Daniel 12 - Labrador Inuttitut Heritage Bible

¹ Naliutomilo tâpsomani Migaili, angajoᴋâᴋsoaᴋ imna inôᴋativît ᴋitorngangita singnigijingat, nikovidlaromârpoᴋ; kapianartoviᴋaromârparlo naliᴋalauᴋsimangitomik inôᴋatigêksoaᴋatainarninganit naliuniᴋ tâmna tikidlugo; naliutomilo tâpsomani inôᴋatitit piulijaujomârput, ilûnatik aglangni aglaᴋsimajut.

² Nunablo saningini siniktut ilangit unuktut tupagomârput, ilangit inôtsimut nâksaungitomut, ilangillo kangusuktitaunimut naggogijaunimut nâksaungitomut.

³ Silatujullo ᴋibliromârput ᴋilaub issivisimajub ᴋaumaringningatut; unuktuniglo sâgiartitsijut idluanimut uvloriatutit issoᴋangitoᴋsoarmut.

⁴ Igvilli, Danieli, oᴋautsit matukit, aglaillo naᴋitikit, naggatiksab naliuninga tikidlugo; unuktut aᴋpasugomârput utitaᴋatalutik, ilisimanilo aglivaliajomârpoᴋ.

⁵ Uvangalo Danieli takosarpunga, ahâglo, assîgik nangipuk, aipâ kôb sinâni mattomani, aipangalo kôb sinâne akiani.

⁶ Aipâtalo angut miᴋoᴋangitomik ᴋaᴋortamik annorâlik, kôb imanganik ᴋolangiartok, oᴋautivâ: Kanoᴋ akunêrtigilârᴋâ tatamnartut makkoa naggatiksangat tikidlugô?

⁷ Angullo miᴋoᴋangitomik ᴋaᴋortamik annorâlik, kôb imanganik ᴋolangiartoᴋ, tusarpara, aggani talipîllo saumîllo issângmagit ᴋilangmut, angimariklunilo inôtsainartoᴋ issoᴋangitomut taivlugo, oᴋartoᴋ: tamanna naliuniᴋ atausiᴋ, naliunîglo maggûk, naliunirublo abvanga nâvlugit sivitutigijomârpoᴋ; noᴋarpattalo inuit ivsornaitut pitsartuningit siᴋalilugit, tamakkoa tamaita nâmaksititaujomârput.

⁸ Tusarpungalo tukkisinangali; tagva oᴋarpunga: Nâlegara, ᴋanoᴋ tamakkoa maliktoᴋalârᴋât?

⁹ Oᴋarporlo: Aularit, Danieli, oᴋautsit matujaungmatta naᴋititauvlutiglo naggatiksab naliuninga tikidlugo.

¹⁰ Unuktut ivsornaitilârput nangminimingnik, ᴋaᴋorsilutiglo, sujungaititaulârpullo; idluitulli idluitulijomârput; idluitulijulli naliatalônêt tukkisiniangilaᴋ, silatujulli tukkisilârput.

¹¹ Naliunimillo tunigutit ôtaksat nokajuiᴋojaujut soraititauvianit, nungutsiviublo maggojungnartut âᴋiksortauninganit, uvlut 1,290 nâlârput.

¹² Piloridlarpoᴋ utaᴋijoᴋ tikiutilunilo uvlunut 1,335nut.

¹³ Igvilli aularit naggatiksaᴋ tikidlugo; mingoêrsituksaugavit, iniksanilo nanituksauvlutit uvlut naggatiksangani.