Apostelit Piniarningit 22 - Labrador Inuttitut Heritage Bible

Paulusib akiorninganik.

¹ Ilipse angutit ᴋatangutigêt, angajoᴋâllo, akiornikka ilipsingnut tusâsigik.

² Ebrêeritut oᴋarvigingmagit, tusaramitsuk, nipangiluarput. Oᴋarporlo:

³ Jûdiovunga, Tarsuseme inûlertunga Zilîziamêtome, tamânele, iglugasaksoarne tamakkonane, inugoijaulaukpunga Gamaliêlib itigangita sângane, ajoᴋertortautsiarlunga sivorlipta perᴋojanginik, Gûdemiglo kivgartorasugilunga, sorlo ilipse ilûnase uvlome;

⁴ Okpertullo taimâk unangmilaukpakka, toᴋomut pititsomavlugit. Kelaksulauᴋpakka, pitilaitalo parngnanairsimavingmut, angutillo arnallo.

⁵ Sorlo ajoᴋertuinerojubtauk angajoᴋâllo ilûnatik kigligiutingmanga; tâpkonangat aglangnik pilaukpunga, Damaskusemullo aivlunga tâvanêtut, ᴋelaksorᴋârdlugit âtsomagapkit Jerusalemut pidlartauᴋovlugit.

⁶ Ingergatilungale, Damaskuse ᴋaglilerlugo, uvlub ᴋeterarningane, ᴋaumajoᴋsûb ᴋilangmit tagvainak ᴋaumarsarpânga,

⁷ Nunamullo ochovunga, nippemiglo tusarpunga, oᴋartomik uvamnut: Saul, Saul, sôᴋ unangmivingâ?

⁸ Kiovarale: Nâlegak kinauvêt? Oᴋautivângalo: Jêsuseovunga Nazaremiok, unangmijat.

⁹ Ingergaᴋatimale ᴋaumajok takogalloarpât erᴋsivlutiglo; uvamnulle oᴋartub oᴋausingit tussangilait.

¹⁰ Oᴋarpungale: Nâlegak sumik piniartuksauvîk? Nâlekab oᴋautivânga: Makilerit, ainiarlutillo Damaskusemut; tagvane oᴋautjaulârpotit tamainik piniaraksarnik.

¹¹ Kaumajuble tâpsoma ᴋaumajoksôninganut tautugungnanginama, ingergaᴋatima agganginut tassiortaulerpunga Damaskusemullo pivlunga.

¹² Tagvanele anguteᴋalaukpok Gûdemik opigosuktomik perᴋojaniglo nâletsiarlune, Ananîasemik atilingmik, Jûdit ilûnatik tagvanêtut piloriktoᴋotigijanganik.

¹³ Tâpsoma pulârpânga nangerdlunelo sanimne, oᴋautilungalo: Saul, ᴋatangutiga, tautulerit. Tagvainarlo takovara.

¹⁴ Oᴋarporle: Atâtagijapta Gûdingata anerivâtit pijomajanganik ᴋaujititauᴋovlutit idluartotuamiglo takoᴋovlutit, nipemiglo tusarᴋovlutit, ᴋaninganit.

¹⁵ Kigligiutsijoᴋotiginiarmatit inungnut ilûnainut takojarniglo tusartarniglo.

¹⁶ Mânalo sôᴋ tuavingikêt? nikovilerit baptitaulerlutillo, ajornernillo ubvartaulerit, Nâlekablo atinga tuksiarvigileruk.

¹⁷ Jerusalemullo uterama, tuksiartilungalo katimaviksoarme, uvamnik ikpigijungnailaukpunga, (Jêsuselo) takolaukpara.

¹⁸ Tagva oᴋautivânga: Tuavitit, aularsârlutillo Jerusalemit, kigligiutsinitit uvamnik okperiniangimagit.

¹⁹ Oᴋarpungalo: Nâlegak, nangminek ᴋaujimavânga, parngnanairsimavingmut pitilaurapkit unatadlalaitalo okpertut ilingnut, katimavingne tamaine;

²⁰ Kigligiutsijoᴋotivîllo Stefanusib aunga kovijaungmat, nangilaukpungatauk saniane, toᴋotauningalo idluaringmilugo, toᴋotsijullo annorângit udsertulauᴋpakka.

²¹ Oᴋautivângalo: Ailerit, tilijomagapkit ungasiktomut nalojunut.

²² Oᴋauserle tamanna tikidlugo nâlekpât, nipliadlalerpullo oᴋarlutiglo: Inuk taimaitoᴋ pêrtaule nunamit; idlualungilak inôninga ôma.

²³ Niplialermattale anorâtiglo pêdlarlugit, sanîllo ᴋongmut egingmagit,

²⁴ Angajoᴋâviksûb âtauᴋolerpâ sorsuktuksat igloᴋarvinganut, issakajauᴋolugolo kiglisiniartauᴋovâ, tukisijomagame, suna pivlugo taimâk nipliujormangâtsuk.

²⁵ Kelaksormatsugle aklunânut, Paulusib angajoᴋâk saniminêtok oᴋautivâ: Ilipsingne idluaralloarkâ, inuk Rômioᴋ kiglisiniartauᴋârtinago isaᴋadlarlugô?

²⁶ Angajoᴋâb tamanna tusaramiuk, angajoᴋâviksoarmut oᴋariartorpok oᴋarlunelo: Udjertulerit piniartarnik, inuk una Rômiôngmat.

²⁷ Tagva angajoᴋâviksûb tikipâ, oᴋautivlugolo: Oᴋautinga, Rômiôvêt? Oᴋarporle: Ahaila.

²⁸ Angajoᴋâviksoarlo kiovok: Kênaujavaksoarnik akkilêrᴋolunga illagilerpânga (Rômiut). Paulusele oᴋarpok: Uvangale inûlernimnit Rômiovunga.

²⁹ Tuavilutik tâva kiglisiniartuksangita allarlugo ᴋemakpât. Angajoᴋâviksoarlo tusarame Rômiôngmat, sivôralerpok, ᴋelaksortauᴋolauramiuk.

³⁰ Uvlub aipangane tusaromamarilerame, sôᴋ pasijaungmangât Jûdinut, ᴋelarutjartauᴋovâ, ajoᴋertuijoksuillo kiglisiniartuksallo ilûnaita ᴋaiᴋolerpait, Pauluselo sakᴋertipâ, pitilugolo tâpkoa akornganut.