Apostelit Piniarningit 21 - Labrador Inuttitut Heritage Bible

Paulusib ingerganinganik Milêtusemit Jerusalemut, pititauninganiglo parngnanairsimavingmut.

¹ Taipkoa ᴋemaklugit umiaktorapta, oᴋᴋomikpogut Kôse tikilugo, uvlublo aipangane Rôdusemut pivogut, tagvangallo Pataramut.

² Tagvanelo umiaksoarmik naipitsigapta Fenîziamut ikâromajomik, tagvunga ikivogut aularlutalo.

³ Zipruse allakaraptigo, saumikliutivlugo Sîriamut umiaktorpogut, Tîrusemullo pivluta; umiaksoak tagvane usingijartuksaungmat.

⁴ Tagvanelo ilinniartut naipinaptigik, uvlilaukpogut tagva uvlunik 7 nik; tâpkoa Pauluse oᴋautivât, Anernerub ajunginerub ᴋaujitilaungmagit, Jerusalemut majorarᴋonago.

⁵ Uvlullo tâpkoa nângmatta, aularpogut ingergavluta ilûnatiglo ᴋanilârpâtigut, nuliatiglo ᴋitorngatiglo ilagilugit iglugasaksuit silatânut; sêrᴋortorpogullo imab kiglingane tuksiarlutalo.

⁶ Sorairutiksamiglo oᴋarêrapta, umiaksoarmut ikivogut, tâpkoale angergarivut iglomingnut.

⁷ Uvagulle umiaktornivut nâniardlugo Tîrusemit Putolemaisemut pivogut, ᴋatangutigêllo salutipavut, uvlormiglo atautsemik uvlivogut tâpkonane.

⁸ Uvlub aipangane aularpogut, Paulusemêtogut, Zesarêamullo pivogut, Filippusiblo Evangelistib (imaipok: oᴋautsinik tusarnertunik oᴋâlajib), 7 it ipkua ilangata iglunganut iterpogut, tâpsomanêlerdlutalo.

⁹ Tâmna paneᴋarpok sitamanik, uigasungnik, nalautsitiksanik tâpkoa oᴋarput.

¹⁰ Tagvanelo uvlilaurapta unuktunik, nalautaijok atersârpok Jûdêamit, Agabusemik atilik.

¹¹ Tikinamitigullo Paulusib tapserutâ, tiguvâ agganelo itiganelo ᴋelaksorlugit oᴋarpok: Anernek ajunginek tamattominga oᴋarpok: Jûdit mattoma tapserutib inua taimak ᴋelaksoromârpât Jerusaleme pitiniarlugolo nalojut agganginut.

¹² Tamannale tusaraptigo, inertilerpavut, tagvanêtullo, majorarᴋonago.

¹³ Paulusele kiovok: Kanok iliorᴋisê, ᴋugviudlarapse, ômatiga sêklugô? pijarêrsimagama ᴋelaksortauniarlunga kissianeungitok, toᴋotaulungale Jerusaleme Nâlekab Jêsusib atinga pivlugo.

¹⁴ Inertertaujomangimalle, sorairpogut oᴋarlutalo: Nâlekab pijomajanga pile!

¹⁵ Uvlut tâpkoa kingorngatigut opalungaijarêrapta, Jerusalemut majorarpogut.

¹⁶ Ilinniartuttauk ilangita ilagivâtigut Zesarêamit, âpâtigullo Minâsonemik atilingmut, Ziprusemiôjomut; ilinniartoᴋ tâmna itôlaukpoᴋ; siniktarᴋojauvogullo tâpsomane.

¹⁷ Jerusalemut pigapta, ᴋatangutigêt ilaliorpâtigut ᴋuviasuklutik.

¹⁸ Uvluble aipangane Jakôbusemut pulâriartorpogut Pauluse ilagilugo; angajoᴋâllo ilûnatik tagvunga pigivut.

¹⁹ Salutijarêlauramigillo, tâpsoma unipkautigilerpait maliktigêktidlugit, ᴋanok Gûde pinialaungmat nalojune tâpsoma kivgartorninganut.

²⁰ Tamattominga tusaramik, Nâlegak nakorivât, oᴋautivâllo: Katangut, tautukpotit Jûdinik tausendioᴋattartunik okpilertunik, ilûnatiglo ilungertorlutik perᴋojat maliktauᴋovait.

²¹ Tusaumavâtille, Jûdit ilûnaita nalojut akornganêtut ajoᴋertorangne, Môsesib perᴋojanginik nâleᴋonagit, oᴋalauravillo ᴋitorngangit kipijauᴋonagit, ilusillo taipkoa atornagit.

