Daniel 11 - Labrador Inuttitut Heritage Bible

¹ Uvangali, Dariusib Medenimiub jâringita sivorlipângani, ililitorpara nakoᴋsijomavlugo pitsartutitsomavlugolo.

² Mânalo miksiᴋârtoᴋ nalonaijaromavara ilingnut. Ahâk, atanît pingasut sulli nikovitsomârput Persiami; sitamangallo akluinisaujomârpoᴋ tâpkonangat tamainit; akluinimigullo pitsatusiguni, tamaita aulatsomarpait Griggit ataniovinganut.

³ Atanilo sôngojok nikovilârpoᴋ, atanioromârporlo nâlegaunimut angijomut, pijomajaminiglo piniarluni.

⁴ Nikovisimalerpalli ataniovinga siᴋomitaujomârpoᴋ, avgorlugo ᴋilaub anoringinut sitamanut; kinguvânginu-ungitorli, atanioninilônêt atanionirilauᴋtani maliklugo-ungitoᴋ; ataniovingali tigujaujomârmat, tâpkoa assinginut pijaksauvluni.

⁵ Atanilo ânimioᴋ pitsartudlaromârpoᴋ, angajoᴋâᴋsoangitali ilangat pitsartuluaromârpoᴋ tâpsomangat, tâmnalo aulatsijomârpoᴋ: ataniovingalo angijôdlaromârpoᴋ.

⁶ Jârillo nâkpatta tâpkoa ilagêliromârput; ataniublo ânemiub paninga tikitsomârpoᴋ atanimut avanimiomut ilagêgutiksarsiorluni; tâpsomali talimi pitsartuninga pigênaromângilâ; imnalônêt angut makitatsainaromânginivoᴋ, talingalônêt; taimnalo arnaᴋ tunijaujomârpoᴋ, âtsijullo tâpsominga, kinguvâᴋartorlo tâpsominga, pitsartutitsilauᴋtorlo tâpsominga naliutuni tâpkonani.

⁷ Tâpsomali amângita akkiroâgulangita ilanganit nikovitoᴋaromârpoᴋ inimini, tikitsomârlunilo sorᴋsuktoᴋatigêksoarnut, itârlunelo ataniub avanimiub taluksoanganut, opaktorlugolo, ajugauvlunilo;

⁸ Gudingoangillo inungoaliarimajangillo auktisimajut, piᴋutingillo pivianartut goldimit silbirimillo sanamajut, aularutijomârpait Egiptinimut; tâpsomalo jârit ilangit nâvlugit ataniᴋ avanimioᴋ unangmitaililârpâ.

⁹ Tâmnali ataniub ânimiub ataniovinganut tikitsomâraloarpoᴋ, nunaminulli utiromârivoᴋ.

¹⁰ Erningilli unataromârput, sorᴋsuktoᴋatigêksoarnik, unuktunik katisoilutik, tikitsomârpullo ullitornersoartut, ᴋângiutivlutiglo; utiromârpullo unatarlutik, taluksoangit tikidlugit aglât.

¹¹ Atanilo ânimioᴋ ningarnisoarmut aulataujomârpoᴋ, anijomârporlo unatarvigidlarlugo ataniᴋ avanimioᴋ; katisoilauᴋtoᴋ sorᴋsuktoᴋatigêksoarnik, sorᴋsuktoᴋatigêksuilli tunijaujomârput tâpsoma agganginut.

¹² Sorᴋsuktoᴋatigêksuillo aularutijaujomârput, tâpsomalo ômatinga piojorijomârpoᴋ; tausendioᴋâtartuniglo oggotitsijomârpoᴋ, sâlaᴋaromângilarli.

¹³ Ataniᴋ avanimioᴋ utiromârmat, saᴋᴋêvluni sorᴋsuktoᴋatigêksoarnik ununisanik sivornganimit; tikilârporlo naliunirit nâlerpatta, ilâ, jârit nâlipatta, sorᴋsuktoᴋatigêksuit ilagivlugit piᴋutiᴋavaksoarlunilo.

¹⁴ Naliutunilo tâpkonani unuktut nikovitsomârput ataniᴋ ânimioᴋ akkiratorlugo; pirajaludlartullo ᴋitorngangit inôᴋativît akorngani makitaliromârput takotitjut nalautsititsomavlugo, katagomârpulli.

