Daniel 5 - Labrador Inuttitut Heritage Bible

¹ Atanik Belsazar angijomik nirrimâraksarmik âᴋiksoilauᴋpoᴋ nâlikaminut tausendinut, vainitoᴋatigilugillo tâpkoa tausendit.

² Vainitorsimavlunilo Belsazar piᴋojivoᴋ ᴋajûtat goldiojut silbiriojullo ᴋaitauᴋovlugit, atâtami Nebukadnezarib aᴋsârnigarijaviningit katimaviksoarmit Jerusalimêtomit; ataniᴋ nâlikanilo nuliangillo panervgangillo imirungnarᴋovlugit tâpkonangat.

³ Tagva ᴋaipait ᴋajûtat goldiojut aᴋsârnigarijaulauᴋtut katimaviksoarmit Gudib iglunganit Jerusalimêtomit; atanilo nâligarijangillo nuliangit panervgangillo imiput tâpkonangat.

⁴ Vainitorput, nitorpaillo gudingoat goldimit silbirimillo, ᴋaᴋorlimit, kikiangmillo, ᴋijungmit, ujarᴋanillo sanamajut.

⁵ Stundimilo tâpsomanitsainaᴋ inûb aggangit saᴋᴋijârput, aglalutiglo nanniroaᴋarviub nalâni ataniub igloᴋsoangata ᴋarmangani maggasajami; ataniub aggait aglaᴋtut takovait.

⁶ Tagva ataniub tautua ablatsangorpoᴋ, iᴋarsautingitalo ulapipât; okpatîgiglo ᴋassuvuk, siᴋûgiglo apukalâgutivuk.

⁷ Atanilo nippiᴋortovluni ᴋaigarsukpoᴋ angakuit, Kaldêarillo, uvloriaᴋsiortillo itititauᴋovlugit. Ataniublo Babilonib ilisimajungit oᴋautivait: Inuit naliat aglangnik tâpkoninga atuarsijungnartoᴋ, nalonaijaivigilungalo tukkigijanginik, annorârtaulârpoᴋ aupaloriktunik, ujamiktauvlunilo goldiojunik ᴋongisimigut, nâligauvingmalo pingajuanut ataniolârpoᴋ.

⁸ Ataniublo ilisimajungit ilûnatik itiput tagva, aglaᴋsimajulli atuarungnangilait, atanilônêt nalonaijaivigijungnarnago tukkigijanginik.

⁹ Tagva ataniᴋ Belsazar angijomik ulapitauvoᴋ, tautualo ablatsangorpoᴋ, nâligangillo sivôradlarput.

¹⁰ Ataniub nâligangitalo oᴋausingit pitjutigivlugit, ataniub anânanga itipoᴋ nirrimârvingmut; arnarlo nipliluni oᴋarpoᴋ: Ataniᴋ, issoᴋangitomut inôgit! Issumavît ulapiniaranitit, tautuillo ablatsauniarani;

¹¹ Angutiᴋarpoᴋ ataniovingni gudit ivsornaitut anininganik ilumilingmik; atâtavillo uvlungani ᴋaumarsartauniᴋ, issumatoniᴋ, ilisimanilo, gudit ilisimaningititut, naipitaulauᴋput tâpsomani, ataniublo Nebukadnezarib atâtavit angajoᴋângortilauᴋpâ ilisimajunut, angakonullo, Kaldêarinullo, uvloriaᴋsiortinullo; taimak ataniᴋ atâtait piniarpoᴋ;

¹² Aniniᴋ opinartoᴋ, ilisimanilo, issumatonilo, nalonaijainilo sinnartômanirit tukkigijanginik, nalonartuniglo nalonaijainiᴋ, ilaᴋudjârnilo ilaᴋêmajunik naipitaungmatta Danielimi tâpsomani, ataniub atsirartangani Beltesasarimik; tagva mâna Danieli ᴋaiᴋojauli, tâpsomalo tukkigijanga nalonairniarpâ.

¹³ Danielilo tagva itititauvoᴋ ataniub sânganut. Ataniublo nipliluni Danieli oᴋautivâ: Tâmnauvêt Danieli, aularutitaumajut Jûdamit ᴋitorngangita, ataniub atâtama tikiutijangita Jûdamit, ilangât?

¹⁴ Tusaumavagit gudit aniningat ilumigigangni, ᴋaumarsartaunilo, issumatonilo, silatunilo piojoᴋ naipitaungmatta ilingni.

