Apostelit Piniarningit 5 - Labrador Inuttitut Heritage Bible

Ananîasib Safîrablo tuavitomik toᴋonîgingnik. Apostelit parngnanairsimavingmit tatamnartomik anititauninganik. Gamaliêlib tiliorininganik.

¹ Angutible Ananîasemik atiliub, nuliane Safîra ilagilugo, perᴋutine niorvgotigivait,

² Akingitalo kênaujat ilangit angiarivait, nuliane ᴋaujimatilugo, ilainangille ᴋaipait ilivlugillo Apostelit itiganginut.

³ Pêtrusele oᴋarpok: Ananîase, sôk Sâtanasib ômatit ilumertipaûk, Anerneᴋ ajunginek sagloᴋidlarangne, perorsêviub akingita ilangit angiarilugît?

⁴ Perorsêvigigangne, perᴋutigilaungipiûk? pisiarijaungmallo, akkingatauk ilingnut perᴋutiksaulaungilâᴋ? sôk ômatingne taimâk isumalauᴋêt? Inungnik sagloᴋitsingilatit Gûdemigle.

⁵ Ananîasible oᴋautsit tamakkoa tusaramigit, ochovok anerneᴋarungnairlunelo. Tamattomingalo tusartut angijomik erksivut.

⁶ Inôsuktulle angutit nikovidlutik imuserpât, anilâllo iluverlugolo.

⁷ Kingorngagûlermallo, stundit pingasut kingorngatigut, nulianga iterpok, nalovlune ᴋanoetoᴋalernermangât.

⁸ Pêtrusible oᴋautivâ: Oᴋautilaunga, perorsêvik taimâk akkitutigijomik niorvgutiginerpitikkô? kiovâ: Ahaila, taimâk akkeᴋalaukpok.

⁹ Pêtrusible oᴋautivâ: Sôk adsigêktomik isumaᴋarpitîk Nâlekab Anerninga ôktoromavlugô? Ahâk uingnik iluversijut itigangit upkuab silatânêput, igvittauk aniniarivâtit.

¹⁰ Tagvainarlo itiganginut ochovok anerneᴋarungnairlunelo. Tagva inôsuktut angutit iterput, toᴋungajorlo naipipât, anidlugolo iluverpât uingata sanianut.

¹¹ Ilagêktullo ilûnatik angijomik erksilerput, tusartullo tamattominga ilûnatik.

¹² Apostelille aggangitigut unuktunik nalunaikutanik tatamnartuniglo pijoᴋalaukpok inungne, ilûnatiglo adsigêktomik isumaᴋaᴋatigêklutik Salomob iglorusinganêput.

¹³ Asingitale najorlugit sivôragivait, inuille opigivait.

¹⁴ Nâlekamulle okpilertut unuksivalliavut, angutillo arnallo unuktoksuit.

¹⁵ Kanimajut aglât apᴋosineâlungnut anipait, aumitinullo akkigautinullo ilivait, Pêtrusib sanarᴋokpagit, tachanganut ilangit tâktauᴋovlugit.

¹⁶ Inugiartoksuittauk iglugasaksoarnit erkânêtunit Jerusalemut pivut, ᴋanimajullo, anernernullo maggojungnartunut kappiasuktitaujut tikiupait, ilûnatiglo âᴋiktauvut.

¹⁷ Ajoᴋertuinerojorle nikovipok, ilagijangillo ilûnatik Saduzêeriojut ningarosulerlutiglo.

¹⁸ Apostelillo tiguvait, parngnanairsimavingmullo pitilugit.

¹⁹ Nâlekable Engelingata parngnanairsimaviub upkuanga angmarpâ unnuame, anitilugillo oᴋarpok:

²⁰ Aileritse, sakᴋerluselo katimaviksoarme, oᴋautsiniglo ômanartunik ukuninga tamainik oᴋâlatitse inungnut.

²¹ Tamanna tusaramitsuk uvlârorlutik katimaviksoarmut ajoᴋertuijartorput. Ajoᴋertuinerojuble ilagijangitalo ᴋailutik katimaᴋolerpait kiglisiniarpaktut Israêliblo ᴋitorngangita angajoᴋângit tamaita, parngnanairsimavingmullo tiliklerput aijauᴋovlugit tâpkoa.

