Apostelit Piniarningit 9 - Labrador Inuttitut Heritage Bible

Saulusib sâgiartitauninganik. Tabêab ômartitauninganik Pêtrusemut.

¹ Saulusele sule ᴋinigiarpok silungnermut toᴋotsinermullo Nâlekab iliniartinginik, ajoᴋertuinerojomullo aivok,

² Kenuvigivâlo aglangnik pijuksanik Damaskusemut katimavingnullo tagvanêtunut, ilanginik okpertunik naipitsinajarune, taipkoa angutit arnallônêt ᴋelaksorᴋârdlugit tikiutsomagamigit Jerusalemut.

³ Apᴋomêtilugolo, Damaskusib ᴋanitanganêdlune, tagvainak ᴋaumajub ᴋilangmit pijub ᴋaumarsarpâ.

⁴ Nunamullo ochovok, nipemiglo tusarpok oᴋautjijomik ôminga: Saul, Saul, sôk unangmivingâ?

⁵ Oᴋautivâle; Nâlegak, kinauvêt? Nâlegak oᴋarpok: Jêsuseovunga unangmijat.

⁶ Makilerille ailutillo iglugasaksoarnut, tagvane oᴋautjaulârpotit piniaraksarnik.

⁷ Angutille ingergaᴋatingit ᴋoaksângavlutik nangerput, nipe tusaramitsuk inuksinatiglo.

⁸ Saulusele makipok nunamit, uitaleramelo tautungilak sumik, aggangitigulle tiguvât, tasiorpâllo Damaskusemut.

⁹ Uvlunelo pingasune tautugane narrinanelo imingilak.

¹⁰ Damaskusemele iliniartoᴋalaukpok Ananîasemik atilingmik; tâpsomunga Nâlegak oᴋarpok takotitjutikut: Ananîase! Oᴋarporlo: Ovanêpunga Nâlegak.

¹¹ Nâlekab oᴋautivâ: Nikovilerit, ailutillo apᴋosinermut Naggojomik taijaujomut, Jûdablo iglungane Saulusemik atilik aperᴋotigiuk Tarsusemiok; ahâk tuksiarpok.

¹² Takotitjutikut takolaukpok angumik, Ananîasemik atilingmik, iteriartortiminik, aggangminullo patingmijiminik tautulermerᴋovlugo.

¹³ Anasîasible kiovâ: Nâlegak, angut taimna unuktunit tusaumavara okpertoᴋotingnik kappiasuktitseᴋattalauktok angijomik Jerusaleme.

¹⁴ Ajoᴋertuijoksuillo perᴋovait ovane ᴋelaksorlugit tamaita aternut tuksiartut.

¹⁵ Nâlekable oᴋautivâ: Ainiarit, tâmna uvamnut anerimajok, atortuksauvlune atera oᴋautigilugo nalojunut, atanersoarnullo, Israêliblo ᴋitornganginut.

¹⁶ Kaujititsomavara, ᴋanok angijomik kappiasuktitaujomârmat atera pivlugo.

¹⁷ Ananîasele aivok iterlunelo iglomut; aggangminullo patingmivâ oᴋarlunelo: Naglingnartok ᴋatangut Sauluse, Nâlekab Jêsusib, takotitub ilingnut apᴋome tamaungartilutit, tilivânga tautuktitauᴋovlutit ilumertauᴋovlutillo Anernermik ajunginermik.

¹⁸ Tagvainarlo kavisitun-itunik kataktoᴋarpok ijîgingnit, tautulerivorlo;

¹⁹ Makilunelo baptitaulerpok, nerrilarmelo nakoksijauvok. Saulusible uvlut ilanginik ilinniartut Damaskusemêtut najulerpait.

²⁰ Mânakullo tagva Kristuse oᴋautigivâ katimavingne Gûdib Ernerijanganik oᴋarlune.

²¹ Tamattomingale tusartut ilûnatik tataminiarput oᴋarpullo: Aserorterilauktoungitôk una ilûnainik Jerusaleme tuksiartunik Jêsusib atinganut, tamaungalauktorlo ᴋelaksorsimatilugit pititsomavlugit ajoᴋertuijoksoarnût?

