Apostelit Piniarningit 24 - Labrador Inuttitut Heritage Bible

Paulusib kiglisiniartauninganik Fêliksemut. Oᴋâlaninganik sângane. Utertitauninganik parngnanairsimavingmut.

¹ Uvlut tallimat kingorngatigut ajoᴋertuinerojok Ananîase, angajoᴋât oᴋaloriktorlo Tertullusemik atilik ilagilugit atersârpok; tâpkoa atanerusiub sângane saᴋᴋijalerput, Pauluse pivlugo.

² Kaiᴋojaungmalle, Tertulluse pasiklilerpok oᴋarlunelo:

³ Nakornerpângojotit Fêlikse! ulapirsauteᴋarapta inôtsiaraptalo atanionerne idluartotuinarnik inuit ukua pitsiarangne, silatujoksôgavit, tamakkoninga tamainik ᴋujagitsainarpaptigit.

⁴ Akunêrtinagle ᴋenuvigivagit, anikitoârsungmik oᴋausiptingnik nâleksâlaurit, saimajoksôgavit.

⁵ Angut una tukisilaukpavut uivêtoksoak, silaksoarme ilûnâne Jûdit tamaita pikablâtilaukpait, Nazaremiut ajoᴋertusikullunginik ajoᴋertuinersat ilangat.

⁶ Katimaviksoarmiktauk ivjornartitsinasualauktok; tâmna tigulaukpavut, erᴋartortauᴋojomavlugolo perᴋojarijaptingnut.

⁷ Angajoᴋâviksûble Lisiasib pitsartunersoarmut aksâriartorpâtigut tâpsominga.

⁸ Pasijingillo ilingnut aiᴋovait; tâpkonangat nangminek, pijomaguvit, kiglisiniarlutit tukisijungnarpotit tamainik, suna pivlugo pasidlarmangâptigo.

⁹ Jûdilletauk oᴋauseᴋarivut, oᴋarlutiglo taimâk ilingangmat.

¹⁰ Paulusele, atanerusiub ijingmingmago oᴋarᴋovlugo, kiolerpok: Kaujimagapkit, jârinik unuktunik erᴋartuijôgavit inungnut ukkununga, sivôrananga akiorvigijomavakka.

¹¹ Nalojungnaititaujungnaravit, uvlut ununersaungimatta 12 nit, taimangat, takpaunga Jerusalemut tikisimagama, tuksiariartorlunga.

¹² Katimaviksoarmelônêt tâpkoa naipilaungilânga oᴋartilunga inungmut atautsemullônêt, inungniglônêt pikablârtitsitilunga, katimavingne iglugasaksoarnelônêt.

¹³ Kigligiutsijungnangilattauk sâmne mâna pasiklerutimingnik uvamnik.

¹⁴ Angigutijomangilagille, ajoᴋertûsek imna, ajoᴋertûsekullungmik taijangat, atorlugo, atâtagilauktama Gûdingat imâk nâlekapko, tamaita perᴋojane nalautaijunelo aglaksimajut okperivlugit;

¹⁵ Gûdelo okperivlugo nerriungneᴋarpunga tâpkoa nangminek nerriugijanganik, pijomârtome makiviksaᴋaromârmat tokungajunut, idluartunullo idluangitunullo.

¹⁶ Tamattomanele idluartomik isumaᴋarasuarpunga ilûnâne Gûdemullo inungnullo.

¹⁷ (Mânale), jârit atauseungitut nângmatta, inuᴋatima tujûsianginik tunergutiniglo (Gûdemut) âtsilunga tikigama;

¹⁸ Tagva taipkoa naipipânga sujungailijautilunga katimaviksoarme, perajaluktoᴋartinago pikablâjoᴋartinagolo.

¹⁹ Taipkoale Jûdiojut ilangit Asiamit pijut mânêtuksaugalloarivut sângne, kigligiutjilutik, pasitiksaᴋarunik uvamnut.

²⁰ Ukualônêt nangminek oᴋarlit, sumik idluangitimok malungnarmangârma, kiglisiniartut sângane nangertilunga;

²¹ Oᴋausek una kissiat pingikunitsuk, oᴋalaurama akorngane nangerdlunga: Toᴋungajut makitsomârningit pivlugit erᴋartortauvunga ilipsingnut uvlome.

²² Fêliksib tamanna tusaramiuk, taimaituinarᴋovâ mâna, ajoᴋertûsek ᴋaujimatsiaramiuk, oᴋarporlo: Angajoᴋâviksoak Lisias tamaungarpat, pasiklernise aperᴋutigijomavara.

²³ Angajoᴋârle oᴋautivâ, Paulusemik udjertorᴋovlugo, ᴋelaksornagole, ilangitalo nalîllônêt inerternagit, pulâromanajarpatsuk, kivgartoromavlugolônêt.

²⁴ Uvlulle ilangit nângmatta Fêlikse tikilerpok nuliane Drusilla Jûdiojoᴋ ilagilugo, Pauluselo ᴋaiᴋolerpâ, tusalâllo, oᴋâlatilugo okpernermik Kristusemut.

²⁵ Paulusele oᴋâlangmat idluarnermiglo, ikliguktailinermiglo, erᴋartuijoᴋaromârtomiglo, Fêlikse ᴋoaᴋsârpok oᴋarlunelo: Mânna aularit; ulapingikuma ᴋaiᴋojomagivagit.

²⁶ Nerriukporletauk Paulusemut kênaujanik tunitjivioniarasugilune, aularᴋoguniuk; tamanna pivlugo ᴋaiᴋoᴋattarpâ, oᴋauseᴋarvigivlugo.

²⁷ Jârigle magguk nângmanik, Portiusib Festusib Fêlikse simerpâ. Fêliksible, nertortaujomagame Jûdinut, Pauluse ᴋelaksorimatilugo ᴋemakpâ.