Apostelit Piniarningit 27 - Labrador Inuttitut Heritage Bible

Paulusib umiaktorninganik nangianartomik. Umiangijarᴋattauninganiglo Maltame.

¹ Italiamulle umiaktortuksaunivut kajusimajutaungmat Pauluse asingillo ᴋelaksorsimajut angajoᴋâmut pitipait Juliusemik atelingmut, ataniviksûb sorsuktuksangita ilanganut.

² Adramitemiulle umiaksoanganut ikigapta, allivarpogut Asiab saniagut umiaᴋtoromavluta. Aristarᴋusiblo Tessalônikamit Mazedôniamêtomit pijub ilagivâtigut.

³ Uvlublo aipangane Sîdonemut pivogut. Juliuselo Paulusemik pitsiadlarame, angervigivâ iterninganik illannârijanginut, nerrititauᴋovlugolo.

⁴ Tagvangat allivarapta, Ziprusib saniagut umiaktorpogut, anore aggornarmat.

⁵ Zilîziablo Pamfîliablo imangangne umiaktorluta, Mîramut Lisiamêtomut tikipogut.

⁶ Tagvanelo angajoᴋâk umiaksoarmik naipitsivok, Aleksandriamit pijomik, Italiamut aularniartomik; tâpsomunga ikerᴋovâtigut.

⁷ Sukaitomigle umiaktorapta, uvlunelo unuktune Genidusemut kêta pigapta, anore aggoraptigo, Krêta sanerᴋodlugo torârpogut Salmônemut.

⁸ Tâmnalo serlaᴋ ᴋângerdlugo umiakovigiktomik taijamut tikipogut; iglugasaksuit Lasêamik atilit tâpsoma ᴋanitanganêput.

⁹ Akunêdlalaurapta, umiaktornerlo mâna nangiarnalermat, nerrititailiviglo ᴋângiutilermat, Paulusib kaiblarpait,

¹⁰ Oᴋautivlugillo: Ilipse angutit, umiaktornek tamanna nangiarnarasugilerpara, umiaksoarlo usingillo kisêtaungitut, inôsivulletauk pivlugit.

¹¹ Angajoᴋâble umiaksûb inua angajoᴋângalo okperinersarivak Paulusib oᴋausinginit.

¹² Umiakoviglo idluangimat okkêviginiarlugo, ununersat tagvangat aularᴋojilerput, ôktoromavlutiglo Fenizemut okkêjartoromavlutik; tamadja umiakovik Krêtamêtok uarngnamut atuarningârmullo sangmijok.

¹³ Kavangarnilermalle, nâmaksinasugivut pijomajamingnik, kissatiglo amuvlugit, Krêta senerᴋopât.

¹⁴ Anikitomigle kingorngagut ilajujaᴋsûb tikitâlâjub tikipait, atuarnermik taijaujub.

¹⁵ Umiaksoarlo pijaudlarmat, anoresoarmullo ajulerapta, sâptautituinalerpavut.

¹⁶ Kikertârsuk tikileraptigo, Klaudamik atilik umiarâmik amuarluta sapikasakpogut.

¹⁷ Kaᴋinaptigo, ikajorutiksaliorluta, umiaksoak nimerdlugo atsungerpavut; sioraksoarmut ikkariniarasugilugo, tingergautat kataktidlugit sâvipogut.

¹⁸ Akᴋunaksoarmullo kapiasuktitaudlalerapta, uvlub aipangane (umiaksoak) usingiardlugo ilanginik egiorᴋarpait.

¹⁹ Uvluglo pingajuangne umiaksûb perᴋutingit egiorᴋarpavut aggaptingnut.

²⁰ Uvlunigle unuktunik sakᴋineᴋaranelo uvloriaᴋangimat, akᴋunaᴋsoarlo mikingimat, inôsiptingnik ᴋolalerpogut.

²¹ Nerreᴋammerungnairmattalo, Pauluse akornganit nikovipok oᴋarlunelo: Ilipse angutit, nâlelaurupsinga Krêta ᴋemangnago, nangianartub tikinajalaungilâtigut asiojinatalo.

²² Mânale ᴋaiblarpapse, nangiarase, atauserlônêt toᴋoniangimat, umiaksoak kissime aserulârpok.

²³ Unnuame tamattomane Gûdib perᴋutigijima kivgartortamalo Engelinga sanimne nangilaungmat,

²⁴ Oᴋarlunelo: Pauluse nangiarnak, ataniviksûb sânganut pititaujuksauvotit; ahâglo umiaktorᴋatitit tamaita Gûdib tunilaukpait ilingnut.

²⁵ Taimaimat, ilipse angutit, sivôraniarase; Gûde okperigapko, taimaitsomârmat oᴋautjauniptut.

²⁶ Kikertamulle ikkarituksauvogut.

²⁷ Unnualle 14 ingane ᴋetterartilugo, Adriab imaksoangane umiaktortiluta, umiaktortut nuna tikinasugivât.

²⁸ Nausaikullo ningitinamitsuk, itininga 20 nik isakterpât, sivuvallârsukamiglo ama nausaikut ningitinamitsuk, itininga isakterpât 15 nik.

²⁹ Ilimasuleramik ikkariniarnermingnik, kisaksuit sitamat umiaksûb akᴋoanit ningitipait, ᴋilanârlutiglo uvlub ᴋaulerninganik.

³⁰ Kipalulle umiaksoak ᴋemagasuaramitsuk, umiarâk ningitipâtimânut, oᴋatuinarlutiglo kisaksuit umiaksûb sivuanit ningititsomavlugit.

³¹ Tagva Paulusib angajoᴋâk sorsuktuksallo oᴋautivait: Ukua umiaksoarmêngipatta, inôniatsangilase.

³² Tagva sorsuktuksat umiarâb pitôtangit kiblorpait imânut singisimalertilugo.

³³ Kaulermallo Paulusib nerreᴋolerpait tamaita, oᴋarlunelo: Uvlome uvlut 14 olerput, nerriungnermut nerrimaringinapse nerrimâlaunginapselo.

³⁴ Tamanna pivlugo ᴋaiblarpapse, nerrititse nakokserᴋovluse; nujak atauserlônêt katangniangimat niaᴋupsingnit.

³⁵ Taimaglo oᴋarêrame, ᴋakᴋôjamik tigusivlune Gûde ᴋujagivâ ilûnatik takoane, avgolâllo, nerrilerlunelo.

³⁶ Tagva ilûnatik maksualerput nerrilermilutiglo.

³⁷ Uvagulle tamapta umiaktoᴋatigêktogut 276 olaukpogut.

³⁸ Kâgungnairamiglo umiaksoak oᴋitligiarpât, ᴋakᴋôjaksat imânut egidlugit.

³⁹ Kaungmalle nuna ilitaringilât, kangerdlugle takovât, sidjanga imnaungitok; tagvunga umiaksoak uertsârtitsomalerpât, ajornangipat.

⁴⁰ Kisaksuit amuaramigit, sâviput, akᴋûtiblo ᴋelarutinga ᴋelarûtjâramitsuk, tingergautaᴋ saningajoᴋ amuvât, sidjak torârasuarlugo.

⁴¹ Ikkatok tikipât, avamigut itinilik, tagvunga umiaksoak ikkarippok, sivua tâva aporpok, aulajungnaidlune akᴋoale mallit pitsartuninginut serᴋomitaulerpok.

⁴² Sorsuktuksalle kajusivut ᴋelaksorsimajut toᴋotsomavlugit, tâpkoa naliallônêt puibjorlune ᴋemâᴋonago.

⁴³ Angajoᴋâble Pauluse piulijomagamiuk, kajusimaningat serᴋomipâ, puibjorungnartut sivorliovlutik imânut misiklutik tikinasuarᴋovait nunamut.

⁴⁴ Asingille (piulivlutik) ilangit sâtujanut, ilangillo umiaksûb serᴋomakunginut. Taimailioramik ilûnatik nunamut pivlutik piulijaulerput.