Apostelit Piniarningit 23 - Labrador Inuttitut Heritage Bible

Paulusib kiglisiniartauninganik Judit aulatsijoᴋotinginut. Tilikliutigijauninganiglo Zesarêamut.

¹ Paulusible kiglisiniartut takonârpait oᴋarlunelo: Ilipse angutit ᴋatangutigêt, idluartomik isumaᴋarlunga Gûdib sângane arvertalaukpunga, uvlok tamanna tikidlugo.

² Ajoᴋertuinerojuble Ananîasib ᴋaneroktauᴋovâ sanianêtunut.

³ Tagva Paulusib oᴋautivâ: Gûdib annaulidlaromârpâtit, ᴋarmaujotit mingoarsimajok: perᴋojat maliklugit iksivavlutit erᴋartorpingâ? perᴋojallo nâlangnagit ᴋaneroᴋtauᴋovingâ?

⁴ Nangertulle saniane oᴋarput: Gûdib ajoᴋertuinerojunga suadlarpiûk?

⁵ Pauluselo oᴋarpok: Nagliktakka ᴋatangutiget, ᴋaujimalaungilara ajoᴋertuinerongmangât. Aglaksimangmat: Inuᴋotivit angajoᴋauneroninganut oᴋauserluktuksaungilatit.

⁶ Paulusible ᴋaujimagamigit, ilangit Saduzêeriongmatta, ilangillo Farisêeriongmatta, niplialerpok kiglisiniartut akorngane. Ilipse angutit ᴋatangutigêt, Farisêeriovunga, Farisêeriblo ernerivanga; erᴋartortauvunga nerriukama toᴋungajut makitsomârninginik.

⁷ Taimagle oᴋarmat, Farisêerillo Saduzêerillo akerartulerput, inugiartoksuillo maggoilivut.

⁸ Saduzêerit makiviksaᴋangitomik, engeleᴋangitomiglo anerneᴋangitomiglo oᴋarmatta; Farisêerille tamangnik kigligiutjivut.

⁹ Nipliajoksôlerput tagva; aglangniglo ilisimajut Farisêerekunit nikovidlutik akerartulerpait, oᴋarlutiglo: Inungme tâpsomane idluitomik nagvângilagut, anernerille engelillônêt ilangata oᴋarviginerpago, akerartorungnangilagut Gûdemut.

¹⁰ Angijomik pikablâdlalermatta, angajoᴋâviksoak sivorâlerpok, Pauluse aliktortauniarasugilugo tâpkonunga, sorsuktuksallo atersârᴋovait, aᴋsârnigauᴋolâllo tâpkonangat, pitilugolo sorsuktuksat igloᴋarvinganut.

¹¹ Uvluble aipangane unnuame Nâlegak Paulusib saniane nangerpok, oᴋarlunelo: Pauluse manigorit; sorlo Jerusaleme kigligiutsilauravit uvamnik, taimaktuak kigligiutsijariaᴋarivotit Rômeme.

¹² Kaulermalle Jûdit ilangit katilerput, angeᴋatigêlerlutiglo nerrijomanginermik imeromanginermiglo Paulusemik toᴋotsilauᴋâratik.

¹³ Taipkoale taimaitomik angerᴋatigêktut ununersaulaukput 40 nit.

¹⁴ Tâpkoa ajoᴋertuijoksoarnut angajoᴋânullo oᴋariartorput: Soᴋoserungnangitomik angeᴋatigêlaukpogut êsijomanata sumiglônêt Paulusemik toᴋotserᴋârtinata.

¹⁵ Mânna tagga kiglisiniartut ilagilugit angajoᴋâviksoarmut oᴋaritse, ᴋaupat taimna âtautitserᴋovlugo (Paulusemik) ilipsingnut, sorlo piluartomik kiglisiniaromavlugo, uvagulle opalungairsimavogut toᴋotsomavlugo tikerᴋârtinago ilipsingnut.

¹⁶ Paulusible ujorungata kajusimaneᴋ tamanna tusaramiuk, parngnailerpok, ailunelo sorsuktuksat igloᴋarvinganut oᴋautigivâlo Paulusemut.

