Daniel 10 - Labrador Inuttitut Heritage Bible

¹ Koresib, Persiamiut ataningata, jâringita pingajuani oᴋausiᴋ nalonaijartauvoᴋ Danielimut, Beltesasarimik atsirataujomut; oᴋausilo miksiᴋârtôvoᴋ, tamadja sorᴋsungnisoarmik; tâpsomalo oᴋausiᴋ tukkisilugo takotitjut ipaksigivâ.

² Naliutomi tâpsomani uvanga Danieli kiksatsainarpunga vôgit pingasut nâvlugit.

³ Iklingnartomik nirringilanga, niᴋêjamiglo vainimiglo oᴋomisilungilanga, mingoarlungilangalônêt uvamnik, vôgit pingasumarît nâᴋârtinagit.

⁴ Takᴋiublo sivorlerpâb uvlungita 24ingani kôb Hidikilib sinânêtilunga,

⁵ Arlorpunga takosarlungalo, ahâglo, angut miᴋoᴋangitomik ᴋaᴋortamik annorâlik, makitimigullo tapsirutilik goldiojomik Ufazemit pijomik;

⁶ Timinga ujarᴋatut Tarsisemit pijotun-ipoᴋ, kênangalo ᴋaumalaᴋtut, ijîgik sorlo ᴋollîk ikomajûk, talîgiglo itigangillo tautuᴋarput ᴋaᴋorlitut ᴋibliriᴋsârtaumajotut, oᴋâlaningatalo nippiᴋortoninga sorlo inugiartoᴋsuit nippingat.

⁷ Uvangalo Danieli kissima takotitjutit takovakka; angutit ilagijama takungilait takotitjutit; iᴋsiniruble angijûb tupvigivait, ᴋimâvullo ijiriatorlutik.

⁸ Inutôvlunga ᴋimaktauvunga tagva, takotitjullo tamanna angijoᴋ takovara, nukingêrutivungalo; nukiᴋarnira assirotaumarikpoᴋ, pitsartuniᴋarungnaipungalo.

⁹ Oᴋâlaningalo tusarpara, tusarapkolo oᴋâlaninga pâmâkivunga, siningmullo itijomut tikitaugama, kênara nunamut pûlugo sinikpunga.

¹⁰ Ahâglo, aggait aktorpânga, pallungatilungalo sêrᴋumnut aggangmalo itimanginut.

¹¹ Oᴋautivângalo: Danieli, idligijaudlartotit, oᴋautsit oᴋausirijakka ilingnut kamagitsiarkit, nikovilutillo; ilingnut tilijaugama mâna; taimaglo oᴋautingmanga nikovipunga, sajuklungali.

¹² Oᴋautivânga tagva: Erᴋsiniarnak, Danieli, uvlormit sivorlipâmit ômatit kamatsiartilaurangni, manigôtilauravillo Gudivît sângani, oᴋautsitit tusartauvut; tikipungalo oᴋautsitit pivlugit.

¹³ Persiable ataniovingata angajoᴋâᴋsoangata akkiratorpânga uvlut 21 nâvlugit; sunaubvali Migailib, angajoᴋaunirojut ilangata ikajoriartorpânga: uvangalo Persiab ataninginêtualauᴋpunga.

¹⁴ Tikipungali mâna ajoᴋitoromavlutit naliutijomârtunik inuᴋotingnut uvluni kingorliojuni: takotitjut uvlut unuktut ᴋângipatta kissiani nalaulârpoᴋ.

¹⁵ Oᴋautsillo tamakkoa oᴋausiringmagit uvamnut, okungavunga niplinangalo.

¹⁶ Ahâglo, inûb, ᴋitorngangatut adsiᴋartûb ᴋangasinâka aktorpâk; ᴋanira aitarpara tagva, okarlungalo oᴋautivara sâmni nangitoᴋ: Nâlegara, takotitjut tamanna pitjutigillugo, kiksautigijakka utiput uvamnut, nukiᴋarungnaipungalo.

¹⁷ Kanorlo nâlikama kivganga una oᴋarungnarᴋâ nâlikamnut omungâ? Uvangali, tagvainaᴋ nukingêrutivunga, anirsâlungalônêt ajulerpunga.

¹⁸ Amalo inuktut adsiᴋartûb aktorivânga, tâpsomalo pitsartutipânga.

¹⁹ Oᴋarporlo: Angut idligijaudlartotit, iᴋsiniarnak; ulapirᴋsautiᴋarit, sôngosilerit, ilâ, sôngosilirit. Oᴋarvigingmangalo pitsartutitauvunga, oᴋarpungalo: Nâlegara oᴋâlagit; pitsartutigamga.

²⁰ Tagva oᴋarpoᴋ: Kaujimavêt tikitjutigijamnik ilingnût? Mâna utiromavunga Persiab angajoᴋâᴋsoanga sorᴋsugvigijomavlugo; aularumalo, ahâk, Griggit angajoᴋâᴋsoanga tikilârpoᴋ.

²¹ Oᴋautitsomavagilli miksiᴋârtub aglangini aglaᴋsimajunik: ipkonungali ikajortaungilanga, angajoᴋâᴋsoapsi Migailib kissimi ikajorpânga.