Daniel 4 - Labrador Inuttitut Heritage Bible

¹ Atanik Nebukadnezar inôᴋatigênut, nunaᴋatigênullo, oᴋausiᴋatigênullo tamainut nunani tamaini iniᴋartunut: Ulapirᴋsautiᴋarnisi angijororpaliali!

² Idluarivara Gûdib ᴋotsingnipaujub nalunaikutangit tatamnartuliningillo piniarnirijangit uvamnut nalonaijaromavlugit.

³ Nalunaikutangit angijôdlarput, tatamnartuliningillo pitsartudlarput! Nâlegauvinga issoᴋangitomut itsainarpoᴋ, atanioningalo kinguvârênit kinguvârênut ipok.

⁴ Uvanga Nebukadnezar ulapitiᴋarnanga iglumnêlauᴋpunga, inôluamariklungalo igloᴋsoamni.

⁵ Takovunga sinnartômanimik ᴋoaᴋsârûtigijamnik; issumaliornimalo iglimnêtilunga niaᴋumalo takotitjutigijangita ulapipânga.

⁶ Tamanna pivlugo piᴋojivunga Babilonib ilisimajungit tamaita itititauᴋovlugit najugamnut, nalonaijaiᴋovlugit uvamnut sinnartômanirub tukkigijanganik.

⁷ Itiput tagva ilisimajut, angakuillo, Kaldêarillo, uvloriaᴋsiortullo; sinnartômanira unipkautigivara tâpkonunga; nalonaijaivigilungilângali tukkigijanganik.

⁸ Kingornganili Danieli itipoᴋ najugamnut, Beltesasarimik attilik, gudima attinga maliklugo, ilumilik Gudit ivsornaitoᴋsôjut anininganik; sinnartômanilo unipkautigivara tâpsomunga, oᴋarlunga:

⁹ Igvit, Beltesasari, ilisimajunut nâligaujotit, ᴋaujimagama gûdit ivsornaitoᴋsôjut aniningat ilingnêngmat, nalonadlartullo sapirutigilunginangni, oᴋautinga sinnartômanipkut takotitjumik takojamnik tukkigijanganiglo.

¹⁰ Imailauᴋput niaᴋuma takotitjutigijangit iglimnêtilunga: Takovunga, ahâglo, napârtoᴋ nunab ᴋiᴋâni, poᴋtojoᴋsôdlarporlo.

¹¹ Napârtoᴋ angijororpoᴋ sôngosilunilo, poᴋtoningalo tôᴋpoᴋ ᴋilangmut, takuksauvorlo nunab issua tikidlugo.

¹² Milukatangit takoranidlarput, unuktuniglo paungaᴋarpoᴋ, tâpsomanilo niᴋiksaᴋarpoᴋ ilûnainut nâmaktomik: natinaub nigjungita taggalinârvigivât, tingmiallo ᴋilaub ikianganêtut iniksarsivut akkerungi, uvinilillo ilûnatik niᴋiksarsivigivât.

¹³ Inangatilungalo iglimni niaᴋuma takotitjutigijangagut takovunga, ahâglo, pigârtuksaᴋ ivjornaitorlo aᴋᴋarpuk ᴋilangmit.

¹⁴ Nippiᴋortojomik ᴋaigarsukpoᴋ, oᴋarluni imâk: Napârtoᴋ kipisiuk, akkirungillo nakkasigik, milukatangillo pêjarsigik, paungangillo siamartisigik; nigjutit nûlit atânit, tingmiallo akkirunginit.

¹⁵ Amângitali miminangit nunamêtuarlit, avaluᴋarlutik kikiangmik ᴋaᴋorlimiglo, natinaub iviksukangini nutaijoᴋtuni; ᴋausititaulillo ᴋilaub mitsuksoanganut, nirgjutillo piksarsiorᴋatigiligit nunab iviksukanginik;

¹⁶ Omatingalo ablatsangorli inûb ômatinganit, tunitjiviolilo nigjutib ômatinganik; naliunirillo 7nit ᴋângiutilit tâpsomunga.

¹⁷ Pigârtuksat tamanna kajusimautigivât, ivsornaitullo oᴋaᴋatigêklutik piᴋojijutigivât: inôjut ᴋaujimaᴋovlugit ᴋotsingnirojub aulangmago inuit ataniovingat, tuningmagolo pijomajaminut, inuillo nikanarsarnipaujungit ataningortingmagit tâpsomani.

¹⁸ Sinnartômaniᴋ tamanna uvanga ataniᴋ Nebukadnezar takovara, igvillo, Beltesasar, nalonaijaruk tukkigijanga, ilisimajut ilûnatik ataniovimnêtut sapimaringmatta nalonaijaivigivlunga tukkigijanganik; igvilli sapilungilatit, gudit ivsornaitut aniningat ilingnêngmat.

¹⁹ Danieli tagva, Beltesasarimik attipsâlik, kakilâdlarpoᴋ anikitomik, issumamilo ulapipât. Atanili niplipoᴋ oᴋarlunilo: Beltesasar, sinnartômanirub tukkigijangatalônêt ulapiniaranitit. Beltesasarilo akiluni oᴋarpoᴋ: Nâlegara, sinnartômaniᴋ tamanna ômigijingnut, tukkigijangalo akkiratotingnut ilingali.

