Apostelit Piniarningit 26 - Labrador Inuttitut Heritage Bible

Agrippasemut Paulusib kiglisiniartauninganik akiorninganiglo.

¹ Agrippasele Paulusemut oᴋarpok: Nangminek oᴋatuinariaᴋarpotit. Tagva Paulusib aggane isaklugit, akiorlugit ingminik oᴋâlalerpok.

² Tamanna angijomik ᴋuviagivara atanek Agrippase, uvlome tusâtilutit akiortuksaugama, tamaita Jûdit pasiklerningit uvamnik pivlugit;

³ Taimailuarpunga, Jûdit ilusingit aperᴋutingillo ᴋaujimagangne. Tamanna pivlugo tuksiarvigivagit, ᴋenuêrsârlutit tusarᴋovlutit uvamnik.

⁴ Kiglinganit inôtsima ilusingit inuᴋatima akorngane Jerusaleme Jûdit ilûnatik ᴋaujimagalloarpait;

⁵ Ilitarsilauktut uvamnik kiglinganit, kigliguitsijomagunik. Farisêereolaurama; tâpkoa iluseᴋarpakput pijariaᴋortutitsinerpângojunik ilaptingnit Gûdemik kivgartortunit tamainit.

⁶ Mânalo nangerpunga erᴋartortauvlunga, neriukama Gûdib angernerilauktanginik atâtagijaptingnut;

⁷ Tamakkoa kinguvârêt 12 iojut ilapta nerriugivait katsungaitomik, Gûde kivgartorlugo, uvlôtilugo unnuamelo sorairatik. Neriungnek tamanna pitjutigilugo, nagliktara atanek Agrippase, Jûdinut pasijauvunga.

⁸ Sôᴋ tamanna okperijaksaungitotut-inasugijauvâ ilipsingne, Gûdib toᴋungajut tupaktitsungnarmagît?

⁹ Uvangatauk isumaᴋalaurivunga Jêsusib Nazaremiub attinga angijomik akkerartoraksarilugo.

¹⁰ Taimailiulaukpungalo Jerusaleme, okpertut unuktut parngnanairsimavingmut pitilugit, tamattominga ajoᴋertuijoksoarnut perᴋojaulaurama; toᴋotaksauvlutiglo erᴋartortortaungmatta, ikajulaukpunga.

¹¹ Katimavingnelo ilûnaine kappiasuktiᴋattalaukpakka, mitautigijaunartomiglo oᴋarᴋovlugit aksorôtilauktakka, isumairutijotut pinasuarlugit, takorngartattauk iglugasaksoanginut unangmilaukpakka.

¹² Taimailiorlunga Damaskusemut ingergatilunga, ajoᴋertuijoᴋsoarnut perᴋojauvlunga ajugautitaularmalo;

¹³ Nagliktara atanek, uvlok ᴋeterarmat, apᴋomêtilunga, ᴋaumajok ᴋilangmit pijok takovara, seᴋerngub ᴋaumaninganit ᴋaumaluartok, tamattoma ᴋaumarsarpânga ingergaᴋatikkalo.

¹⁴ Nunamulle ilûnata ochogapta, nipemik uvamnut oᴋartomik tusarpunga, Ebrêeritut oᴋartomik: Saul, Saul, sok unangmivingâ? Kaput tukarlugo ajoksaleromârpotit (akkerartorlunga).

¹⁵ Oᴋarpungale: Nâlegak, kinauvêt? Oᴋarpok: Jêsuseovunga unangmijat; makilutille itigangnut tuttît;

¹⁶ Tamanna pivlugo ilingnut takotipunga, kivgartortortitsomagapkit, oᴋâlakovlutillo takojarnik, takotitsomajamniglo sulle ilingnut.

¹⁷ Saputijomavagillo inungnit, nalojunillo; tâpkonunga mâna tilivagit.

¹⁸ Ijingit uititaulerᴋovlugit, taᴋtomit sâgiarᴋovlugit ᴋaumajomut, Sâtanasiblo pitsartuninganit Gûdemut; ajorninginit isumangnarungnaitomik kingormgutijaksamiglo pititauᴋovlugit, ivjornaititaujut ilagivlugit, okpernermut uvamut uvamnut.

¹⁹ Tâmna pivlugo, atanek Agrippase, takolauktamnik ᴋilangmit pijomik okpingilaungitunga;

²⁰ Oᴋâlavlungale sivorlermik Damaskusemêtunut Jerusalemêtunullo, ilûnainullo nuname Jûdêamêtunut, taimaktauk nalojunut, ᴋakialerᴋovlugit sâgiarᴋovlugillo Gûdemut ᴋaᴋialernerublo piniarᴋojanginik idluartunik piniarᴋovlugit.

²¹ Tamanna pivlugo Jûdit tigudlarpânga katimaviksoarme, toᴋonasuardlungalo.

²² Gûdible piulingmanga, ovanêpunga sule uvlome, kigligiutjivungalo angijullo mikijullo tusâtilugit, assianiglo oᴋâlananga nalautaijullo Môsesiblo pijoᴋaromârtomik oᴋautigilauktanginik kisênik:

²³ Tagva Kristusib âniatitaujariaᴋarninganik, sivorlioninganiglo makitsomârtunit toᴋungajunit, kigligiutjininganiglo ᴋaumajomik inungnut nalojunullo.

²⁴ Taimagle nangminerminik akiormat, Festuse nipperᴋortovlune oᴋarpoᴋ: Pauluse, ilisimadlarpotit: ilisimanivît silaitipâtit.

²⁵ Oᴋarporle: Erdlingnartok Festuse, isumairutingilanga; oᴋarpungale oᴋautsinik okpernartunik silatujuniglo.

²⁶ Atanek (Agrippase) nangminek tamakkoninga ᴋaujimangmat, tâpsomunga sivôrananga oᴋarpunga; nalojônasuginginapko tamakkoninga tamainik; sagvangitome tamakkoa pingimatta.

²⁷ Atanek Agrippase, nalautaijut okperivigît? Kaujimavagit, okperijatit.

²⁸ Agrippasele Paulusemut oᴋarpok: Kajumiktikasakparma Kristusemiôniardlunga.

²⁹ Paulusele oᴋarpok: Taimaimangârpit, taimaingimangârpillônêt, Gûdib sângane tusuvunga, kisiviungitoᴋ ilûnatigle uvlome tusartut uvamnik uvaptun-erᴋovlugit, ᴋelarutikka makoa kisêta pinagit.

³⁰ Taimâk oᴋalaungmat atanek nikovipok, ataneruserlo, Bernizelo iksivaᴋatingillo.

³¹ Iglerterpullo oᴋaᴋatigêklutik: Angut una toᴋotaujutiksamik ᴋelaksortautiksamiglônêt pilaungilak.

³² Agrippasele Festusemut oᴋarpok: Angut una aularᴋojaksaulauktôgalloak, ataniviksoarmut pijomalaungipat.