Apostelit Piniarningit 4 - Labrador Inuttitut Heritage Bible

Pêtrusiblo Johannesiblo parngnanairsimavingmut pititaunîgingnik. Okpertut tuksiarningat unangmijaunerme. Ilagêt ilinganinganik.

¹ Inungnulle oᴋâlatilugik, ajoᴋertuijut, katimaviksûblo angajoᴋângata, Saduzêerillo opingarpakit.

² Tâpkoa idluigosukput, inuit ajoᴋertormatikik, oᴋâlangmaniglo toᴋungajut makitsomârninginik Jêsuseme.

³ Tiguvlugiglo parngnanairsimavingmut itertipakit, ᴋaulersêvlutik, taipsomane unnungmat.

⁴ Oᴋautsinigle tusartut unuktut okpilerput, kitilugit angutit 5,000 dikasaulerput.

⁵ Kaulermalle aulatsijut, angajoᴋâllo, aglangniglo ilisimajut ᴋaggimiolerput Jerusaleme,

⁶ Hannaselo ajoᴋertuinerojok, Kaifaselo, Johanneselo, Aleksanderelo, ilûnatiglo ajoᴋertuinerojub ilangit.

⁷ Sâmingnullo pitipakit (Pêtruselo Johanneselo) apersorlugiglo: kia taimâk perᴋovâtîk? kialo atingane taimailiorᴋitîk?

⁸ Tagva Pêtrusib Anernermik ajunginermik ilumiktoᴋsôvlune oᴋautivait: Ilipse aulatsijôjose inungnik, angajoᴋaujoselo Israêlitinut.

⁹ Kiglisiniartaugamnuk uvlome ajungitulinek inungmut ᴋanimalauktomut, âᴋiktaujutigijanga pivlugo,

¹⁰ Tagva ilûnase Isrâelitillo ilûnatik ᴋaujimalersiuk, Jêsusib Kristusib Nazaremiub, saningajolingmut kikiaktulauktapse, Gûdible toᴋungajunit tupaktilauktangata atingane una mâne nangermat sâpsingne âᴋiktauvlune.

¹¹ Ujarak taimnauvok, ilipse igluliortose egilauktase, iglub terreᴋoa ujaraulernertok.

¹² Asianiglo piulijiksaᴋangilak, ateᴋangilarlo asianik ᴋilaub atâne, inungnut tunijaujomik, tâpsomunga piloriktitauᴋovluta.

¹³ Pêtrusiblo Johannesiblo sivôrajuinîgik takovakit, tataminiarpullo, ᴋaujimatsiaramik, tâpkoa aglangnik ilisimatsiangimanik, ilinnialaungimaniglo, nâmaktomiglo illitarivakittauk, Jêsuse ilagilaungmakko.

¹⁴ Inugle âᴋiktaujok sanigingnêdlune takogamitsuk, tamanna akkerartorungnangilât.

¹⁵ Anerᴋovakillo kiglisiniarvingmit, isumaksarsioᴋatigêᴋârdlutiglo oᴋarput:

¹⁶ Sumik inûk tâpkoa piniarvigijaksarivitigîk? Jerusalemiut ilûnatik tatamnartulineᴋ tâpkungnûna pijok ᴋaujimavât, uvagullo misiarungnangilagut mattominga.

¹⁷ Kaujijauvalliaᴋonagole inungnut, angijomik inerterlavut, mattoma kingorngane inungmut atautsemullônêt oᴋarᴋonagik tâpsoma atinganik.

¹⁸ Kaiᴋovakillo, inerterkugiglo, oᴋarᴋonagik ajoᴋertuerᴋonagiglônêt Jesusib atinganik.

¹⁹ Pêtrusible Johannesiblo kiovait oᴋautivlugillo: Nangminek kiglisiniaritse, Gûdib sângane idluarmangât, ilipse uvaptingnut nâlektaunersaugupse Gûdemit.

²⁰ Takojavut tusartavullo oᴋautiginagit saperpoguk.

²¹ Inerterpakille aularᴋolugiglo; nagvângilallo âniatitsitiksamik tâpkungnunga, inuit pivlugit; Gûde ilûnatik nakoridlarmatsuk inuk âᴋiktaumajok pivlugo.

²² Inûb tâpsoma tatamnartulinermut âᴋiktaujub jâringit ununersaungmatta 40 init.

²³ Aularᴋojaugamiglo ailerpuk ilamingnut, oᴋautivaillo oᴋautjaunermingnik ajoᴋertuijoksoarnut angajoᴋânullo.

²⁴ Tamanna tusaramitsuk, ilagêklutik niplerput Gûdemut oᴋarlutiglo: Nâlegak igvit Gûdiojotit ᴋilangmiglo, nunamiglo, imarbingmiglo pinginiglo tamainik pingortitsijotit;

²⁵ Igvit kivgavît Dâvidib ᴋaningagut oᴋalauktotit; Sôk nalojut ningarosukkât, inuillo sôk ajornartomik isumasiniarᴋât?

²⁶ Nunab atanivingit katilerput, atanersuillo ᴋaggimiolerput akkerartoromavlutik Nâlekamut Kristusinganullo.

²⁷ Ahamarik ila, katimavut ᴋitorngat hailigeojok Jêsuse mingoalauktat pivlugo, Herôdese, Pontiuse Pilatuselo, nalojut Israêliblo inungit ilagivlugit.

²⁸ Piniarlutik pijuksaulârtunik, mattoma sivorngagut aggangnut ilisimanernullo kajusimajutigilauktarnik.

²⁹ Mânalo Nâlegak, silungninginik takusarit, kivgatillo sivôranatik oᴋâlatikit oᴋausernik.

³⁰ Aggaktillo isakit, âᴋiktaunermik, nalunaikutaᴋsoarniglo tatamnartuniglo pijoᴋarᴋovlugo, ᴋitorngavît hailigeojub atingane.

³¹ Tuksiarmattalo, iglo katimavigijangat aulavok, ilûnatiglo Anernermik ajunginermik ilumertauvut, Gûdiblo oᴋausinginik oᴋâlavut sivôranatik.

³² Okpertulle unuktoksôjut atautsemik ômateᴋarlarmiglo, atautsemik tarneᴋarput (sorlo); perᴋutimingniglo oᴋartoᴋangilat piminik tailugit, tamaitale adsigêktomik avikpait ingmingnut.

³³ Apostelillo kiblingnadlartomik Nâlekab Jêsusib makininga kigligiutjutigivât, ilûnatiglo saimarsauteᴋalaukput angijoksoarmik.

³⁴ Ajoksartoᴋalaungilaktauk tâpkoa akorngane; perorsêvingniglo igluniglo peᴋartut, makkoa niorvgotigivait, niorvgotigijamiglo akingit ᴋaipait,

³⁵ Ilivlugillo Apostelit itiganginut; ajoksartullo ilûnaita tunitjiviovut ajortanginik tamakkonangat.

³⁶ Jôsesele, Apostelit taijangat Barnabasemik (imaipok: manigornerub erninganik) Lêviteojok, Zipruseme inûlertok.

³⁷ Perorsêveᴋarpok, tâpsoma niorvgotigivâ, akkingillo kênaujat ᴋaipait ilivlugillo Apostelit itiganginut.