Daniel 3 - Labrador Inuttitut Heritage Bible

¹ Atanik Nebukadnezar inungoaliorpoᴋ goldimit, talertut 60tut poᴋtotigijomik, talitullo 6tut siliktigijomik: napartipâlo Durab naᴋsangani Babilonib nunangani.

² Ataniublo Nebukadnezarib tilikliluni katimaᴋovait atanirusit, angajoᴋâᴋsuillo, aulatsijullo, idluarsaijullo, kênaujaniglo kamajut, atanituijullo, piᴋojaniglo ilisimajut, tamaitalo nunami pitsartujut, tikiᴋovlugit inungoab ataniub Nebukadnezarib napartitangata attijauvianut.

³ Tagva atanirusit, angajoᴋâᴋsuillo, aulatsijullo, idluarsaijullo, kênaujaniglo kamajut, atanertuijullo, piᴋojaniglo ilisimajut, tamaitalo nunami pitsartujut katimavut inungoab ataniub Nebukadnezarib napartitangata attijauvianut; nangipullo inungoab Nebukadnezarib napartitangata sângani.

⁴ Oᴋâlajorlo nippiᴋortovluni nipliavoᴋ: Oᴋoksi ilipsi inôᴋatigêngojosi nunaᴋatigêngojosilo oᴋausiᴋatigêngojosilo.

⁵ Tusatuarupsi tiptulautit nipjautillo harfillo ᴋilularaillo noᴋaᴋsiralillo ᴋaningmigautillo nipliajûllo sunatuinait nipinginik, pâmaktituksauvosi inungoarlo goldiojoᴋ ataniub Nebukadnezarib napartitanga opigilugo;

⁶ Pâmaktingitorlo opigosulungtoᴋ tagvainaᴋ igitaujuksauvoᴋ kiaksautiâlub ikomaliksûb ᴋiᴋânut.

⁷ Taimaimat naliutomi tâpsomani inôᴋatigêt ilûnatik tusarvingini tiptulautit nipjautillo harfillo ᴋilularaillo noᴋaᴋsiralillo ᴋaningmigautillo nipliajûllo sunatuinait nipinginik, inôᴋatigêt ilûnatik nunaᴋatigêllo oᴋausiᴋatigêllo pâmaktiput inungoarlo goldiojoᴋ ataniub Nebukadnezarib napartitanga opigilugo.

⁸ Naliutomili tâpsomani Kaldêarit ilangit ᴋaivut, Judillo pasilugit.

⁹ Pigiarlutiglo oᴋarpoᴋ atanimut Nebukadnezaremut: Ataniᴋ, issoᴋangitomut inôtsainalaurit.

¹⁰ Igvit, ataniᴋ, piᴋojaᴋartitsivotit inuit ilûnatik tusartut tiptulautit nipjautillo harfillo ᴋilularaillo noᴋaᴋsiralillo ᴋaningmigautillo nipliajûllo sunatuinait nipinginik pâmaktilutiglo opigijaksaringmatsuk inungoaᴋ goldiojoᴋ:

¹¹ Pâmaktilungitorlo opigosulungitoᴋ igitaksaungmat kiaksauteâlub ikomaliksûb ᴋiânut.

¹² Angutit, Judit ilangit, aulatsijungortitatit Babilonib nunangata piksanginik, Sâdraki, Mîsakilo, Abednigolo, angutit tâpkoa kamagingilâtit, ataniᴋ; kivgartulungilait gudingoat, inungoarlo goldiojoᴋ napartitat opigingilât.

¹³ Tagva Nebukadnezarib ningadlarnimini ilungitudlarniminilo, Sâdraki, Mîsakilo, Abednigolo ᴋaitauᴋovait. Angutillo tâpkoa âtauvut ataniub sânganut.

¹⁴ Nebukadnezariblo kiovluni oᴋautivait: Pijârillusi, Sâdraki, Mîsakilo, Abednigolo, kivgartortailipisiûk gudingoara, opigitaililugolo inungoaᴋ goldiojoᴋ napartitarâ?

¹⁵ Takuitsi, atuinaugupsi ᴋangaugaloarpat tusartuarupsi tiptulautit nipjautillo harfillo ᴋilularaillo noᴋaᴋsiralillo ᴋaningmigautillo nipliajûllo sunatuinait nipinginik pâmaktiromavlusi opigilugolo inungoaliarimajara, nâmakpoᴋ; opigosulungikupsili, tagva tagvainaᴋ igitaujuksauvosi kiaksautiâlub ikomaliksûb ᴋiᴋânut; kinauvâlo Gudeojoᴋ piulijungnartisi aggamnit?

