Apostelit Piniarningit 3 - Labrador Inuttitut Heritage Bible

Angutib sibvêtub âᴋiktauninganik Pêtrusemut Johannesemullo. Pêtrusib oᴋâlaninganik ᴋaᴋialerᴋojijomik.

¹ Pêtrusele Johanneselo majoraᴋatigêkpuk katimaviksoarmut, stundit 9 ingane, tuksiarviovaktok naliutitilugo.

² Anguteᴋalaukporlo sibvêtomik nutaraunerminit; tâmna akkigarlugo uvlut tamaita ilivât katimaviksûb itertarviata pinnarnartomik taijaujub kiglinganut, katimaviksoarmut iteriartortunik ᴋenuveᴋarᴋovlugo tunergumik.

³ Tâpsoma Pêtruselo Johanneselo katimaviksoarmut iteromajuk takogamigik, ᴋenuvigivak tunergumik.

⁴ Pêtrusible Johannesiblo takunarpâk oᴋarlutiglo: Takusartiguk!

⁵ Takusarpak tagva, sumik tunitjivioniarasugailune.

⁶ Pêtrusele oᴋarpok: Silberemik goldemiglônêt peᴋangilanga, pigijamnigle tunitjivigivagit: Jêsusib Kristusib Nazaremiub atingane nikovilutillo pisugit!

⁷ Talerpiagullo tiguvlugo nikovitipâ. Tagvainak niûgik kanâgiglo nukeᴋalerput.

⁸ Kigilaukpok, nangerungnarlarmelo pisugungnarlunelo, katimaviksoarmullo ilagilugik iterpok, arvertarlunelo ᴋigertarlarmelo Gûde nakoridlarpâ.

⁹ Inuillo ilûnatik pisuktok Gûdemiglo nertordlertok takovât.

¹⁰ Ilitarivâttauᴋ, taimnaungmat katimaviksûb itertarviata pinnarnartub kiglingane iksivalauktok, tunergumik ᴋenuvlune; taimailiorviongmat ᴋoaksângalarmiglo tataminiadlarput.

¹¹ Pisujuitôlauktub, mânale pijungnairtub, Pêtruselo Johanneselo najugaringmagik, inuit ilûnatik aᴋpangerdlutik nalipsarpait Salomob iglorosinganik taijamut, tataminiarlarmiglo.

¹² Pêtrusib takogamigit, inuit oᴋautivait: ilipse angutit Isrâelitiajose, soᴋ tamattominga tataminiarᴋisê? Sôlo uvaptingnik tikunârkisê, uvaguk pisuktitsinasugilunuk ôminga, pitsartuniptingnut piniarniptingnullo nangminerijaptingnût?

¹³ Abrahab Isaablo Jâkoblo Gûdingata, atâtagijapta Gûdingata, ᴋitorngane Jêsuse ânanausitilaukpâ, unertujutigilauktase misiarutigilauktaselo Pilatusemut, taipsoma aularᴋojomagalloarmago.

¹⁴ Ilipsele ajungitotuaᴋ idluartotuarlo misiarutigilaukpase, tuksiarluselo inuartok pijomavlugo;

¹⁵ Inôtsible Nâleganga toᴋolaukpase; tâmna Gûdib tupaktilaukpâ toᴋungajunit, uvagut tamattominga kigligiutsijiovogut.

¹⁶ Okpernermullo tâpsoma atinganut, tâpsoma atingata nakoksitilaukpâ una takojase ilitarijaselo; okperamelo tunitjiviovoᴋ ᴋanoengitsiarnermik mattominga, ijipse sângane.

¹⁷ Tagva ᴋatangutikka, ᴋaujimavunga, nalomut taimailiulaurapse, taimaktauk angajoᴋâse.

¹⁸ Gûdible nalautaijut ilûnatik ᴋaningitigut sivorngagut oᴋautigilauktane, tagva Kristusib âniatitaujuksauninga, nalautsimatipâ.

¹⁹ Tagva mâna ᴋaᴋialeritse sâgiarluselo, ajornise pêjartauᴋovlugit.

²⁰ Uvlut nakoksijauviksat naliutilerᴋovlugit Nâlekab kênanganit, tâmna tilijomârpago, sivorngagut oᴋautigijaujok ilipsingnut, Jêsuse Kristuse.

²¹ Tâmna iteriaᴋalaukpok ᴋilangmut, naliunek tikidlugo, tamaita nâmaksititauvingat, Gûdib oᴋautigilauktangita nalautaijut ilûnatik ᴋaningitigut silaksûb pigiarninganit.

²² Môsese oᴋalaungmat atâtagijaptingnut: Nâlekab Gûdipse tunitijivigijomârpâse nalautaijomik ᴋatangutipsingnit uvaptunitomik; tâpsoma oᴋausingit ilipsingnut tusagôaksarivase tamaita.

²³ Imaitsomârporlo, naliat tâpsominga nalautaijomik tusagôngitok pêrtaujomârpok inuᴋatigênit.

²⁴ Nalautaijullo ilûnatik Samuêlemit kingornganelo oᴋâlalauktut ilûnatik, uvlut tamakkoa sivorngagut oᴋautigilaukpait.

²⁵ Nalautaijut angersimanerublo ᴋitorngarivâse, Gûdib pilauktangata atâtagijapsingnut, Abrahamut oᴋalaurame: kinguvâksarnut inuᴋatigêksuit ilûnamatsiatik saimartitaujomârput.

²⁶ Sivorlermik ilipse pivluse Gûdib ᴋitorngane Jêsuse tupaktilaukpâ, tililaukpâlo ilipsingnut, saimartitauᴋovluse, ilûnase atunit sâgiarᴋovluse idluitulinipsingnit.