Apostelit Piniarningit 25 - Labrador Inuttitut Heritage Bible

Atanivingmut pititaujomagame Paulusib oᴋarninganik. Saᴋᴋijârtitauninganik Agrippasemut.

¹ Festusele nunamut tamattomunga (Jûdêamut) tikisimagame, uvlut pingasut kingorngatigut Zesarêamit majorarpok Jerusalemut.

² Tagva ajoᴋertuijoksuit Jûdillo angajoᴋângita tikipât, Pauluse pivlugo tuksiarvigivât.

³ Kenuvigivlugolo tusartaujomavlutik taimna pivlugo, ᴋaiᴋojerᴋovlugo taipsominga Jerusalemut, pinasuarpâllo apᴋome ingergatilugo toᴋotsomavlugo.

⁴ Tagva Fêstuse kiovok, Pauluse udjertortauniarmat Zesarêame, nangminerlo mânakut taunungarniarmigame.

⁵ Ilapse nalît mâna, oᴋarpok, sapingitut, taunungaᴋattaulit, angullo taimna uneᴋsiornerlôtigilitsuk, idluitomik pilaukpat.

⁶ Tâpkonanele uvlunit 10 init ununersanik uvlerᴋârlune, Zesarêamut atersârpok, uvlublo aipangane kiglisiniarviub iksivautanganut ingilerpok, Pauluselo aijauᴋovâ.

⁷ Tâmnale tikingmat, Jûdit Jerusalemit atersâlauktut ilumavât, pasiklerlutiglo unuktunik oᴋumaitoksoarniglo Paulusemut, tangeᴋangigalloartunik.

⁸ Imâgle akiorvigivait: Idluitomik pilaungilanga Jûdit perᴋojanginullônêt, katimaviksoarmullônêt, atanivingmullônêt.

⁹ Festusible nertortaujomavlune Jûdinut, Pauluse kiovâ oᴋarlunelo: Jerusalemut pijomavêt, taikane erᴋartortaujomavlutit uvamnut tamakkoa pivlugît?

¹⁰ Paulusele oᴋarpok: Ataniviksûb kiglisiniarvingata sânganut pijuksauvunga, tagvane kiglisiniartaujariaᴋarpunga; Jûdinut idluitomik pilaunginama, sorlo igvit nangminek ᴋaujimatsiaramga.

¹¹ Idluitulilaurumale, toᴋotaujutiksamiglonêt pilauruma, ᴋunulungilanga toᴋotaulunga; pasiklerutingille uvamnik sulilungipatta, tâpkonunga tunijaujungnangitunga; atanivingmut pijomavunga.

¹² Tagva Festusib kiglisiniartut oᴋaᴋatigilauᴋârdlugit kiovâ: Atanivingmut pijomagavit, atanivingmut piniarpotit.

¹³ Uvlut ilangit nângmatta atanek Agrippase Bernizelo Zesarêamut pivuk, Festuse takorngiordlugo.

¹⁴ Uvluniglo unuktunik tagvanêngmanik, Festusib atanek unipkaupâ Paulusemik, oᴋarlunelo: Angut ovanepok Fêliksib ᴋemaktanga ᴋelaksorsimajok.

¹⁵ Jerusalemêtilunga ajoᴋertuijoksuit Jûdillo angajoᴋângita unersiornerlôtigijartorpât uvamnut, ᴋenuvlutik, erᴋartortauᴋovlugo.

¹⁶ Taipkoa kiovakka: Rômiut iluseᴋangilat, inuk toᴋotaunermut pitilugo, pasijaujok akiorungnarᴋârtinago pasijaunine pivlugo pasijime takoane.

¹⁷ Tamaungale tâpkoa pingmatta, nokᴋalaungilanga, ᴋaungmallo kiglisiniarviub iksivautanganut ingipunga, angullo tâmna aijauᴋolaukpara.

¹⁸ Pasiklertulle ilumagamitsuk, tâpsomunga ilingajomik patsitiksaᴋangilat pijariaᴋarasugijamnik.

¹⁹ Aperᴋuteᴋarpulle tâpsomunga okpernikullungminik, toᴋungajomiglo Jêsusemigôk, Paulusib ômartomik oᴋautigijanganik.

²⁰ Aperᴋutingalle tamanna tukisinginapko, aperivara, Jerusalemut aijomamangât, taikanelo erᴋartortaujomavlune tamattominga.

²¹ Paulusele ataniviksûb oᴋausinga nâlegomagamiuk oᴋarmat, tagvanêᴋovara, atanivingmut pititsomavlugo.

²² Agrippasele Festusemut oᴋarpok: Angut tâmna nangminek tusaromavara. Oᴋarporle: Kaupat tusarniarpat.

²³ Uvluble aipangane Agrippase Bernizelo tikingmanik ânanausavaksoadlarlutik, kiglisiniarvingmut iterput, aulatsijut, angajoᴋaunerojullo iglugasaksoarne ilagivlugit. Festuselo perᴋojingmat, Pauluse aijauvok.

²⁴ Festuselo oᴋarpok: Atanek Agrippase, angutaujoselo ilipse ilûnase, ovane uvaptingnut ilaujose, tagga tâmna takovase, Judit ilûnatik oᴋautigijangat uvamnut, Jerusalemelo mânelo, nipliadlarlutik, inôjungnaituksaujok.

²⁵ Uvangale tukisilerapko, toᴋotaujutiksamik pilaungimat, nangminerlotauk atanivingmut pijomangmat, isumasivunga tilijomavlugo.

²⁶ Atanivingmulle sumik tukilingmik aglagutiksaᴋanginama tâmna pivlugo; ilipsingnut sakᴋertauᴋovara, ilingnulle piluartomik ataneᴋ Agrippase! (tusartauᴋovlugo) Aglagutiksaᴋaromavlunga kiglisiniartauᴋârtilugo.

²⁷ Tamanna idluarasuginginapko ᴋelaksorimajok âtautilugo, paisijauningalo tainago.