Daniel 2 - Labrador Inuttitut Heritage Bible

¹ Nebukadnezariblo atanioningata jâringita aipangani Nebukadnezar sinnartômavoᴋ sinnartômanimik; aniningalo ulapitauvoᴋ uinganêrutivorlo.

² Ataniublo ilisimajut, angakoillo, ilisêngniartullo, Kaldêarillo, ᴋaiᴋojauᴋovait, ataniᴋ nalonaijaivigivlugo sinnartômanirijanganik piᴋovlugit. Tikipullo nangilutiglo ataniub sângani.

³ Ataniublo oᴋautivait: Sinnartômanimik sinnartômavunga, aniniralo ulapitauvoᴋ sinnartômaniᴋ ᴋaujijomadlarapko.

⁴ Kaldêarit tagva oᴋarput atanimut Siriamiut oᴋausingit atorlugit: Ataniᴋ, issoᴋangitomut inôlaurit! Sinnartômaniᴋ kivgarnut oᴋautigilauruk, tagva tukkigijanga nalonairomavavut.

⁵ Ataniubli kiovlugit Kaldêarit oᴋautivait: Erᴋaumajungnairpara. Nalonaijaivigilungikupsinga sinnartômanimiglo tukkigijanganiglo avgortaulârposi iglusilo atsiviksangortitaulârput.

⁶ Nalonairupsiugli sinnartômaniᴋ tukkigijangalo, uvamnit pilitaulârposi tunergusianiglo piliusianiglo opinautiksaniglo angijunik; taimaimat nalonaijaivigisinga sinnartômanimiglo tukkigijanganiglo.

⁷ Aipanganik tagva akkinikput oᴋarlutiglo: Ataniub kivgani oᴋautiligit sinnartômanimik, nalonaijaivigijomavaptigillo tagva tukkigijanganik.

⁸ Ataniᴋ kiovoᴋ oᴋarlunilo: Nalonangitomik ᴋaujivunga katsungagapsi, malugosugapsi iᴋaumajungnainimnik.

⁹ Sinnartômanili nalonaililungikupsiuk uvamnut, tagva atausênarmik piᴋojaᴋarpoᴋ ilipsingnut pijuksamik; sagloninik tukiᴋangituniglo atuinaruigapsi oᴋausirijomavlugit uvamnut, ilinganiᴋ assiangotsiarivlugo; tamanna pivlugo sinnartômaniᴋ nalonairsiuk uvamnut, ᴋaujiniarpunga tagva nalonaijaivigijungnarapsinga tukkigijanganik.

¹⁰ Kaldêarit ataniᴋ akkivât, oᴋarlutiglo: Nunaᴋsoarmi inuᴋangilaᴋ nalonaijaijungnartomik ataniub oᴋautigijanganik; ataniᴋalaungilarlo nâlegaᴋalaungilarlônêt pitsartujoᴋalaungilarlônêt taimaitomik ᴋinujomik ilisimajomit angakomillônêt Kaldêaremillônêt.

¹¹ Ataniublo oᴋautauᴋojanga tamanna inornadlarpoᴋ, assiᴋangimarikporlo nalonailêjungnartomik tamattominga atanimut, gudit kissimik, tâpkoalo iniᴋangilat uvinilingni.

¹² Tamanna pitjutigivlugo ataniᴋ ningadlarpoᴋ ᴋaningaumajâdlarporlo, Babiloniblo ilisimajungit tamaita toᴋotauᴋovait.

¹³ Piᴋojaᴋ tagva ᴋaujijautitauvoᴋ, ilisimajullo toᴋotaksauᴋojauvut; Danielilo ilangillo ᴋinipait toᴋotsomavlugit.

¹⁴ Danielibli silatudlarluni iktôrluganilo Arioki, ataniub udjitortingita angajoᴋângat, toᴋotsijartortoᴋ Babilonib ilisimajunginik, atanitorpâ;

¹⁵ Niplilunelo Arioki, ataniub angajoᴋângortitanga, oᴋautivâ: Suna pivlugo ataniub piᴋojanga taimâk opaluᴋtortigivâ? Ariokiblo Danieli tamattominga nalonaijaivigivâ.

¹⁶ Danielili itipoᴋ, atanilo ᴋinuvigivâ issumaksarsiorviksaᴋartitaujomavluni, nalonaijaijungnarᴋovlugo tukkigijanganik atanimut.