²² Kanok tagva mâna ilingajariaᴋarkâ? katimajariaᴋarput ila ipkoa unugiartoᴋsuit; tikisimanernik tusarniaramik.

²³ Tamanna pivlugo oᴋausivut ilingnut malilaukit.

²⁴ Anguteᴋarpok sitamanik ovane, tâpkoa maligaksaᴋarput angernerilauktamingnik. Tâpkoa ilingnut pikit, ilagilugillo sujungaititaulerit, akkilêrlutillo niaᴋungita nujangit salijauᴋovlugit, ilûnatiglo tukisilerᴋovlugit saglojutaunernik, igvilletauk nangminek perᴋojat malikangne.

²⁵ Okpertut nalojunit pijut aglagvigilauraptigik, kajusimavogullo atoriaᴋangininginik tamakkoninga; tunergutinigle gudeungitunut kisênik, aungmiglo ipimajomiglo nerrerᴋonagit, arnaniarᴋonagillo anguniarᴋonagillônêt.

²⁶ Tagva Paulusib angutit tâpkoa ingminut pivait, ᴋaungmallo sujungailijauᴋatigivait; katimaviksoarmullo iteᴋattarpok, uvlut sujungaivît nâniardlugit takojaujomavlune; tunergutiksatik ingmigolingatilugit tunijaulerᴋârtinagit.

²⁷ Uvlulle 7 it nâkasalermatta, Jûdit Asiamit pijut takovât katimaviksoarme, inuillo ilûnatik perajaluktidlalerpait (Pauluse) tiguvlugo, nipliadlarlutiglo:

²⁸ Ilipse angutit Israêlitiojose ikajortigut! tagva inuk ilûnâne ajoᴋertuijok kigliluktomik inuᴋatiptingnik perᴋojaniglo katimaviksoarmiglo ôminga; Grîkittauk itertinivait katimaviksoarmut, iglolo tâmna ivsornaitok ivsornartilaukpâ.

²⁹ Trôfimuse Efêsusemiok sivorngagut takolauramitsuk illagijanga iglugasaksoarne; taimna Paulusemut aipaunasugivât katimaviksoarmut.

³⁰ Iglugasaksoarmiullo ilûnatik aulajâdlaraulerput, inuillo tagvunga aᴋpangerdlutik katilerput; Paulusele tiguvât tassigoalâllo katimaviksoarmit; tagvainarlo upkuangit palangairtaulerput.

³¹ Toᴋoniaromangmatsugle, sorsuktuksat angajoᴋâviksoangata tusaumalerpait, Jerusalemiut ilûnatik pikablâlermatta.

³² Tagvainarlo sorsuktuksat, angajoᴋâllo hundertinut ilagilugit akpangervigivait. Angajoᴋâviksoarmigle sorsuktuksaniglo takogamik, Pauluse annaulidlarungnairpât.

³³ Angajoᴋaviksûb tikinamiuk, tiguvâ ᴋelaumgujanullo magguinut ᴋelaksortauᴋolerpâ, apersularmelo, kinaungmangât, sumiglo pilaungmangât.

³⁴ Inuille akorngane nipliadartoᴋalerpok ilanginik imâk, asinginik imak; nâmaktomigle tukisijungnanginamigit nippersoarnut, sorsuktuksat igloᴋarvinganut âtauᴋovâ.

³⁵ Majorarvingmullo pingmat, sorsuktuksat akkigariaᴋalerpât, inuit sorsugomangmatsuk.

³⁶ Inugasaksuit malikamitsuk; nipliadlarlutiglo: Pêrtaule!

³⁷ Pauluse sorsuktuksat igloᴋarvinganut âtaugame, angajoᴋâviksoarmut oᴋarpok: Oᴋarᴋojomangilarma ilingnût? Tâpsomale oᴋautivâ: Grîkit oᴋausingit atorungnarpigît?

³⁸ Egiptenemiôngilatît imna, uvlut tamakkoa sivorngatigut pikablâtitsilauᴋtoᴋ inuartut 4,000 inuᴋajuitomut aulartilugît?

³⁹ Paulusele oᴋarpok: Jûdiovunga Tarsusemiok, Zilîziame iglugasaksuit ᴋaujijaumariktut inuᴋatigivânga; ᴋenuvigivagit oᴋarlanga inungnut.

⁴⁰ Perᴋungmago, Pauluse nangerdlune majorarvingme, inuit aggangminut nulorarpait. Nipangermattalo, oᴋautivait Ebrêeritut oᴋarlunelo: