Apostelit Piniarningit 28 - Labrador Inuttitut Heritage Bible

Paulusib tatamnartitsininganik Maltame, tikininganiglo Rômemut. Oᴋâlaninganiglo Jêsusemik Rômeme.

¹ Piulijauleraptalo tusarpogut, ᴋikertak Maltamik ateᴋarmat.

² Maltamiulle mikingitomik pitsiarpâtigut, tamapta pulârᴋovâtigut, ikomamik ikitsivlutik, silaluksûb tikingmatigut, ᴋeujanarlarmelo.

³ Paulusele akerᴋunik katersigame, ilivlugillo ikomamut, ônarᴋejârnermut ᴋuglugiak sakᴋijârpok nimardlortilunelo agganginut.

⁴ Maltamiulle takogamitsuk ᴋuglugiak aggangine nivingajok, oᴋaᴋatigêkput: Inuk una inuartôngmat nalonangilak, ᴋiglungnerub inôᴋongimago, imaksoarmit piulijaugalloardlune.

⁵ Kuglugiarle ikomamut ᴋepsaliktûtivâ idluitomut pijaunane.

⁶ Utaᴋilerpulle publerniarasugilugo, tagvainarlônêt toᴋoniarasugilugo. Akunille utaᴋivlugo, idluitomulle pijaungimat takogamitsuk, asianik isumaᴋalerput, oᴋarlarmiglo: Gûdeojok una!

⁷ Kikertarmiulle angajoᴋângat, Publiusemik atilik tamattoma erᴋâne nunaᴋuterᴋarpok; tâpsoma ilaliorpâtigut, ilanâᴋarlunelo siniktarᴋovâtigut uvlunik pingasunik.

⁸ Publiusible atâtanga ᴋanimalaukpok ôlingnartomut, aungmiglo anarartok; tâpsomunga Pauluse iterpok, tuksiarlarmelo (Gûdemut), aggangminullo patingmilugo âᴋikpâ.

⁹ Taimailingmago, ôma asingit ᴋanimajut ᴋikertamêtut ᴋaigivuttauk, âᴋiktaulerivullo.

¹⁰ Tâpkoalo angijomik opigivâtigut; aularaptalo taᴋoaksaptingnik tunitjivigivâtigut.

¹¹ Takᴋit pingasut nângmatta, umiaksoarmut Aleksandriamit pijomut aularpogut, ᴋikertame tamâne okkêlauktomut. Nalunaikutalik Kastoremiglo Polluksemiglo.

¹² Sirakusamullo pigapta, tagvane pingasunik uvlivogut.

¹³ Tagvangallo avalakkapta, Regionemut pivogut: ᴋaungmat ᴋavangarnilermat, uvlub aipangane Puteolimut pivogut.

¹⁴ Tagvane ᴋatangutigênik naipitsivogut, tâpkonungalo uvlerᴋojauvogut uvlunik 7 nik; Rômemut tagva aularpogut.

¹⁵ Tagvangallo ᴋatangutigêt tusaumaleramitigut, pagrearpâtigut, Appiferelo Tretaberelo tikidlugik. Paulusib takogamigit, Gûde ᴋujagivâ, ᴋuviasulilarmelo.

¹⁶ Rômemulle pigapta, angajoᴋâb ᴋelaksorsimajut pitipait angajoᴋâviksoarmut; Paulusele ingmigut perᴋojauvok, sorsuktuksamut atautsemut udsertortauᴋovlugo.

¹⁷ Uvlulle pingasôlermatta, Paulusib Jûdit angajoᴋângit ᴋaiᴋovait. Katimangmatta, oᴋautivait: Ilipse angutit ᴋatangutigêt, idluitomik pilaungigalloartunga inuᴋatiptingnut, atâtagijapta ilusinginullônêt; taimaitunga ᴋelaksorsimavlunga Jerusalemit tunijaulaukpunga Rômiut agganginut.

¹⁸ Tâpkoa aularᴋojomalauralloarpânga kiglisiniaraminga, toᴋotaujutiksaᴋangimat uvamne.

¹⁹ Jûdille tamattominga akkerartormatta atanivingmut pijomavlunga oᴋariaᴋalaukpunga: uneᴋsiornerlûteᴋariartornangale pivunga inuᴋatimnik.

²⁰ Tamanna pivlugo tamaunga ᴋaiᴋovapse, takojomavluse oᴋautsomalapselo. Israêlitit nerriungningat pivlugo ᴋelaksorsimagama ᴋelaumgujanut ukkununga.

²¹ Oᴋautivâlle: Aglangniglônêt pingitogut Jûdêamit; tikitoᴋalaungilarlônêt ᴋatangutigênit, idluitomik kigligiutsijomik oᴋauseᴋartomiglônêt pivlutit.

²² Ilingnille tusaromavogut, ᴋanok isumaᴋarmangârpit. Tusaumagapta tamattominga ajoᴋertûtsemik ilûnâne akkerartortaugapse.

²³ Uvlormiglo taingmatsuk, (naliutingmat) unuktut pulârpât siniktarviane; tâpkoninga ajoᴋertuivlune oᴋâlavok Gûdib nâlegauvianik, ajoᴋertorlugillo Jêsusemik, Môsesib perᴋojanginit nalautaijunillo, uvlâmit unnungmut.

²⁴ Ilangille oᴋauserijanginik okpilerput, ilangille okpingilait.

²⁵ Ingmingnulle ilannârênginamik apterput, Pauluse imâk oᴋarmat: Anernek ajunginek oᴋalauralloarpok nalautaijokut Jesaiasekut atâtagijaptingnut,

²⁶ Oᴋarlunelo: Inungnut ukkununga ainiarit oᴋautivlugit: Siutipsingnut tusaromârpase, tikisinagolo; ijipsingnullo takojomârpase ilitarinagolo.

²⁷ Inuit ukua ômatingit mangaidlarmatta, siutimingnullo tusânerludlarput, sikkungilarmiglo; ijimingnut takoᴋonagit, siutimingnullo tusarᴋonagit, ômatimingnullo tukiserᴋonagit, sâgiarᴋonagillo ikajortaujungnarlutik uvamnut.

²⁸ Tagva mâna nalojungnairitse, tamanna Gûdib saimarsautâ tilikliutigijaungmat nalojunut; taipkoa tusagôromârpât.

²⁹ Taimâk oᴋarmat, Jûdit aularput, ingmingnut unuktunik apersûtivlutik.

³⁰ Pauluselo jâringnik maggungnik iglogijamine attartortaminêlaukpok, nangminek akkilerlugo siniktarvik, pulârtinelo tamaita ilaliorpait;

³¹ Gûdib nâlegauvinganik oᴋâlavlune, Nâlekamiglo Jêsusemik ajoᴋertuivok (inungnik) sivôranane inertertaunanelo.