²² Saulusele sôngosivalliavok, Jûdillo Damaskusemiut nippangertipait, Jêsuselo Kristuseojoᴋ oᴋautigitsiarlugo.

²³ Uvlullo unuktut kingorngatigut Jûdit ᴋaggimiolerput toᴋotsomavlugo.

²⁴ Saulusele oᴋautjaulerpok, unangmijomangmatsuk. Itertarvingnele udjertorput uvlôtilugo unnuamelo, toᴋotsomavlugo.

²⁵ Tagva ilinniartut unnuame tiguvât amârgaujakut ningitipât avaloksuit silatânut.

²⁶ Saulusele Jerusalemut tikiname, ilinniartut ilaginasualerpait; Ilûnatigle erksigivât, okperatiglo ilinniarteoninganik.

²⁷ Barnabasible ingminut pitipâ, âlâllo Apostelinut, unipkautivlugillo, ᴋanok Paulusib Nâlegak takolaungmago, tâpsomalo oᴋautilaungmago, ᴋanorlo sivôranane oᴋâlalaungmat Jêsusib atinganik Damaskuseme.

²⁸ Najugarilerpaillo Jerusaleme, anivigiᴋattarlugillo itervigiᴋattarpait, sivôrananelo oᴋâlavok Nâlekab Jêsusib atinganik.

²⁹ Oᴋâlavlunelo apersoᴋatigivait Grîkit; tâpkoale toᴋonasualerpât.

³⁰ Katangutigêlle tamattominga tusaramik, Zesarêamut ᴋanilârpât, tagvangallo Tarsusemut aiᴋovât.

³¹ Ilagêktut mâna unangmijaujungnairput Jûdêame ilûnâne, Galilêamelo Samâriamelo, sôngosivalliavlutiglo, Nâlegarlo nâleklugo inôvut, Anernerublo ajunginerub manigoininganik ilumertaulaukput.

³² Pêtrusele ilunaitigut ingergarame, okpertunut Liddamêtunuttauk pigivok.

³³ Tagvane angumik naipitsivok Enêasemik atilingmik; tâmna jârinik sitamaujortunik nalainalaukpok, tumângalaurame.

³⁴ Pêtrusiblo oᴋautivâ: Enêase, Jêsusib Kristusib pijungnaitipâtit; makitit, aumititillo nangminek âᴋikit! Tagvainarlo makipok.

³⁵ Liddamêtullo Saronemêtullo ilûnatik takovât sâgiarlutiglo Nâlekamut.

³⁶ Joppemele ilinniartoᴋalaukpok arnamik Tabêamik atilingmik, Grîkit taijangannik Dorᴋasemik; tâmna ajungituliᴋattalaukpok pitsiarlunelo aklujunut.

³⁷ Taipsomanele ᴋanimalerpok toᴋolarmelo. Tagva tâmna ubvarpât illivâllo iglut ᴋolerpânganut.

³⁸ Liddale Joppib ᴋanitanganêngmat, ilinniartut tusaramik Pêtrusemik tagvanêtomik, angutîngnik maggungnik tiliklerput tâpsomunga, ᴋenuvigivâllo, ᴋununane tikerᴋovlugo taipkonunga.

³⁹ Pêtrusele nikovilerpok ilagivaglo. Tikisimangmallo, tassiorpât iglut ᴋolerpânganut, uigarnerillo ilûnatik ilumavât, ᴋugviorlutiglo, uliksuillo annorâllo sakᴋertipait tâpsomunga, Dorkasib sanajaviningit, najortigingmatsuk.

⁴⁰ Pêtrusiblo tamaita anitinamigit, sêrᴋortorlune tuksiarpok, timelo tagva sâdlugo oᴋarpok: Tabêa, makitit! Uipok tagva; Pêtruselo takogamiuk, makilune ingipok.

⁴¹ Tâpsomale aggane isaklugit nikovitipâ; okpertullo uigarnerillo iterᴋovait, ômartorlo takojautipâ.

⁴² Tamannalo tusaumajaulerpok Joppeme ilûnâne; unuktullo okpilerput Nâlekamut.

⁴³ Uvluniglo unuktunik Joppeme uvlivok Simoneme ᴋetumaksaijome.