¹⁵ Atanilo avanimioᴋ tikitsomârpoᴋ tagva, taluksoalioromavlunilo, iglugasaksuillo avaluliorsimajut sâlagijomârpait; ânimiuble talingit akkiratorungnalulângilat, inungillônêt annirijangit; nukiᴋarniangilallônêt akkiratornimut.

¹⁶ Tâpsomungali tikitûb, pijomajani nâmaksititsomârpâ, sânganilo nangirungnartoᴋaromângilaᴋ; nunamilo alianatomi nangiromârpoᴋ assiroinilo agganginêlârpoᴋ.

¹⁷ Kênanilo sângatitsomârpâ tikitsomavluni ataniovingmi ilûnangata pitsartuninganut; nâmaktomiglo angiᴋatigijomârpâ, pijomajanilo nâmaksititsomârpâ; paninilo tâpsomunga tunijomârpâ, assiroiᴋovlugo tâpsominga; tâmnali suliniangilaᴋ, tikiniangilarlônêt tâpsomunga.

¹⁸ Kingorngani kênani sangutitsomârpâ nunanut imarbiub sidjanganêtunut, unuktullo tigulugit; angajoᴋâᴋsûbli mitautiᴋarniᴋ tâpsoma pijanga sorairtitsomârpâ, ilâ, mitautiᴋarniᴋ utititsomârpâ tâpsomunga aglât.

¹⁹ Tagva kênani sangutitsomârpâ nunami taluksoanginut; nâgunili pâlalârpoᴋ, nagvârtauniangilarlo.

²⁰ Tâpsomalo iningani saᴋᴋitoᴋaromârpoᴋ tilikliromârtomik kênaujanik nunaliksiutauᴋojaujunik katisoijunik atanioviub pinnarijanginit; uvlulli unuktôngitut nâkpatta tâmna assirotaulârpoᴋ, ningarnikut pinani, unatarnikullo pinani.

²¹ Tâpsomalo iningani naggonartoᴋ nikovilârpoᴋ, tunitjiviolaungitoᴋ atanioviub nitortaujutiksanganik: tâmnali tikilârpoᴋ ilimanarani, atanioviglo pilârpâ pingitsitornikut.

²² Talinullo pitsartujunut tâpsoma pêjaromârpait siᴋomilugillo, ilâ, angajoᴋâᴋsoaᴋ angiᴋatigijanga tapilugo.

²³ Angiᴋatigiᴋârlugolo tâmna pingitsitorluni piniaromârpoᴋ; ᴋagvalârmat pitsartusivlunilo inuktigut ikitutigut.

²⁴ Ilimanarani nunab iglugasaksoanginut piᴋutiliksônerpaujunut tikitsomârpoᴋ; pinialârporlo atâtami, atâtamilônêt atâtangita, pinianirilaungitanginik; kataraivigilârpait aᴋsârnigaksanik, arᴋtautiksaniglo, piᴋutiniglo; issumalugomârpoᴋ avaluᴋsoalit pikalugvigijomavlugit ilangani.

²⁵ Pitsartunini ᴋoaᴋsângaininilo aulatsomârpâk ataniᴋ ânimioᴋ opaktoromavlugo sorᴋsuktoᴋatigêksoarnut; atanilo ânimioᴋ sorᴋsugomârpoᴋ unatarnimi sorᴋsuktuᴋatigêksoarnut unuktovaksoarnut pitsartujoᴋsoarnullo; nangirungnaromângilarli, issumalugomârmatta pikalugvigijomavlugo.

²⁶ Ilâ, niᴋiksatsianganit nirrijut assiroromârpât, sorᴋsuktoᴋatigêksoangillo siamâromârput; unuktullo oggojomârput toᴋotauvlutik.

²⁷ Atanîglo tâpkoa tamarmik ômatitik ajortomik issumalugomârpuk, nirrivingmilo atautsimi iksivavlutik sagloninik oᴋaromârpuk; sulijomângilagli; naggatiksaᴋ naliutilârmat naliutomi kajusijutaujomi.

²⁸ Tâmnalo utiromârpoᴋ nunaminut piᴋutivaksoagiluni; ômatingalo akkiratoromârpoᴋ angiᴋatigêngnimik ivsornaitomik; pijomajaminiglo piniaromârpoᴋ, utilunilo nunaminut.

²⁹ Naliutomi kajusijutaujomi utiromârivoᴋ tikilunilo nunaminut ânêtomut; naliutomilo kingorlimi ilulangilaᴋ sorlo naliutomi sivorlimi.