²² Kivgalle tagvunga pigamik parngnanairsimavingmêlauktut kingorarpait; angergarivut tâva unipkâriartorlutik,

²³ Oᴋarpullo: Parngnanairsimavik naipigalloarpavut palangairsimatsiartok, udjertortullo silatânêtut; upkuêraptigole inuksingilagut.

²⁴ Ajoᴋertuinerojuble, katimaviksoarmelo aulatsijub, ajoᴋertuijoksuillo oᴋautsit tamakkoa tusaramigit, ᴋoaksângalerput, ᴋanok tamanna ilinganiarmangât.

²⁵ Tagva unipkâriartortoᴋarpok tâpkonunga imâk: Ahâk, angutit parngnanairsimavingmut pitilauktase katimaviksoarmêput, nangerlutiglo inuit ajoᴋertorpait.

²⁶ Tagva aulatsijub kivgane ilagilugit pijartorpait, aksorornagille, inuit sivôragigamigit, ujarᴋanut milortauniarasugilutik.

²⁷ Tikiutigamigillo, kiglisiniartunut pitipait. Ajoᴋertuinerojublo apersorpait,

²⁸ Oᴋarlunelo: Inertilaungilapsê ilungertorluta, ajoᴋertuerᴋonase tâpsoma atinganê? Ahâglo, ilipse Jerusalemiut ilumertipase ajoᴋertûtipsingnut tamattomunga, inûblo tâpsoma aunga uvaptingnut pititsomavase.

²⁹ Pêtrusible kiovait Apostelillo oᴋarput: Gûde nâlengnarnersauvoᴋ inungnit.

³⁰ Atâtagijapta Gûdingata Jêsuse makitilaukpâ, toᴋolauktase nivingalauktaselo ᴋejungmut.

³¹ Tâmna Gûdib talerpingmigut Nâlegangortilaukpâ piuliklertungortilâllo, Israêlitit ᴋaᴋialerneᴋartitauᴋovlugit isumangnarungnaitoᴋartitauᴋovlugillo ajortunit.

³² Uvagullo, Anernerlo ajunginek, Gûdib tunilauktanga nâlektiminut kigligiudsijôvogut oᴋautsit tamakkoa pivlugit.

³³ Tamanna tusaramitsuk, ômateroktauvut, toᴋotsomavlugillo isumalerput.

³⁴ Tagvale Farisêerit ilangat nikovipok kiglisiniartut akorngane, Gamaliêlemik atilik, aglangnik ilisimajok, inuit ilûnatik opigijangat; tâpsoma Apostelit anikitomik anititauᴋovait.

³⁵ Oᴋautivaillo: Ilipse angutit Israêlitiojose udjertoritse nangminipsingnik inuit ukua pivlugit, ᴋanok piniaromangmangâpsigik.

³⁶ Uvlut tamakkoa sivorngatigut Tiudase sakᴋerpok, ingminiglo pimariuterlune, angutigasaksuillo 400 it taimna ungagivât; taimna toᴋotauvok maliktullo taipsominga ilûnatik siamardlutik nungutauvut.

³⁷ Taipsoma kingorngagut Jûdase Galilêamiok sakᴋerivok, uvlut (inungnik) aglaktauvît naliutingmatta; taipsoma inuit unuktoksuit uivêrivlugit ilagivait; taimnatauk nungutaugivok, ilûnatiglo maliktut taipsominga siamartitauvut.

³⁸ Mânalo oᴋautivapse: Inuit ukua allarsigik, aularlit! Oᴋautsit piniarnerillo ukua inungnit pituinarunik, nungujomârput;

³⁹ Gûdemille pikpatta, aserorlugit ajorpase; Gûdemut akkerartoromajutitut naipitauᴋonase.

⁴⁰ Nâlekpât tagva, Apostelillo ᴋaiᴋovait isaᴋalaitalo, inerterlugillo Jêsusib atingane oᴋarᴋonagit, aularᴋovaillo.

⁴¹ Kuviasuklutigle tagva kiglisiniartut kênanginit aularput, nikagijaunginamik mitautigijauvlutik Jêsusib atinga pivlugo.

⁴² Sorairatiglo ajoᴋertuivut uvlut tamaita katimaviksoarme iglullo nallîne, oᴋautigilugillo oᴋautsit tusarnertut Jêsuse Kristusemik.