Apostelit Piniarningit 8 - Labrador Inuttitut Heritage Bible

Saulusib unangmiklerninganik ilinniartunik. Samâriamiut sâgiarninginik. Simonib angakoninganik. Pimaklertib sâgiarninganik.

¹ Saulusible Stefanusib toᴋotauninga idluarivâ. Taipsomane ilagêktut Jerusalemêtut angijomik unangmijaulerput; tâpkoalo ilûnatik siamarterput nunangnut Jûdeamut Samâriamullo, Apostelit kisimik pinatik.

² Angutille okpertut Stefanuse ilijartorpât, angijomiglo ᴋeavât.

³ Saulusible ilagêktut nungupait, iglut ilûnaita itersârpaklugit, angutillo arnallo sakᴋertipait, pitilaitalo parngnanairsimavingmut.

⁴ Siamartersimajulle arvertarput, Oᴋautsillo tusarnertut oᴋariartôtigivlugit.

⁵ Filippusele atersârpok iglugasaksoarnut Samâriamêtunut pilune, Kristusemiglo oᴋâlavigivait.

⁶ Inuille nâlatsiaᴋatigêkput Filippusib oᴋausinginik, tautularmiglo nalunaikutaksoarnik piniarnerijanginik.

⁷ Anernerit maᴋijungnartut aningmatta unuktunit ilumiktunit nippeᴋadlarlutik, tumângajullo tusiaktullo unuktut âᴋiktauvut.

⁸ Iglugasaksoarnelo tâpkonane ᴋuviasuvaksoadlarput.

⁹ Anguteᴋarporle iglugasaksoarne tâpkonane Simonemik atilingmik, sivorngane tôrngilauktomik. Tâpsoma Samâriamiut uivêridlalaukpait, angakomariksônerminik oᴋarlune.

¹⁰ Ilûnatiglo, mikijullo angijullo, tâmna kamagivât oᴋarlutiglo: Tâmna Gûdib pitsartunersoangatun-ipoᴋ.

¹¹ Tamanna pivlugole kamagivât, akunersoarmik uivêrilaungmagit angakôtsiminut.

¹² Filippusible oᴋâlaninginik Gûdib nâlegauvinganik Jêsusiblo Kristusib atinganik okpileramik, baptitaulerput angutillo arnallo.

¹³ Tagva Simonetauk okperivok baptitauvlunelo, Filippuselo najugarilerpâ. Nalunaikutaksuillo tatamnartullo pijut takogamigit, tataminiarpok.

¹⁴ Apostelille Jerusalemêtut tusaramik Samâriamiunik Gûdib oᴋausinginik ilaliulertunik, Pêtruselo Johanneselo taipkonunga tilivakit.

¹⁵ Tâpkoa atâramik, tuksiarutivait, Anernermik ajunginermik tunitsivioᴋovlugit.

¹⁶ (Tâpsoma sule tâpkoa ilangallônêt tikivigilaungimago, Nâlekab Jêsusib Kristusib atinganut kisiane baptitaulaungmatta.)

¹⁷ Aggangmingnullo patingmingmatikik, Anernek ajunginek pigilerpât.

¹⁸ Simonible takogamigit Anernermik ajunginermik tunitsiviojut, Apostelîk aggangmingnut patingmikpatikik; kênaujanik tunitjivigijomavak,

¹⁹ Oᴋarlunelo: Uvangatauk taimaitomik pitsartunermik tunitsivigitinga, naliat aggamnut patingmijaujok Anernermik ajunginermik tunitsivioᴋovlugo.

²⁰ Pêtrusible oᴋautivâ: kênaujaᴋotitit ilagivlugit erᴋartortait, isumagavit, Gûdib tunergutâ pisiarilugo kênaujanut.

²¹ Oᴋausek una piginagolo ilangiutiviginiangilallônêt, ômatit idluangimat Gûdib sângane.