³⁰ Umiaᴋsuit Kitimimit akkiratoriatoromârmatta tâpsominga; tamanna pivlugo kiksaromârpoᴋ, utilunilo angiᴋatigêngniᴋ ivsornaitoᴋ ômigidlaromârpâ, pijomajaminiglo piniaromârpoᴋ, ilâ, utiromârpoᴋ, angiᴋatigêngnimiglo ivsornaitomik ᴋimaijut ilanârinasuaromârpait.

³¹ Sakkolijartullo ililitoromârpât, sujuijomârpullo ivsornaitovingmik taluksoarniglo; soraititsijomârpullo tunigutinik ôtaksanik noᴋajuiᴋojaujunik nungutsiviublo maggojungnarninga âᴋiksoromârpât.

³² Angiᴋatigêngnimullo idluiliortut tâpsoma ivsornartungortitsomârpait oᴋautsinut pingitsitortunut; inuilli ilitarᴋsijut Gudimingnik sôngosidlaromârput sulijomârlutiglo.

³³ Silatujullo inuit akornganêtut ajoᴋituijomârput unuktunik; oggotitaujomârpulli saviksoarmut, ikomamullo, aularutijaunimullo, aᴋsârnigauvlutiglo uvlut unuktut nâvlugit.

³⁴ Oggogaloarunigli ikajortaujomârput ikajornimut mikijomut; unuktullo ilangutijomârput tâpkonunga oᴋautsitigut pingitsitortutigut.

³⁵ Silatujullo ilangit oggojomârput sujungaititauᴋovlugit, ivsornaititauᴋovlugillo, ᴋaᴋorsartauᴋovlugillo, naggatiksab naliuniksanga tikidlugo; naliutomut kajusijutaujomut sulli ilingangmat.

³⁶ Atanilo pijomajani maliklugo piniaromârpoᴋ; pimariutitsomârporlo nangminiminik, anginisautitsomârporlo nangminiminik gudinit tamainit, gudillo Gudingat oᴋarnilutigijomârpâ tatamnartunik; sulidlaromârporlo ningaumajârnirub naliuninga nâmaksiᴋârtinago; kajusijutaujoᴋ nalautsilârmat.

³⁷ Atâtamilônêt gudingit iliraginiangilait, arnallônêt kajunginarningit, gudillo nalialônêt iliraginialungilâ; tamainit anginisautitsomârami.

³⁸ Iniminili aksoronirub gudinga opigijomârpâ; gudiojorlo atâtami ilitarilaungitangat opigijomârpâ goldimut silbirimullo ujarᴋanullo pivianartunut piᴋutinullo ivlinatunut.

³⁹ Iglugasaksuillo sôngonerpâmik avaluliosimajut suliarijomârpait gudib takorngartab ikajorninganut; tâpsominga opiguktut opigijaudlartitsomârpait; nâligangortitsomârlugillo unuktunut, nunalo avgoromârpâ akkimut.

⁴⁰ Naggatiksablo naliuniksangani ataniub ânimiub pâgomârpâ, atanilo avanimioᴋ tâpsomunga tikitsomârpoᴋ ulajujaᴋsoatut, ᴋamutiniglo horsilijartuniglo umiaᴋsoaniglo unuktunik ilaᴋarluni; nunanullo itâromârpoᴋ siamârlunilo ᴋângilunilo.

⁴¹ Nunamullo alianartomut itâromârpoᴋ, unuktullo oggotitaujomârput; ukkuali piulijaujomârput tâpsoma agganginit: Edomekut, Moabekullo, Ammoniblo ᴋitorngangita iᴋanartungit.

⁴² Agganilo issagomârpait nunanut, nunalo Egipten pijaungijomângilaᴋ.

⁴³ Aulajomârpaillo piᴋutit torᴋorsimajut goldiojut silbiriojullo, ivlinatullo tamaita Egiptinimêtut: Libiamiullo Etiopiamiullo tâpsoma itiganginêtsomârput.

⁴⁴ Unipkautsilli unangat avangallo ulapitsomârpât; aularomârporlo ningarpâdlarluni assiroijomavluni unuktuniglo pêjaijomavluni.

⁴⁵ Tupinilo inornadlartut napartitsomârpait imarbîk akorngangni, ᴋaᴋᴋab alianartub ivlinartublo tungâni; sullili naggatiksaminut tikiutilârpoᴋ, ikajoromajoᴋaromângilarlo tâpsominga.