²⁰ Nâpârtoᴋ takojat angijorortoᴋ sôngosivlunilo, poᴋtoningalo tôᴋtoᴋ ᴋilangmut, takuksaujorlo nunab issua tikidlugo;

²¹ Takoranidlartuniglo milukatalik, unuktuniglo paungalik, ilûnainullo nâmaktunik niᴋiksatalik, taggalinârviojoᴋ natinaub nigjutinginut, akkiroliglo tingmiat ᴋilaub ikianganêtut iniksanginik;

²² Tâmnauvotit, igvit ataniᴋ, angijoᴋsôvotit sôngojoᴋsôlarpillo; angijoᴋsônît tôngmat ᴋilangmut, atanionîllo nunab issuanut.

²³ Ataniublo takungmagik pigârtuksaᴋ ivjornaitorlo ᴋilangmit aᴋᴋartuk, oᴋarlutik: Napârtoᴋ kipisiuk, assirolugolo; amângitali miminangit nunamêtuarlit, avaluᴋarlutik kikiangmik ᴋaᴋorlimiglo, natinaub iviksukangini nutaijoᴋtuni; ᴋausititaulillo ᴋilaub mitsuksoanganut, nigjutillo piksarsioᴋatigiligit nunab iviksukangini, naliunirit 7nit ᴋângiutiᴋârtinagit tâpsomunga;

²⁴ Tamadja tukkigijanga, ataniᴋ, ᴋotsingnipaujub piᴋojijutigijanga, nâlekama ataniub nalautautigijanga;

²⁵ Inungnit ajaktortaulârpotit, natinaublo nigjutingit ilagilârpatit, tuktuvaktut iviksukatolârpotit, ᴋausititaulârpotillo ᴋilaub mitsuksoanganut, naliunirit 7nit ᴋângiutilârput ilingnik; ᴋaujimaᴋârtinak ᴋotsingnipângojub aulangmago inuit ataniovingat, tunilugolo pijomajaminut.

²⁶ Napârtublo amângita miminangit nunamêtuarᴋongmatigik; ataniovît aᴋsârnigautsainalulângilaᴋ ilingnit, ᴋaujimaᴋârtuaruvit ᴋilait aulatsingmatta.

²⁷ Tamanna pivlugo, ataniᴋ, atanituinira idluariuk, ajornitillo sattôtigikit idluarnimik, idluitulinitillo nâpkiningnimik aklujunik; ulapirᴋsautît sivitonisaunajangimangât.

²⁸ Tamakkoa ilûnatik ataniᴋ Nebukadnezar nalaupât.

²⁹ Taᴋᴋit 12 nângmatta pisugajarpoᴋ ataniub igloᴋsoangani Babilonimi.

³⁰ Atanilo niplipoᴋ oᴋarlunilo: Mânna tâmnaungilâᴋ Babiloni angijoᴋ, atanimut igluksaliarijara ajugaᴋanginima pitsartuninganut, inornarnimalo nitornautiksanganût?

³¹ Ataniub oᴋautsini ᴋanimiutarigamigit sulli, nippi ᴋilangmit tusaksauvoᴋ, oᴋartoᴋ: Ataniᴋ Nebukadnezar, oᴋautijauvotit: Ataniovik ilingnit aᴋsârnigauvoᴋ.

³² Inungnit ajaktugauvotit, natinaublo nigjutingini iniksaᴋalârpotit; tuktuvaktitut iviksukatulârpotit, naliunirillo 7nit ᴋângiutilârput ilingnik; ᴋaujimaᴋartinak ᴋotsingnipângojub aulangmago inuit ataniovingat, tunilugolo pijomajaminut.

³³ Stundimi tâpsomanitsainaᴋ tamattoma Nebukadnezar nalaupâ, ajaktortauvorlo inungnit, tuktuvaktitullo iviksukatolipoᴋ, timingalo ᴋausititauvoᴋ ᴋilaub mitsuksoanganut, nujangit piroᴋârtinagit naktoraliub miᴋungititut, kukingillo tingmiab kukingititut.

³⁴ Uvlulli tâpkoa nângmatta uvanga Nebukadnezarib ijîkka arlortipâkka ᴋilangmut, silatuniralo utipoᴋ uvamnut, ᴋotsingnipângojorlo nitorpara, issoᴋangitomullo inôtsainartoᴋ nakorivara opigilugolo; tâpsoma nâliugauninga nâligauniongmat soraiviᴋangitoᴋ, nâligauvingalo kinguvârênit kinguvârênut itsainarmat.

³⁵ Silaᴋsoarmiullo ilûnamatsiatik sunaungitotun-ingmatta, issumaminik piniarami ᴋilangmiugasaksoarni, silaᴋsoarmiugasaksuillo akorngani; agganginiglo noᴋartitsijoᴋarungnangilaᴋ, oᴋarvigilugolônêt: Suvêt?

³⁶ Naliutomi tâpsomani silatunira utipoᴋ uvamnut; ataniovingmalo nitornautiksanganut inornarnira takominarniralo utipuk uvamnut; atanituijimalo angajoᴋâᴋsoarilauᴋtamalo nalipsarpânga, palangilititauvunga ataniovimni, angijoᴋsoarmiglo nâlangnartitauvunga.

³⁷ Mânalo uvanga Nebukadnezar ᴋilaub ataninga nitorpara angijôtilugolo opigilugolo; tâpsoma piniarningit ilûnamatsiatik miksiᴋârtôngmatta, apᴋotingillo idluartoᴋsôngmatta; piojorinimilo arvitartut tâpsoma miklilititsungnarpait.