliartauᴋonago.

³ Daniel iᴋanarnipauvoᴋ angajoᴋâᴋsoarnit atanirusinillo, piojomik aniniᴋarami ilumini, atanilo issumaᴋalipoᴋ angajoᴋâᴋsoangortitsomavlugo ataniovingmut ilûnânut.

⁴ Angajoᴋâᴋsoâgli atanirusillo pasiklirutiksarsiorasuarput Danielimut ataniovik pitjutigivlugo; piviksamigli pasiklirutiksamiglônêt nagvângilat, tâmna nitornadlarmat, pilungnimiglônêt idluitomiglônêt nagvârviongilaᴋ.

⁵ Tagva angutit tâpkoa oᴋarput: Danielimut tâpsomunga pasiklirutiksarsiniangilagut, kissiani Gudingata piᴋojangit pitjutigivlugit nagvârvigiguptigo.

⁶ Angajoᴋâᴋsoâgli atanirusillo ilagêklutik katimavut atanimut, oᴋautilugolo imâk: Ataniᴋ Darius, issoᴋangitomut inôtsainarit.

⁷ Atanioviub angajoᴋâᴋsoâgik, tilijaujullo, atanirusillo, atanituijullo, aulatsijullo ilûnatik kajusiᴋatigêkput ataniᴋ piᴋojaᴋartitsijuksaungmat, sôngojomiglo initirijutiksaliorluni, kinalônêt ᴋinulipat sumik gudit inuillônêt nalianit, igvit assingnit, ataniᴋ, uvlut 30 nâvlugit, tâmna loivit itisâluanut igitaksaungmat.

⁸ Mâna, ataniᴋ, initirijutiksaᴋ palangairlauruk, aglaillo nalonaikusikit, soᴋosirungnaiᴋovlugit, Medenimiut Persiamiullo piᴋojangit soᴋosirungnangitut maliklugit.

⁹ Tamanna pivlugo ataniub Dariusib aglait initirijutiksat nalonaikusipait.

¹⁰ Danielilo ᴋaujilirami aglait nalonaikusitauninginik, majuarpoᴋ iglominut, (igalângit taima iglominêtut Jerusalimut sângajut upkoêrput) siᴋortorporlo pingasuitorluni uvloinaᴋ, tuksiarlunilo Gudine ᴋujagivâ, sorlo sivorngani ilusiᴋarami.

¹¹ Tagva angutit tâpkoa ilagêklutik katimavut, Danielilo naipipât ᴋinuluni tuksiarlunilo Gudiminut.

¹² Kaivut tagva, oᴋarlutiglo ataniub sângani ataniub initirijutinga pitjutigivlugo: Initirijutiksaᴋ nalonailingikiûk, angutit naliallônêt ᴋinulipat gudit inuillônêt nalianit, igvit assingnit, ataniᴋ, uvlut 30 nâvlugit, igitaksaungmat loivit itisâluanût? Kiovlunilo ataniᴋ oᴋarpoᴋ: Tamanna, nalautsivoᴋ, Medenimiut Persiamiullo piᴋojangit soᴋosirungnangitut maliklugit.

¹³ Tâpkoalo kiovut oᴋarlutiglo ataniub sângani: Danielib ipsoma, Judit aularutijaujut ᴋitorngangita ilangata, kamagingilâtit, ataniᴋ, initirijutiksarlônêt nalonaikusilauᴋtat, uvloinarli pingasuitorluni tuksiarsôngovoᴋ.

¹⁴ Ataniub tagva oᴋautsit tâpkoa tusaramigit, angijomik annupoᴋ, ômatiminilo kajusivoᴋ Danieli piulijomavlugo; siᴋiniubli nipininga tikidlugo ilungitorluni piulinasuarpâ.

¹⁵ Tagva angutit tâpkoa ilagêklutik kativut atanimut, oᴋautilugolo: Nalungilatit, ataniᴋ, Medenimiut Persiamiullo piᴋojangit imaingmatta, initirijutit piᴋojallo naliallônêt ataniub palangairtanga soᴋosititaujungnangimat.

¹⁶ Ataniᴋ piᴋojivoᴋ tagva, Danielilo ᴋaipât igilugolo loivit itisâluanut. Ataniublo nipliluni Danieli oᴋautivâ: Gudivît soraijuitomik kivgartortavît piuliniarpâtit.

¹⁷ Ujaraᴋsoarlo ᴋaitauvoᴋ, ilivâlo itisâlub pânganut, ataniublo nalonaikutaminut nâligarijamilo nalonaikutanganut nalonaikusipâ, kajusijutaujoᴋ Danieli pivlugo soᴋosertitauᴋonago.

¹⁸ Atanilo igloᴋsoaminut angirarpoᴋ, nirritailivlunilo unnuaᴋ nâvlugo; nipjausijartoᴋangilarlo sângani, sinigungnangilarlo.

¹⁹ Uvlârarsukut tagva ataniᴋ makipoᴋ, tuavidlunilo loivit itisâluanut aivoᴋ.

²⁰ Itisâlublo pânganut Danielimut tikigami, ᴋaigarsukpoᴋ nippimut ârusuktomut; niplilunilo ataniub Danieli oᴋautivâ: Daniel, Gudib ômajub kivganga, Gudivît kivgartutsainartavît piulijungnarᴋâtît loivinît?

²¹ Danieliblo ataniᴋ oᴋautivâ: Ataniᴋ, issoᴋangitomut inôtsainarit.

²² Gudima ingilini tilivâ loivillo siggungit ipumingatipait, tâpkoalo idluiliorvigilungilânga; pasijaksaulunginama tâpsoma sângani; igvillotauᴋ sângni, ataniᴋ, idluitulilaungilanga.

²³ Tagva ataniᴋ angijomik ᴋuviasudlarpoᴋ, Danielilo ᴋaitauᴋovâ itersâlungmit. Taimaimat Danieli ᴋaᴋipât itisâlungmit, ᴋanoitomiglo sumiglônêt malungnartoᴋangilaᴋ tâpsomani, Gudini tatigingmago.

²⁴ Atanilo piᴋojivoᴋ, ᴋaipaillo angutit ipkoa pasiklilauᴋtut Danielimik, igipaillo loivit itisâluanut, tâpkoa, ᴋitorngangillo, nuliangillo; loivillo pâvait, sauningillo ilûnaita siᴋalilugit, itisâlub natinganut tulaumariᴋârtinagit.

²⁵ Ataniub Dariusib tagva inôᴋatigêt, nunaᴋatigêllo oᴋausiᴋatigêllo tamaita, nunani tamaini iniᴋartut, aglarvigivait: Ulapirᴋsaut aglivaliali ilipsingnut.

²⁶ Piᴋojivunga ataniovingma nunangini tamaini inuit sajuktuksaungmatta sivôralutiglo Danielib Gudingata sângani; tâmna Gudeongmat ômajoᴋ, itsainartoᴋ issoᴋangitomut, ataniovingalo assirojuitôvoᴋ, nâligauningalo naggatiᴋarniatsangilaᴋ;

²⁷ Piuliklipoᴋ saputjivlunilo, nalonaikutanik tatamnartuniglo piniarpoᴋ ᴋilangmilo nunamilo; tâpsomalo Danieli piulivâ loivit pitsartuninginit.

²⁸ Danielilo tâmna pilluangolipoᴋ Dariusib atanioningani, Korasiblo Persiamiojub atanioningani.