¹⁷ Danielili angirarpoᴋ tagva, ilanilo Hanania, Misailelo, Asarialo ᴋaujitilugit tamattominga;

¹⁸ Kilaub Gudinga ᴋinuvigivlugo nâpkigijaujomavlutik nalonadlartoᴋ tamanna pivlugo; Danieli ilangillo toᴋotauᴋonagit Babilonib ilisimajungit ilagivlugit.

¹⁹ Tagva nalonadlartoᴋ tamanna nalonaijartauvoᴋ Danielimut takotitjutikut unnuarmi. Danieliblo ᴋilaub Gudinga nakoridlarpâ.

²⁰ Danielilo nipliluni oᴋarpoᴋ: Gûdib attinga nakoridlartauli issoᴋangitomit issoᴋangitomut; ilisimaniᴋ pitsartunilo tâpsoma pigingmagik;

²¹ Tâpsoma naliunirit iliorviksallo ablatsângortipait; atanît pêjarpait, atanîllo ilivait; ilisimaniᴋ tunivâ ilisimajunut, silatunilo tâpkonunga silatunimik ᴋaujimajunut;

²² Nalonaijaivoᴋ itijunik nalonartuniglo; ᴋaujimavoᴋ tâᴋtomêtunik, ᴋaumajorlo tâpsomani iniᴋarpoᴋ.

²³ Kujagivagit nakorilutillo, igvit atâtagilauᴋtama Gûdingat, tunitjivigigamga ilisimanimiglo pitsartunimiglo, mânalo nalonaijaivigigamga ᴋinuarijaptingnik ilingnit; nalonaijaivigigaptigut ataniub pinganik.

²⁴ Tamanna pivlugo Danieli itipoᴋ Ariokimut, ataniub assiroiᴋojanganut Babilonib ilisimajunginik, oᴋautilugolo imâk: Babilonib ilisimajungit assirorniarnagit pît, ataniubli sânganut ititikit, atanilo nalonaijaivigijomavara sinnartômanirub tukkigijanganik.

²⁵ Ariokib tagva tuavidluni Danieli ititipâ ataniub sânganut, oᴋautivâlo imâk: Naipitsivunga angumik aularutijaujut Jûdab ᴋitorngangita ilanganik, nalonaijainiartomik atanimut sinnartômanirub tukkigijanganik.

²⁶ Atanerublo akkivâ, Danielilo, Beltesasarimik attipsâlik, oᴋautivâ: Igvit nalonaijaivigijungnarpingâ sinnartômanimik takojamnik tukkigijanganiglô?

²⁷ Danielib ataniᴋ akkivâ oᴋarlunilo: Nalonadlartoᴋ tamanna ataniub nalonairtauᴋojanga ilisimajullônêt, angakuillônêt, ilisimaniᴋsiortullônêt, uvloriaᴋsiortullônêt, nalonaijarungnangilât atanimut;

²⁸ Kilangmili Gudeᴋarpoᴋ nalonaijaijomik nalonadlartunik, tâpsomalo ataniᴋ Nebukadnizari nalonaijaivigivâ pijomârtuksanik uvluni kingorlini. Sinnartômanît, niaᴋovîllo takotitjutigijanga iglini inangatilutit, imaipoᴋ:

²⁹ Igvit, ataniojotit, inangatilutit issumalauᴋpotit sunanik mattoma kingorngani pijomârtuksanik; tâpsomalo nalonadlartunik nalonaijaijub nalonaijaivigivâtit sunanik pijomârtuksanik.

³⁰ Uvangali pivlunga, nalonartoᴋ tamanna nalonaijartaulungilaᴋ uvamnut ilisimaniᴋarnisaugama inôjunit tamainit, imâgli pivlugo, tukkigijanga nalonaijartauᴋovlugo atanimut, ᴋaujimaᴋovlutillo ômativît issumanginik.

³¹ Igvit, ataniᴋ, takolauᴋpotit, ahâglo, inungoaᴋsoaᴋ pitsartudlartoᴋ ᴋibliridlartorlo nangipoᴋ sângni, tautualo iᴋsinadlarpoᴋ.

³² Inungoab tâpsoma niaᴋoa goldiovoᴋ ilaᴋangitoᴋ, sagvinga talîgiglo silbiriovuk, ᴋatigâkiglo okpatîgiglo ᴋaᴋorliovuk,

³³ Niugik kikiangovuk, itigangillo ilangagut kikiangovut ilangagullo maggaᴋ.

³⁴ Takonâlauᴋpotit ujaraᴋ saviujartortauᴋârtinago aggangnu-ungitoᴋ, tâpsomalo inungoaᴋ annauvâ itigangitigut kikiangojutigut maggaujutigullo siᴋalilugillo.