¹⁵ Mânalo ilisimajut, angakoit, itititaulauᴋput sâmnut, atuarsiᴋovlugit aglangnik makkoninga, nalonaijaivigilungalo tukkigijanganik; sapiput tukkigijanga nalonairlugo.

¹⁶ Tusaumavagilli nalonaijaisôngogavit nalonadlartunik, ilaᴋêmajullo ilaᴋudjârlugit; mâna tagva aglaksimajut atuarungnarungni, nalonaijaivigivlungalo tukkigijanganik, annorârtitaulârpotit aupaloriktunik, ujamiktaujuksauvlutillo goldiojunik ᴋongisikut, nâligauvingmalo pingajuanut ataniojuksauvlutit.

¹⁷ Tagva Danieli kiovluni ataniub sângani oᴋarpoᴋ: Tunigutitit pigituinarkit, akkiliutigijomajatillo assimnut tunikit; aglaᴋsimajulli atuaromavakka atanimut, nalonaijaivigivlugolo tukkigijanganik.

¹⁸ Ataniᴋ, ᴋotsingnipângojub atâtait Nebukadnezar tunitjivigilauᴋpâ ataniovingmik, angijônimiglo, ânanaunimiglo, inornarnimiglo;

¹⁹ Anginilo tâpsomunga tunijanga pivlugo, inôᴋatigêt, nunaᴋatigêllo, oᴋausiᴋatigêllo ilûnatik sajukput sivôralutiglo tâpsoma sângani; issumaminik toᴋopait, issumaminik inôᴋôvait; issumaminik ᴋagvartipait, issumaminiglo nikanarsârtipait.

²⁰ Omatingali angijorortitaungmat, aniningalo mangailingmat piojorivluni piniarmat, atanionimi iksivautanganit pêjartauvoᴋ, ânanauningalo aᴋsârnigarijauvoᴋ.

²¹ Inuillo ᴋitornganginit ajaktortauvoᴋ, ômatingalo nigjutib ômatinganik adsiᴋartitauvoᴋ, iniᴋarporlo siutiᴋortojuni nujuartuni; iviksukatorpoᴋ tuktuvaktitut, timingalo ᴋausititauvoᴋ ᴋilaub mitsuksoanganut; ᴋaujimaᴋârtinago Gudib ᴋotsingnipângojub inuit ataniovingat aulangmago, pijomajaminiglo angajoᴋângortitsingmat tâpsomunga.

²² Igvillo, Belsazar, tâpsoma ininga, ômatit nikanarsârtilungilat, tamakkoa tamaita ᴋaujimagaloarangni;

²³ Angijorortipotilli ᴋilaub Nâliganganut; tâpsomalo iglungata ᴋajûtangit sângnut âtauvut, igvillo nâligarijatillo nuliatillo panervgatillo vainitorposi tâpkonangat, nitordlipotillo gudingoarnik silbirimit, goldimillo, ᴋaᴋorlimit, kikiangmillo, ᴋijungmit, ujarᴋanillo sinamajunik, tautulungitunik, tusângituniglo, ᴋaujimangituniglo; Gudelo, aggangmini anininik apᴋotigijarniglo piᴋartoᴋ, nitulungilat;

²⁴ Tamanna pivlugo aggait tâpkoa tilijauvut tâpsoma sânganit, aglaillo tamakkoa aglaᴋtauvut.

²⁵ Imaipullo aglait tâpkoa aglaᴋsimajut: Mene, Mene, Tekel, Ufarsin.

²⁶ Imaiporlo tukkigijangit: Mene; Gudib atanionît kajusimautigivâ, nâsârpâlo.

²⁷ Tekel; kiktitautingni ôktortauvotit, oᴋiluarlutillo naipitauvotit.

²⁸ Peres; ataniovît avgortauvoᴋ tunijauvlunilo Mediamiunut Persiamiunullo.

²⁹ Tagva Belsazar piᴋojivoᴋ, Danielilo annorârtauvoᴋ aupaloriktunik, ujamiklugolo goldiojunik ᴋongisingani, ᴋaujititsivullo tâmna pivlugo ataniojuksaungmat pingajuanik ataniovingmi.

³⁰ Unnuarmi tâpsomani Belsazar, Kaldêarit ataningat, toᴋotauvoᴋ.

³¹ Dariusiblo Medenimiub ataniovik pigilipâ, jâriᴋarluni 62nik.