Apostelit Piniarningit 20 - Labrador Inuttitut Heritage Bible

Paulusib piniarninginik Mazedôniame Asiamelo. Oᴋausinginik kingorlerpânik ilagêt Efêsusemiut angajoᴋânginut.

¹ Perajaludlarungnairmatta, Paulusib iliniartut ᴋaiᴋolerpait, sorairutiksamik oᴋautivlugit, tagvangallo aularpok, Mazedôniamut aijomavlune.

² Nunallo taipkoa arvertarvigigamigit, kaiblarᴋâlauramigillo oᴋautsinut unuktunut, Grîkit nunanganut pivok, tagvanêlerdlunelo takᴋinik pingasunik.

³ Jûdille unangmingmatsuk, Sîriamut umiaktoromatilugo, isumaksarsiorᴋârdlune kajusilerpoᴋ uterniarnerminik Mazedôniakut.

⁴ Asia tikilugole ilaulaukput tâpsomunga Sopater Berêamiok; Tessalônikamiugle Aristarᴋuse Sekunduselo; Gâjuselo Derbemiok, Timôteuselo; Asiamiugle Tikukuse Trofimuselo.

⁵ Tâpkoa sivorlerivavut, utaᴋivâtigullo Trôaseme.

⁶ Uvagulle umiaktorpogut Filippimit pudjusauteᴋangtunik ᴋaᴋᴋôjaktorviub uvlungita kingorngatigut, uvlullo tallimangane tikipavut Trôaseme, tagvanelo piniarveᴋarpogut uvlunik 7 nik.

⁷ Vogible uvlungita sivorlerpângane ilinniartut katimalermatta ᴋaᴋᴋôjaᴋ avgorlugo, Paulusib oᴋâlavigivait, aᴋagotsomagame; sorairane oᴋâlavoᴋ unnuab ᴋeterarninga tikidlugo.

⁸ Iglullo ᴋolerpângane, katimavigilauᴋtangane, nannergoaᴋalaukpok unuktunik.

⁹ Inôsuktorlo Eutiᴋusemik atilik, igalâb sângane iksivajoᴋ, akpaivlune sinilartok, Pauluse akunit, oᴋâlatilugo, siningnermut ochogame, ijukkarpok iglut ᴋolerêngita pingajuanit, toᴋungatilugolo kiviktauvok.

¹⁰ Paulusele atersârpok, ᴋolangerdlugolo, erᴋilâllo oᴋarlune: Uimajârase; tarninga iluanêngmat.

¹¹ Ama majorarlune ᴋakᴋôjak avgorpâ nerrilarmelo, oᴋâlavigivaillo ama akunit uvlub ᴋaulerninga tikidlugo. Taimaiᴋardlune aularpok.

¹² Inôsuktorlo ômardlune ᴋaipât, mikijôngitomiglo manigortaulerdlutik.

¹³ Uvagulle umiaksoakut sivorliovogut Assusemut aularluta, tagvangat Pauluse ikimaᴋatikumavlugo; taimâk perᴋojilaungmat, nunakut pisugomagame nangminek.

¹⁴ Assuseme tikinamitigut ikovigivâtigut, Mitilênemullo pivogut.

¹⁵ Tagvangallo umiaktorpogut, ᴋaungmallo Kiosib akianut pivogut; ᴋaungmingmallo Sâmosemut tikipogut, Trogilliumelo nokᴋarpogut, uvlublo aipangane Milêtusemut pivogut.

¹⁶ Pauluse isumasimagame Efêsuse ᴋângeromavlugo, Asiame akunit itsomanane; tuavidlune Penteᴋostib uvlungane Jerusalemêtsomagame, ajornangipat.

¹⁷ Milêtusemit tiliklerpok Efêsusemut ᴋaiᴋovlugit ilagêktut angajoᴋângit.

¹⁸ Tikinamitsuglo oᴋautivait: Kaujimavapsinga, ᴋanok iliormangârma naliutome ilûnâne, najulaurapse, uvlormit taimangat, Asiamut tikitainarama;

¹⁹ Nâlegarlo kivgartulaukpara angijomik nalopᴋotijunga, ᴋugviorlarmalo unuktunik, kapiasuktitaularmalo Jûdinut, unangmiklertunut uvamnik;

²⁰ (Kaujimavapsingalo) angigutilaunginapse idluartomik sumiglônêt oᴋâlatigijaksamnik ajoᴋertûtigijaksamniglo ilipsingnut katimatiluse iglupsingnelo.

²¹ Jûdillo Grîkillo oᴋautilaukpakka, sâgiarᴋovlugit Gûdemut, okperᴋovlugillo Nâlegaptingnut Jêsuse Kristusemut.

²² Mânalo ahâk, anernerme ᴋelaksorsimajunga Jerusalemut aivunga, nalolarmalo, sumut taikane tikitaulârmangârma;

²³ Tamattominga kisianik Anernek ajunginek iglugasaksoarne tamaine kigligiutsingmat oᴋarlune: Kelarutillo kappianarnerillo utakᴋingmanga taikane.

²⁴ Tamakkoale tamaita sivôragingilakka, inôseralo nangminek ivleringilara, ᴋuviasuklunga nunamênera nâniaromavlugo, kivgartorneralo Nâlekamut Jêsusemut perᴋojaumanera, oᴋautigivlugo Gûdib saimarsautâ oᴋautsinut tusarnertunut.

²⁵ Mânalo ahak, nalungilanga, kênara takoniarungnairapsiuk, ilûnase arvertarvigilauktakka oᴋâlavigijakkalo Gûdib nâlegauvianik.

²⁶ Tamanna pivlugo uvlome kigligiksarvigivapse, pasitiksaᴋanginama ilûnapse ause pitjutigilugo,

²⁷ Angigutilaunginapse, oᴋâlavlungale Gûdib perᴋojanginik tamainik.

²⁸ Tagva mâna udsertoritse ilipsingnik ilagêktuniglo ilûnainik, Anernerub ajunginerub ajoᴋertuijungortilaungmase tâpkoninga, Gûdib ilagêktitangit pairilugit aungminut pisiarilauktangit.

²⁹ Tamanna nalunginapko, amargut kêsuktoᴋsuit kingunamne akunapsingnut pijomârmatta, ilagêllo kênginiangilait.

³⁰ Ilipsingnittauk angutit sakᴋeromârput, ajoᴋertosiâlungnik oᴋartut, ilinniartut kajumiksarniardlugit nangminermingnut.

³¹ Tamanna pivlugo pivâritse erᴋailuselo, sorairnanga ilûnase kaibladlalaurapse jârine pingasune uvlôtilugolo unnuamelo, ᴋugviorlunga.

³² Mânalo ᴋatangutikka, Gûdemut saputijauᴋovapse, oᴋautsemullo saimarsautânik, pitsartuneᴋartomut aglisiktitsungnarluse, tunitjivigivluselo kingormgutijaksapsingnik, ivsornaititaujomârtut ilagivlugit.

³³ Silberemik goldemiglônêt pigijapsingnik annorâpsingniglônêt ᴋenulaungilanga.

³⁴ Kaujimavapsingale, aggamnut tâpkonunga pinialaurama atoriaᴋalauktamnik ilamalo piksanginik.

³⁵ Nangminek ᴋaujitilaukpapse tamainik, taimâk sanajuksaugapta, sangêtut ikajorlugit, Nâlekablo Jêsusib oᴋausingit erᴋarlugit, oᴋarmat: Tunijinek piloringnarnersauvok pilitaunermit.

³⁶ Taimaglo oᴋarêrame sêrᴋortulerpok tuksiaᴋatigilugillo tamaita.

³⁷ Ilûnatik tâva ᴋeavaksoadlalerput, Pauluselo ᴋongasingagut erᴋilerpât kunilâllo.

³⁸ Tamanna oᴋausek kiksautigiluarpât, kêname takojaujungnairninganik oᴋarmat; umiaksoarmullo ᴋanilârpât.