³⁵ Tagva kikiaᴋ, maggarlo, ᴋaᴋorlilo, silbirilo, goldilo atautsikut sikalijaudlarput, ililutiglo iviksukatitut siᴋalijaumajutitut katjugvingmut aujarmi; annoriblo tiktautipait, ᴋikarviksairutivullo; ujaraᴋlo, inungoab annaunitinga ᴋaᴋᴋaᴋsoangorpoᴋ nuna nâmavlugo.

³⁶ Tamadja sinnartômaniᴋ; tukkigijangalo oᴋautigijomavavut ataniub sângani.

³⁷ Igvit, ataniᴋ, atanît atanirivâtit, ᴋilaub Gudingata tunitjivigivâtit nâlegauvingmik, pitsartunermiglo, sôngonermiglo, ânanaunimiglo;

³⁸ Tamaitalo inuit ᴋitorngangita iniᴋarvingit, ômajut natinamêtut tingmiallo ᴋilaub atânêtut tunivait aggangnut, tâpkonungalo tamainut nâlegangortipâtit; igvit tâmnauvotit niaᴋoᴋ goldiojoᴋ.

³⁹ Kinguninilo ataniovikpît assia nuijomârpoᴋ ilingnit pitsakiluartomik; kingornganilo ataniovingmik pingajuangnik ᴋaᴋorliojomik, nunaᴋsoarmi ilûnâni nâligauviojomârtomi.

⁴⁰ Ataniovillo sittamangat kikiaktut sôngotigijomârpoᴋ, kikiak siᴋalitsingmat sâlaᴋarlunilo tamainik; kikiaktut makkoninga tamainik sêmiksijotut siᴋalitsilârpoᴋ sêmiksilunilo.

⁴¹ Sorlolo takolaurangni itikat inugangoallo, ilangagut maggalirijub magganga ilangagullo kikiak, taimak atanioviojomârpoᴋ aviksimajoᴋ, tâpsomanêtoᴋaromârporli kikiaktut sôngotigijomik, takolauravit kikiak akusimajoᴋarmat maggarmik.

⁴² Sorlolo itikat inugangoangit ilangagut kikiangongmatta ilangagullo maggaungmatta, taimâk ataniovik ilangagut sangijôlârpoᴋ ilangagullo napsiktôlârluni.

⁴³ Sorlolo takolauravit kikiak akusimajoᴋarmat maggarmik, taimâk akulârput nangminimingnik inuit kinguvânginut; nipingautijomângilalli, sorlo kikiak maggarlo akulutik ajormanik.

⁴⁴ Atanillo tâpkoa uvlungini ᴋilaub Gûdingata ataniovik âᴋiksoromârpâ, issoᴋangitomut aglât assirortauniatsangitoᴋ, nâligauvioningalo inungita assinginut nûtuksautsangilaᴋ; siᴋalitsilârporli nungutsilunilo ataniovingnik makkoninga tamainik, issoᴋangitomulli itsainaromârpoᴋ.

⁴⁵ Sorlolo takolauravit ujaraᴋ saviujartortaulaungmat ᴋaᴋᴋamit aggangnu-ungitoᴋ, siᴋalilaungmagillo kikiak, ᴋaᴋorlilo, maggarlo, silbirilo, goldilo, Gudib angijoᴋsôjub ataniᴋ nalonaijaivigivâ sunamik mattoma kingorngani pijomârtuksanik: sinnartômanilo nalautsimarikpoᴋ tukkigijangalo nalonangimarikpoᴋ.

⁴⁶ Tagva ataniᴋ Nebukadnezar pâmaktipoᴋ, Danielilo opigivâ, piᴋojivorlo tunitjivigijaksaringmatsuk tunigutinik niᴋiksanik tipitsiariksautiksaniglo.

⁴⁷ Ataniublo Danieli akkivâ, oᴋarlunilo: Nalonangimariktomik Gudise gudît Gudigivât, atanîllo Nâlegarivât, nalonadlartunik nalonaijaijoᴋ, nalonadlartoᴋ tamanna nalonairlugo sapilunginavit.

⁴⁸ Ataniublo Danieli angijôtipâ, tunitjivigilugolo tunigutinik angijunik unuktunik, nâlegangortipâlo Babilonib nunanganut tamânut, angajoᴋâᴋsoangortilâllo Babilonib ilisimajunginut tamainut.

⁴⁹ Danieliblo ataniᴋ ᴋinuvigivâ, Sâdrakilo Mîsakilo Abednigolo aulatsijungortipait Babilonib nunangata pijaksanginik; Danielili ataniub itiviksoanganêtuarpoᴋ.