²² Tamanna pivlugo ᴋaᴋialerit tamattominga idluilungnernik, Gûdemullo tuksiarit ômativît isumalungningit isumagijaujungnainiangimangâta.

²³ Tukisigapkit, sungarmik ᴋasilinartomik tattenavit, ᴋelaksorsimavlutillo idluiluktomut.

²⁴ Tagva Simon kiovoᴋ oᴋarlunelo: Iliptik Nâlekamut tuksiaritik pivlunga, oᴋautigijaptik naliallônêt uvamnut perᴋonago.

²⁵ Tâpkoale, Nâlekab oᴋausingit kigligiutigilaitalo oᴋautigilauramikik, Jerusalemut uterivuk, oᴋâlavlutiglo oᴋautsinik tusarnertunik Samâriamiut iglugasangine unuktune.

²⁶ Nâlekable Engelinga Filippusemut oᴋarpok: Nikovilerit ailerlutillo seᴋinerdlinut, apᴋosinek Jerusalemit Gâzamut ilingajok atorlugo inuᴋangitokut.

²⁷ Nikovidlunelo ailerpok, ahâglo, Etiôpiamiok (ingergajok) pimaklerte angut angajoᴋâksoak Etiôpiamiut atanersoangane arname, Kandâzemik atilingme, taipsoma perᴋutinginik ilûnainik udsertortok; tâmna Jerusalemut tikilaukpok tuksiariartorlune.

²⁸ Angergarasuarporlo nunaminut ᴋemukserlune, nalautaijublo Jesaiasib aglangit atuarpait.

²⁹ Anerneruble Filippuse oᴋautivâ: Ailerit, ᴋemuksit ukua najorlugit.

³⁰ Filippusible akpangerdlune tikinamiuk, tusâvâ nalautaijub Jesaiasib aglanginik atuarsijok, aperivâlo: Atuartatit tukisigalloarpigît?

³¹ Oᴋautivâle: Ajoᴋertortaunanga ᴋanok pijungnarᴋêk? Filippuselo inalerpâ ikimaᴋatigigumavlugo.

³² Aglaillo atuartangit imaiput: Tassiortauvok saugaktut toᴋotauvingminut, saugâraktullo niplingitotut salijiminut, taimaktauk tâpsoma ᴋanine aitalaungilâlônêt;

³³ Miklilertisimanermine âniatitaunersoane anigorpait. kiale inôningata sivituninga oᴋautigijungnarpaûk? inôninga nunamit pêrtaulaungmat.

³⁴ Tagva pimaklertib Filippuse kiovâ oᴋarlunelo: Kenuvigivagit, oᴋautilaunga, nalautaijub kina oᴋautigivaûk? nangminerminiglônêt asiminiglônêt oᴋarᴋâ?

³⁵ Filippusible ᴋanine angmalerpâ, oᴋautsit tamakkoa pitjutigerᴋârdlugit, oᴋâlavigivâlo oᴋautsinik tusarnertunik Jêsuse pivlugo.

³⁶ Ingergaramiglo imeᴋartomut tikipuk; pimaklertelo oᴋarpok: Ahâk, imek tagga, suna agviarᴋâ baptitauᴋonangâ?

³⁷ Filippusele oᴋarpok: Omamut iluitomut okperuvit pijuksauvotit. Tâmna kiovok oᴋarlunelo: Okperpunga, Gûdib Jêsuse Kristuse erneringmago.

³⁸ Kemuksillo noᴋᴋartipait, imermullo tamarmik pilutik Filippuselo pimaklertelo; Filippusiblo baptipâ.

³⁹ Kaᴋᴋingmaniglo imermit, Nâlekab Anerningata Filippuse aularutivâ; pimaklertiblo takojungnairpâ; ᴋuviasuklunele angergarpok.

⁴⁰ Filippusele Asdodeme naipitauvok, tagvanelo arvertarpok iglugasaksoarnut ilûnainut, oᴋautsillo tusarnertut oᴋautigilugit, Zesarêa tikilugo.