¹⁶ Sâdrakib, Mîsakiblo Abednigoblo kiovlutik ataniᴋ oᴋautivât: Nebukadnezari, ilirasulungilagut akkiorlutit tamattomani.

¹⁷ Taimaigiaᴋarpat, Gudivut kivgartortavut sapilungilaᴋ piuliluta kiaksautiâlungmit ikomaliksoarmit; piulijomavâtigullo aggangnit, ataniᴋ.

¹⁸ Pingikaloarpallônêt, tagva ᴋaujijuksauvotit, ataniᴋ, gudingoatit kivgartoromanginaptigik, inungoarlônêt goldiojoᴋ napartitat opigijomanginaptigo.

¹⁹ Tâva Nebukadnezar ilumitauvoᴋ ningadlarnimik, kênangatalo tautua ablatsangolipoᴋ Sâdrakimut, Mîsakimullo, Abednigomullo; taimaimallo oᴋarluni piᴋojivoᴋ kiaksauteâluk 7ertorlugo ônarnisautitaksaringmatsuk ilusirivaktanganit.

²⁰ Angutillo ilangit sangijôdlartut sorᴋsuktuksarsoaᴋotiminêtut piᴋovait ᴋilaksuiᴋovlugit Sâdrakimik, Mîsakimiglo, Abednigomiglo, igilugillo kiaksauteâlungmut ikomaliksoarmut.

²¹ Tâva angutit tâpkoa ᴋilaksortauvut, ᴋarlilijarlutik, ikialijarlutiglo, ulilijarlutiglo, tâpkoalo assinginik annorâlijarlutik, igitauvullo kiaksauteâlub ikomaliksûb ᴋiᴋânut.

²² Ataniublo piᴋojanga atangusidlarmat, kiaksauteâluglo ônarpâdlarmat, ikomab ikoalaningata toᴋopait egitsijut Sâdrakimiglo Mîsakimiglo, Abednigomiglo.

²³ Angutillo tâpkoa pingasut, Sâdraki, Mîsaki, Abednigolo ᴋilaksorsimavlutik katakput kiaksauteâlub ikomaliksûb ᴋiᴋânut.

²⁴ Atanilo Nebukadnezar kakilâdlarpoᴋ, nikovisâdlarlunilo, niplilunilo atanituijiminut oᴋarpoᴋ: Angutinik pingasunik igitsilaungilagût ikomab ᴋiᴋânût? Tâpkoa kiovut oᴋarlutiglo atanimut: Nalautsivoᴋ, ataniᴋ.

²⁵ Tâmna kiovoᴋ oᴋarlunilo: Ahâk, angutinik sitamanik ᴋilaksorsimanatik pisuktunik takovunga ikomab ᴋiᴋâni, ôtaunatiglo, sitamangallo tautuᴋarpoᴋ gudit iningatut.

²⁶ Nebukadnezarilo aivoᴋ kiaksauteâlub ikomaliksûb pânganut: niplilunilo oᴋarpoᴋ: Sâdrak, Mîsak, Abednigolo kivgaujosi Gudemut ᴋotsingnipaujomut, anititsi tamaungarlusilo. Sâdrakilo, Mîsakilo, Abednigolo anivut ikomab iluanit.

²⁷ Atanirusit, angajoᴋâᴋsuillo, aulatsijullo, ataniublo atanituijingit, katimajut tagvani, takovut angutinik tâpkoninga, ikomallo pitsartuniᴋangimat timinginut, nujallo niᴋunginêtut ôlikâlungimatta, annorângillo soᴋosingimatta, ikisungnilungimattalônêt.

²⁸ Nebukadnezarilo niplipoᴋ oᴋarlunilo: Nakorijauli Sâdrakib, Mîsakiblo, Abednigoblo Gûdingat, ingiliminik tiliklitoᴋ piulilugillo kivgani tatigijini tapajullo ataniub piᴋojanganik, timimingniglo tunitjijomangitut Gûdimik assia kivgartoromavlugo opigijomavlugolo.

²⁹ Tamanna pivlugo piᴋojivunga imaitomik, inôᴋatigêt, nunaᴋatigêlônêt, oᴋausiᴋatigêllônêt nallit oᴋarnilutjijut Sâdrakib, Mîsakiblo, Abednigoblo Gudinganik avgortaulârput, iglungillo atsiviksangortitaulârput: tâpsoma assianik gudiᴋangimat taimak piuliklirungnartomik.

³⁰ Ataniublo Sâdraki, Mîsakilo, Abednigolo pilluangotipait Babilonib nunangani.