Daniel 1 - Labrador Inuttitut Heritage Bible

¹ Jojakimib, Jûdab ataningata, atanioningata jâringita pingajuangni, Nebukadnezar, Babilonib ataninga tikipoᴋ Jerusalemut, ilumavlugolo.

² Nâlekablo Jojakim Jûdab ataninga tunivâ tâpsoma agganginut, Gudiblo iglungata piᴋutingita ilangit; tâpsomalo aularutivait nunamut Sînarimut gudingoarmi iglunganut: piᴋutillo ilivait gudingoarmi ᴋimatulivinganut pivianartotalingmut.

³ Ataniublo Aspinâsi, aipaitôᴋojami angajoᴋângat, oᴋarvigivâ itititsiᴋovlugo Israêlib ᴋitorngangita ilanginik, tagva ataniub kivgangita iᴋanartullo ilanginik;

⁴ Inôsuktunik ᴋanoingitsiartunik takominartuniglo, issumagiktunik, ilisimajuniglo, silatojuniglo, poᴋituniglo, ilusitsiariktuniglo sapilungitunik kivgartornimik ataniub iglungani; ajoᴋitoraksaringmagillo Kaldêarit aglanginik oᴋausinginiglo.

⁵ Ataniublo tâpkoa niᴋiksaᴋartipait ᴋaut tamât uvlub piksanganik ataniub mamagijanganit, vainimiglo ataniub imiksanganit, inugoijauᴋovaillo jârit pingasut nâvlugit; jârit tâpkoa nâkpatta kivgartortuksauᴋovlugit ataniub sângani.

⁶ Tâpkoalo akornganêput Daniele, Hananialo, Misailelo, Asarialo, Jûdab ᴋitornganginit.

⁷ Aipaitôᴋojaujullo angajoᴋângata attitârtipait; Danielelo atsirarpâ Beltesasaremik, Hananialo Sâdrakemik, Misailelo Mîsakemik, Asarialo Abednegomik.

⁸ Danielili kajusivoᴋ ômatimini ivsornartitsomanginami ataniub niᴋiksanganut mamagijanganut, vainimullo tâpsoma imiksanganut; taimaimallo aipaitôᴋojaujut angajoᴋânga ᴋinuvigivâ ivsornartitauᴋojaujomanani.

⁹ Gudiblo Danieli saimaniᴋsitipâ naglingniᴋsitilugolo aipaitôᴋojaujut angajoᴋângata takoani.

¹⁰ Aipaitôᴋojaujullo angajoᴋângata Danieli oᴋautivâ: Nâlegara ataniᴋ piᴋojijoᴋ niᴋiksapsingnik imiksapsingniglo sivôragivara; suna pivlugo ataniub Nebukadnezarib kênasi takojaksarivagît takominailuartilugit inôsuktoᴋatipsi kênanginît? Taimâk niaᴋora nangianartomêtinajarpasi atanimut.

¹¹ Danielibli piji, aipaitôᴋojaujut angajoᴋângata pairᴋsijungortitanga Danielimut, Hananiamullo, Misailemullo, Asariamullo, oᴋautiva:

¹² Kivgatit ôktolaukittôᴋ uvlut 10 nâvlugit; tunitjivigilitigullo pirorsianik niᴋiksaptingnut, imimiglo imiksaptingnut.

¹³ Taipsomanilo tautuvut inôsuktullo ataniub niᴋiksanganit nirrijut tautungit ᴋimigojaulit sângni; takojallo maliklugo kivgatit piniarvigilârpatit.

¹⁴ Tâpsomalo tamattominga nâlakpait, ôktorlaitalo uvlut 10 nâvlugit.

¹⁵ Uvlullo 10 nângmatta tautungit takominaluarput ᴋuiglaunisauvullo inôsuktunit tamainit ataniub niᴋiksanganit nirrijunit.

¹⁶ Taimaimat pijib niᴋiksauᴋojaujut vainilo imiksauᴋojaujoᴋ tapkonunga pêrpait, tunitjivigilugillo pirorsianik.

¹⁷ Inôsuktulli tâpkoa sitamat Gudib silatutilugillo poᴋitipait aglalerinini tamaini ilisimanimilo: Danielilo tukkisivoᴋ takotitjutinik sinnartômaniniglo tamainik.

¹⁸ Uvlullo ataniub piᴋojijutigijangit tâpkoa saᴋᴋijârtitaugianginut nângmatta, aipaitôᴋojaujut angajoᴋângata ititipait Nebukadnezarib sânganut.

¹⁹ Ataniublo oᴋaᴋatigivait, ilûnatiglo akorngani naipitaujoᴋangilaᴋ Danielitut Hananiatullo Misailetullo Asariatullo; taimaimat tâpkoa ataniub sângani ᴋikarᴋojauvut.

²⁰ Sumiglo ilisimanimiglônêt silatunimiglônêt pijariaᴋartunik ataniub apitsoramigit, tamaini malugivait 10-ertorlutik ilisimanisaungmatta ilisimajunit angakonillo tamainit ataniovingminêtunit.

²¹ Danielilo tagvanêpoᴋ ataniub Koresib jâringita sivorlipângat tikidlugo.