¹⁷ Paulusible angajoᴋât ilangat ᴋaiᴋovâ oᴋautilâllo: Inôsuktoᴋ una pititsuk angajoᴋâviksoarmut, oᴋausiksaᴋarmat tâpsomunga.

¹⁸ Tâpsoma tagva naksarpâ pitilâllo angajoᴋâviksoarmut oᴋarlunelo: Paulusib ᴋelaksorsimajub ᴋaiᴋovânga, ᴋenuvigivlungalo, inôsuktoᴋ una ilingnut pitilugo, oᴋausiksaᴋarmat ilingnut.

¹⁹ Angajoᴋâviksûb tagva aggangitigut tiguvâ, iglerterupâlo, aperivâlo: Sumik oᴋautsomavingâ?

²⁰ Oᴋarporle: Jûdit kajusimavut tuksiarvigijomavlutit, ᴋaupat Paulusemik âtauᴋojerᴋovlutit kiglisiniartut sânganut, sorlo piluartomik kiglisiniaromavlugo.

²¹ Igville nâlangniarnagit, taipkoa akorngane anguteᴋarmat ununersanik 40 nit, tâpsominga pinasuartunik, taipkoa angeᴋatigêlaukput nerrijomanginermik imeromanginermiglo, Paulusemik toᴋotsilauᴋâratik, mânalo opalungairsimavut, utaᴋivlutiglo angerniarnernik.

²² Tagva angajoᴋâviksûb inôsuktok aularᴋolerpâ, perᴋolâllo, inungmut atautsemullônêt oᴋarᴋonago, tamattominga nalojungaitinamiuk.

²³ Angajoᴋângniglo maggungnik ᴋaiᴋojivok, oᴋautivlugiglo: Sorsuktuksanik 200 inik opalungaijaitikik, stundeme 3 me unnuame, Zesarêamut aijuksanik, horsitalingniglo 70 nik, pitiksilingniglo 200 inik;

²⁴ Nergjutsoarmiktauk Paulusib atoraksanganik âdlugolo saputijaulerlune Fêliksemut atanerusermut.

²⁵ Aglakkivok taipsomunga imâk:

²⁶ Klaudiusib Lîsiasib ᴋuviasuᴋovâ atanerusek nakornerpângojok Fêlikse!

²⁷ Angut una Jûdit tigulaukpât, taipkonungalo toᴋotaukasalaukpok, uvangale sorsuktuksat ilagivlugit aᴋsâriartorpakka tâpsominga, Rômiôjok tukisilerapko.

²⁸ Patsitiksanginik tussaromagama, kiglisiniarvinganut âlauᴋpara.

²⁹ Sunaubva tukkisivunga, perᴋojanginik apersûtit pivlugit pasijaungmat; patsitiksaᴋangilarle ômunga toᴋotaujutiksamik ᴋelaksortautiksamiglônêt.

³⁰ Tusaumaleramalo, Jûdit ilangita angigutjivlutik pinasuarmatsuk tokotsomavlugo, katsungailunga ilingnut tilikliutivara, pasiklertuttauk oᴋarᴋolaukpakka sângne, sumik patsitiksaᴋarmangâta tâpsomunga. Inôtsiarpagit!

³¹ Sorsuktuksat tagva, sorlo perᴋojaungamik, Pauluse tiguvât, aularutivâllo Antipâtrisemut unnuame.

³² Kaungmalle aiᴋolerpait horsitalit sorsuktuksat, (nangminerle) uterput sorsuktuksat igloᴋarvinganut.

³³ Taipkoale Zesarêamut pigamik, aglait tunivait atanerusermut, Pauluselotauk sakᴋertipât tâpsomunga.

³⁴ Atanerusiub aglait atuaramigit, apersorpok, nunat nalianit pingmangât? Tusaramelo, Zilîziamit pingmat, oᴋarpok:

³⁵ Kiglisiniaromavagit, pasiklertut ilingnik tamaunga pingmikpatta. Itertitauᴋovâlo Herôdesib igloksoanganut kiglisiniarviojomut.